އަދީބު މިނިވަންވުމާއި ގުޅިގެން، ރައީސް ޔާމީން މިނިވަން ކުރަން ހުށަހެޅި ކުއްލި މައްސަލަ ބޭރުކޮށްލައިފި
15 ޖުލައި 2020 | ބުދަ 07:36ޝަރީފް ވިދާޅުވީ އަދީބުގެ ވާހަކަތަކުން ރައީސް ޔާމީނާ ދެކޮޅަށް ހެކިބަސް ދިންކަމަށް ހާމަވާ ކަމަށް
ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް: ރައީސް ޔާމީން ވަގުތުން މިނިވަން ކުރަން މަޖިލީހަށް ކުއްލި މައްސަލައެއް ވަނީ ހުށަހަޅުއްވާފައި
އެމްއެމްޕީއާރުސީގެ ހިޔާނާތާ ގުޅިގެން ކުރީގެ ނާއިބު ރައީސް އަހުމަދު އަދީބުގެ މައްޗަށް ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން އުފުލު 7 ދައުވާ ބާތިލްކޮށް، އަދީބު މިނިވަންވެފައިވާތީ، ކުރީގެ ރައީސް އަބްދުﷲ ޔާމީން ވަގުތުން މިނިވަން ކުރުމަށް ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.
މި ކުއްލި މައްސަލަ ބުދަ ދުވަހުގެ ޖަލްސާއަށް ހުށަހެޅުއްވީ، ޕީޕީއެމް-ޕީއެމްސީ ކޯލިޝަންގެ މަޑުއްވަރީ ދާއިރާގެ މެމްބަރު އާދަމް ޝަރީފްއެވެ. ހުށަހެޅުއްވި މި ކުއްލި މައްސަލަ މަޖިލީގައި ބަހުސް ކުރުމަށް ފެނިވަޑައިގަންނަވާތޯ ވޯޓަށް އެހުމުން ރައީސް ޔާމީން ވަގުތުން މިނިވަން ކުރަން ހުށަހެޅިފައިވާ އެ ކުއްލި މައްސަލަ މަޖިލީހުން ބޭރުކޮށްލާފައިވަނީ، 20 މެމްބަރުންގެ އަޣްލަބިއްޔަތުންނެވެ. އެ މައްސަލަ ބަލައިގަންނަން ވޯޓު ދެއްވާފައިވަނީ 7 މެމްބަރުންނެވެ.
ރައީސް ޔާމީންގެ ވަގުތުން މިނިވަން ކުރުމަށް އާދަމް ޝަރީފް ހުށަހެޅުއްވި ކުއްލި މައްސަލާގައި މައިގަނޑު ގޮތެއްގައި ވިދާޅުވެފައިވަނީ، ސަރުކާރުން އަދީބަށް ބިރުދައްކުމާއި، މަޖުބޫރު ކުރުވައިގެން، އެއްބަސްވުމެއް ހަދައި، ރައީސް ޔާމީނާ ދެކޮޅަށް ހެކިބަސް ދީފައިވާ ކަމަށް ކްރިމިނަލް ކޯޓުގައި އަދީބު ދައްކަވާފައިވާ ވާހަކަތަކުން ހާމަވާ ކަމަށެވެ.
މީގެއިތުރުން ޝަރީފް ވިދާޅުވީ، 5 އަހަރަށް ޖަލަށްލުމަށް ރައީސް ޔާމީންގެ މައްޗަށް ކޮށްފައިވާ ހުކުމަކީ ނުފޫޒު ފޯރުވައިގެން، ހެކި އުފައްދައިގެން ބާތިލް ހުކުމެއްކަމަށް ނުހަނު ހާމަކަން ބޮޑު ގޮތެއްގައި ފެންނަން އޮތުމާއި، ރައީސް ޔާމީނަށް ހުކުމް ކުރުމުގައި އަދީބުގެ ބަޔާންތަކަށް ރިޔާއަތްކޮށްފައިވާތީވެ، ރައީސް ޔާމީންގެ މައްޗަށް ކޮށްފައިވާ ދައުވާއަކީ ޕީޖީގެ އޮފީހުން ގާނޫނާ ހިލާފު ހެކިތަކެއްގެ މައްޗަށް ބިނާކޮށް، ޕީޖީގެ އޮފީހުންކޮށްފައިވާ ދައުވާއެއް ކަމަށެވެ.
އެހެންކަމުން، މިކަން ސަރުކާރުގެ ސަމާލުކަމަށް ގެނެސް ރައީސް ޔާމީން ޖަލުގައި ބަހައްޓާނެ އެއްވެސް ގާނޫނީ ހަމައެއް ނެތުމުން ރައީސް ޔާމީން ވަގުތުން މިނިވަން ކުރުމަށް ގޮވާލައި މަޖިލީހުގެ ގަވާއިދުގެ ދަށުން މި ކުއްލި މައްސަލަ ހުށަހަޅުއްވާ ކަމަށް ޝަރީފް ވިދާޅުވިއެވެ.
