ނޫސްވެރިކަމުގެ މިނިވަންކަން ހޯދަން މީޑިއާ ކައުންސިލްގެ ކުރީގެ ރައީސުން އިގުރާރުވެއްޖެ

ނޫސްވެރިކަމުގެ މިނިވަންކަން އޭގެ އެންމެ ފުޅާދާއިރާއެއްގައި ހޯދައިދިނުމަށް މީޑިއާ ކައުންސިލްގެ ކުރީގެ ރައީސުން އިޤުރާރުވެއްޖެ އެވެ.

މީޑިއާ ކައުންސިލްގެ ކުރީގެ ރައީސުންގެ އިޤުރާރުގައި ބުނެފައިވަނީ، ދިވެހިރާއްޖޭގެ ޤާނޫނު އަސާސީގައި ބަޔާންކޮށްފައިވާ ނޫސްވެރިކަމާއި، ހިޔާލުފާޅުކުރުމާއި، މައުލޫމާތު ހޯދައި ލިބިގަތުމުގެ މިނިވަންކަން އޭގެ އެންމެ ފުޅަދާއިރާއެއްގައި ހޯދައިދިނުމަށް ޤާނޫނީ ހަމަތަކުގެ މަތިން މަސައްކަތް ކުރުމަށެވެ.

"އަޅުގަނޑުމެން، މޯލްޑިވްސް މީޑިއާ ކައުންސިލްގެ ރައީސްކަން ކޮށްފައިވާ ފަރާތްތަކުން މި އިޤުރާރު ވަނީ ދިވެހިރާއްޖޭގެ ޤާނޫނު އަސާސީގައި ބަޔާންކޮށްފައިވާ ނޫސްވެރިކަމާއި، ހިޔާލުފާޅުކުރުމާއި، މައުލޫމާތު ހޯދައި ލިބިގަތުމުގެ މިނިވަންކަން އޭގެ އެންމެ ފުޅަދާއިރާއެއްގައި ހޯދައިދިނުމަށް ޤާނޫނީ ހަމަތަކުގެ މަތިން މަސައްކަތް ކުރުމަށެވެ." އިޤުރާރުގައި ބުނެފައިވެއެވެ.

މި އިޤުރާރުގައި މީޑިއާ ކައުންސިލްގެ ރައީސްކަން ކުރައްވާފައިވާ ހަތަރު ބެފުޅަކު ސޮއިކުރައްވާފައިވާއިރު، މީޑިއާ ކައުންސިލްގެ ރައީސްކަން ކުރައްވާފައިވާ، އަދި ދައުލަތުގެ މީޑިއާގެ މިހާރުގެ މެނޭޖިން ޑިރެކްޓަރ އިބްރާހިމް ހަލީލް ސޮއިކުރައްވާފައެއް ނުވެއެވެ.

އިޤުރާރުގައި ސޮއިކުރައްވާފައިވަނީ މީޑިއާ ކައުންސިލްގެ ކުރީގެ ރައީސް މުހައްމަދު ނާފިޒާއި، ހުޝާމް މުހައްމަދާއި އަބްދުﷲ މުއާޒު ޔޫސުފް އަދި މުހައްމަދު އާސިފް (މޮންދު) އެވެ.

ނޫސްވެރިކަމުގެ މިނިވަންކަން އޭގެ އެންމެ ފުޅާ ދާއިރާއެއްގައި ކަށަވަރުކުރުމަށް މީޑިއާ ކައުންސިލްގެ ކުރީގެ ރައީސުން އިޤުރާރުވެފައި މިވަނީ، މޯލްޑިވްސް ބްރޯޑްކާސްޓިން ކޮމިޝަނުން އަމިއްލައަށް އިސްނަގައިގެން ބެލި މައްސަލައަކާ ގުޅިގެން ރާއްޖެޓީވީ އެއް މިލިއަން ރުފިޔާއިން ޖޫރިމަނާކޮށްފައިވަނިކޮށެވެ، ރައީސުލްޖުމްހޫރިއްޔާގެ އަބުރަށް ހުތުރުވާފަދަ ކޮންޓެންޓެއް ބްރޯޑްކާސްޓްކުރިކަމަށް ބުނެ، ރާއޖްެޓީވީ ޖޫރިމަނާކުރުމާއެކު، އެއީ ނޫސްވެރިކަން މަރާލުމަށް ބްރޯޑްކާސްޓިން ކޮމިޝަންގައި ތިއްބަވާ ބޭފުޅުން ކުރައްވާ ކަމެއްގެ ގޮތުގައި މީޑިއާގެ ދާއިރާގެ ގިނަ ދުވަހު މަސައްކަތްކުރައްވާފައިވާ ބޭފުޅުން ގެންދަވަނީ ވިދާޅުވަމުންނެވެ.