ބުރާސްފަތި 13 އޯގަސްޓު 2020
03 މާ
1441 ޒުލްޙައްޖު 23
ފަތިސް 04:48
އިރުއަރާ 06:01
މެންދުރު 12:15
އަސްރު 15:30
އިރުއޮއްސޭ 18:21
އިޝާ 19:34
ޒަހާއާ ނަސްލީ ގޮތުން ދިމާކުރުން

ޒަހާއާ ނަސްލީ ގޮތުން ދިމާކުރި 12 އަހަރުގެ ކުއްޖަކު ހައްޔަރުކޮށްފި

  • ޒަހާއަށް ވަނީ ނަސްލީ ފުރައްސާރަކުރި މެސެޖުތަކެއް ލިބިފައި
  • ޒަހާ ވަނީ އޭނާއަށް ކުރި މެސެޖުތައް ޕްރިމިއާ ލީގާ ވެސް ހިއްސާކޮށްފައި

ކ. މާލެ | 13 ޖުލައި 2020 | ހޯމަ 12:59 | 2,177

ކްރިސްޓަލް ޕެލަސްގެ ފޯވާޑް ވިލްފްރިއެޑް ޒަހާ: އޭނާއަށް ވަނީ ނަސްލީ ފުރައްސާރަކުރި މެސެޖުތަކެއް ލިބިފައި - ގެޓީ އިމޭޖާސް

ކްރިސްޓަލް ޕެލަސްގެ ފޯވާޑް ވިލްފްރިއެޑް ޒަހާއާ ނަސްލީ ގޮތުން ދިމާކުރި 12 އަހަރުގެ ކުޑަކުއްޖަކު ހައްޔަރުކޮށްފިއެވެ.

އިނގިރޭސި ޕްރިމިއާ ލީގުގައި އާދީއްތަ ދުވަހު އެސްޓަން ވިލާ އާއި ކްރިސްޓަލް ޕެލަސް ބައްދަލުކުރި މެޗުގެ ކުރިން ޒަހާ ވަނީ އޭނާއަށް ނަސްލީ ގޮތުން ދިމާކޮށް އިންޓަނެޓް މެދުވެރިކޮށް މެސެޖްތަކެއް ލިބުނު ކަމަށް ބުނެފައެވެ. އަދި ޒަހާ ވަނީ އޭނާއަށް ކުރި މެސެޖުތައް ޕްރިމިއާ ލީގާ ވެސް ހިއްސާކޮށްފައެވެ.

އެއާއެކު ވެސްޓް މިޑްލަންޑް ފުލުހުން މި މައްސަލަ ތަހުގީގުކުރަން ފެށިއިރު، މާގިނައިރުތަކެއް ނުވެ ފުލުހުން ވަނީ ޒަހާއަށް މެސެޖުކުރި ފިރިހެން ކުޑަކުއްޖަކު ހައްޔަރުކޮށްފައިވާ ކަމަށް ބުނެފައެވެ.

މިކަމާ ގުޅިގެން ކްރިސްޓަލް ޕެލަސްގެ ކޯޗު ރޯއީ ހޮޖްސަން ބުނީ ނަސްލީ ގޮތުން ދިމާކުރުމަކީ އެއްވެސް ވަރަކަށް ދޫދެވިގެންވާނެ ކަމެއް ނޫން ކަމަށާއި، އެކަން އެއްކޮށް ނައްތާލަން ޖެހޭ ކަމަށެވެ. އަދި އޭނާ ތާއީދުކުރަނީ މި ގޯސް އަމަލު ހިންގާ އެންމެނަށް ދެވެން އޮތް އެންމެ ބޮޑު އަދަބެއް ދިނުމަށް ކަމަށްވެސް ހޮޖްސަން ބުންޏެވެ.

ނަސްލީ ގޮތުން ޒަހާއާ ދިމާކުރި ކުޑަކުއްޖަކު ހައްޔަރުކުރިއިރު، ޕްރިމިއާ ލީގުން އަންނަނީ ނަސްލީ ތަފާތު ކުރުމާ ދެކޮޅަށް ކުރިއަށްގެންދާ "ބްލެކް ލައިވްސް މެޓާ" ކެމްޕެއިނުގައި ބައިވެރިވަމުންނެވެ. އެގޮތުން ޕްރިމިއާ ލީގުގެ ކޮންމެ މެޗެއް ފެށުމުގެ ކުރިން ކުޅުންތެރިންނާއި އޮފިޝަލުންގެ އިތުރުން މެޗުގެ ރެފުރީން ކަކޫ މައްޗަށް ތިރިވާއިރު، ނަސްލީ ތަފާތުކުރުންތަކާ ދެކޮޅަށް ސުކޫތެއް ގެނެއެވެ. އަދި ލީގުގައި ވާދަކުރާ ޓީމުތަކުގެ ޖާޒީގައި "ބްލެކް ލައިވްސް މެޓާ" ކެމްޕެއިނުގެ ބެޖެއް ޖަހާފައި ހުރެއެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން | ރިވިއު ކުރީ: އަބުދުﷲ ނަސީރު އިބްރާހިމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.