އަދީބުގެ ޕާސްޕޯޓް ހިފަހައްޓައިފި
އަދީބުގެ މައްޗަށް އުފުލާފައިވާ ދައުވާތައް ވަނީ ބާތިލްކޮށްފައި
ކުރީގެ ނައިބް ރައީސް އަހުމަދު އަދީބް
ކްރިމިނަލް ކޯޓުން މިނިވަން ކަމުގައި ކަނޑައެޅި ކުރީގެ ނައިބު ރައީސް އަހުމަދު އަދީބްގެ ޕާސްޕޯޓް ހިފަހައްޓައިފިއެވެ.
އެމްއެމްޕީއާރްސީގެ މައްސަލާގައި އަދީބުގެ މައްޗަށް ދައުލަތުންކުރި ހަތް ދައުވާ ކްރިމިނަލް ކޯޓުން ބާތިލް ކުރުމުން އަންގާރަ ދުވަހު އޭނާ ވަނީ މިނިވަންވެފައެވެ.
އެ ދައުވާ ކްރިމިނަލް ކޯޓުން ބާތިލްކުރި މައިގަނޑު ސަބަބަކީ، ކުށަށް އިއުތިރާފްވުމާއި ތަހުގީގަށް އެއްބާރުލުން ދިނުމުގެ އެއްބަސްވުން ހަދާފައިވަނީ ގާނޫނާ ހިލާފަށް ކަމަށް ބުނެއެވެ. އިއުތިރާފުގެ އެއްބަސްވުމާ ނުލާވެސް، ދައުވާ ސާބިތުވާ މިންވަރަށް ހެކި ހުށައަޅާފައިވާނެ ކަމަށް ދައުލަތުގެ ވަކީލާ ކްރިމިނަލް ކޯޓުގައި ވިދާޅުވިއެވެ.
އަދީބު ފުރުން މަނާކޮށް، ޕާސްޕޯޓް ހިފެހެއްޓުމުގެ އަމުރަކަށް އެދިވަޑައިގަންނަވާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމު ވަނީ އަންގާރަ ދުވަހު ހަވީރު ބޭއްވި ޕްރެސްކޮންފަރެންސް ގައި ވިދާޅުވެފައެވެ. އޭނާ ފުރުން މަނާކުރަން އެދުނީ އެ މައްސަލަ ހައިކޯޓުގައި އިސްތިއުނާފް ކުރަން ނިންމުމުންނެވެ. އަންގާރަ ދުވަހުގެރޭ ކްރިމިނަލް ކޯޓުން ވަނީ އަދީބު ރާއްޖެއިން ފުރުން މަނާކޮށް އަމުރެއް ނެރެފައެވެ.
އަންގާރަ ދުވަހު ހަވީރު ބޭއްވި ނޫސްވެރިންގެ ބައްދަލުވުމުގައި ޕީޖީ ޝަމީމް ވަނީ، މައްސަލަ ބެއްލެވި ގާޒީ އިސްމާއިލް ރަޝީދުގެ ނިންމެވުމާމެދު ހިތްހަމަޖެހިވަޑައި ނުގަންނަވާ ކަމަށް ވިދާޅުވެފައެވެ. އަދި މައްސަލަ ސާބިތު ކުރި ސަބަބެއް އަދި ހަވާލާދިން ގާނޫނުގެ މާއްދާއެއް ހުކުމުގައި ބަޔާންކޮށްފައި ނުވާ ކަމަށް ވެސް ޝަމީމް ވިދާޅުވިއެވެ. ދައުވާތައް ބާތިލް ކުރި ސަބަބުތަކުގެ ތެރޭގައި އަދީބާއެކު ދައުލަތުން ވެފައިވާ އިއުތިރާފުގެ އެއްބަސްވުމުގެ ސައްހަކަން ހިމެނެއެވެ. އެގޮތުން، އެއީ އަދީބު ލައްވާ މަޖުބޫރުން ސޮއިކުރުވި އެއްބަސްވުމެއް ކަމަށް ގާޒީ ވަނީ ނިންމަވާފައެވެ. އަދި ގާޒީ މިހެން ނިންމެވީ އަދީބު އެހެން ވިދާޅުވެގެން ނޫން ކަމަށް ޝަމީމް ވިދާޅުވިއެވެ.
ގާޒީ އިސްމާއިލް ރަޝީދު މި މައްސަލައިގައި އަމަލު ކުރެއްވި ރަނގަޅަށްތޯ ނުވަތަ ނޫންތޯ ނިންމަވާނީ ޖޭއެސްސީން ކަމަށް ޝަމީމް ވިދާޅުވިއެވެ. އަދި ކުރިއަށް އޮތް ތަނުގައި ވެސް، ހުކުމަކާއި ގުޅިގެން މައްސަލައެއް ހިމެނޭ ކަމަށް ގަބޫލުކުރެވޭނަމަ، ވަކި ގާޒީއަކަށް ބެލުމެއް ނެތި އެ މައްސަލަތައް ހުށައަޅުއްވާނެ ކަމަށް ޕީޖީ ވިދާޅުވިއެވެ.
ގާޒީ އިސްމާއިލް ރަޝީދު ކްރިމިނަލް ކޯޓުގެ ގާޒީގެ މަގާމަށް އައްޔަނު ކުރައްވާފައިވަނީ، 2018 ވަނަ އަހަރުގެ މެއި މަހުގެ ތެރޭގައެވެ. މިހާތަނަށް ގާޒީ އިސްމާއިލް ރަޝީދާ ގުޅޭ އެއްވެސް މައްސަލައެއް ޖޭއެސްސީން ބަލަމުންދާ ކަމުގެ މައުލޫމާތު ލިބިފައެއް ނުވެއެވެ.