ޝަރީފްގެ މިވާހަކަތަކާއެކު، ކުއްލި މައްސަލަ މަޖިލީހަށް ހުށަހެޅުއްވިއިރު، ރައީސް ޔާމީންގެ މައްޗަށް އުފުލާފައިވަނީ، އެމްއެމްޕީއާރުސީގެ ހިޔާނާތުގައި ހިމެނޭ ގއ. ވޮޑުމުލާ ކުއްޔަށް ދޫކޮށްގެން އިކުއިޒިޝަން ފީގެ ގޮތުގައި އެމްއެމްޕީއާރުސީއަށް ނުވަތަ ދައުލަތަށް ލިބެންޖެހޭ 1،000،000 މިލިއަން ޑޮލަރު ރައީސް ޔާމީންގެ އަމިއްލަފުޅު އެކައުންޓަށް ޖަމާކޮށް، އެފައިސާއަކީ ދައުލަތުގެ ފައިސާކަމަށް އެންޓި ކޮރަޕްޝަން ކޮމިޝަނުންގެ ތަހުގީގަށް ތުހުމަތު ކުރެވޭތީ، އެފައިސާ އެސްކްރޯ އެކައުންޓެއްގައި ބެހެއްޓުމުމަށް އެދުމުން ވެސް އެފައިސާގެ ބަދަލުގައި، އެހެން ގޮތަކުން 1،000،000 މިލިއަން ޑޮލަރު ހޯއްދަވައި، އެސްކްރޯ އެކައުންޓަށް ޖަމާކޮށް، ރައީސް ޔާމީންގެ އަމިއްލަފުޅު އެކައުންޓަށް ޖަމާކޮށްފައިވާ ދައުލަތުގެ 1،000،000 ޑޮލަރުގެ އަސްލު އޮޅުވާލުމާއި، ޖެނެރަލް އިންވެސްޓްމަންޓް އެކައުންޓެއްގައި އެފައިސާ ބަހައްޓައިގެން 36 ދުވަސް ވަންދެއް އެފައިސާ ބޭނުންކޮށްގެން ފައިދާ ހޯއްދަވާފައިވާތީ، މަނީ ލޯންޑަރިންގ ކުށުގެ ދައުވާ އެކެވެ.
ކްރިމިނަލް ކޯޓުން އަދީބުގެ ދައުވާތައް ބާތިލް ކުރިނަމަވެސް، މިހަފްތާގައި އެމައްސަލަ ހައިކޯޓުގައި އިސްތިއުނާފް ކުރައްވާނެ ކަމަށް ޕީޖީ ހުސައިން ޝަމީމު ވަނީ ވިދާޅުވެފައެވެ.
ޕީޖީ ޝަމީމު ވަނީ، ކްރިމިނަލް ކޯޓުން އަދީބުގެ ދައުވާތައް ބާތިލް ކަމަށް ނިންމި ނިންމުން، އެއްގޮތަކަށް ވެސް ގަބޫލު ނުކުރެވޭ ކަމަށާއި، ކްރިމިނަލް ކޯޓުގެ ގާޒީ އިސްމާއީލް ރަޝީދުގެ އެ ނިންމުމަކީ، ގާނޫނާ އެއްގޮތަށް ނިންމާފައިވާ ނިންމުމެއް ނޫން ކަމަށެވެ. އެހެންކަމުން، ހައިކޯޓަށް އެ މައްސަލަ އިސްތިއުފާނު ކުރައްވާނެ ކަމަށް ވިދާޅުވިއިރު، ގާޒީގެ މައްސަލަ ޖުޑީޝަލް ސަރވިސް ކޮމިޝަނަށް ހުށަހަޅުއްވާނެ ކަމަށްވޗވެސް ޝަމީމު ވިދާޅުވިއެވެ.
ކްރިމިނަލް ކޯޓުން އަދީބުގެ މައްޗަށް އުފުލި ދައުވާތައް ބާތިލް ކަމަށް ނިންމުމާއެކު އޭނާ ވަނީ މިނިވަން ވެފައެވެ. ނަމަވެސް އަދީބު ރާއްޖެއިން ފުރުން މަނާކޮށް، އޭނާގެ ޕާސްޕޯޓް ވަނީ އަންގާރަ ދުވަހުގެ ރޭ ކޯޓު އަމުރެއްގެ ދަށުން ހިފަހައްޓާފައެވެ.
