ލޮކްޑައުންގެ އަސަރު ބޮޑަށް ކުރީ އަންހެނުންނަށް: ރައީސް
11 ޖުލައި 2020 | ހޮނިހިރު 14:03ޝިޔާރަކީ، "ކޮވިޑް-19 ހުއްޓުމަށް: އަންހެނުންނާއި އަންހެން ކުދިންގެ ސިއްހަތު ރައްކާތެރި ކުރާނީ ކިހިނެއް؟"
ރައީސް ސޯލިހު އަންހެން ކަނބަލުންތަކާއިއެކު
ރާއްޖޭގައި ކޮވިޑް-19 ޖެހުނު އަންހެނުންގެ އަދު މަދުކަމުގައިވިޔަސް ލޮކްޑައުންގެ ސަބަބުން ގޮންޖެހުންތަކުގެ އަސަރު، އެންމެ ބޮޑަށް ކުރާ ބަޔަކީ އަންހެނުންނާއި އަންހެން ކުދިން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް އެހެން ވިދާޅުވީ، ދުނިޔޭގެ އާބާދީ ދުވަހުގެ މުނާސަބަތުގައި ފޮނުއްވި ހިތޯބުގައެވެ. މި އަހަރުގެ އާބާދީ ދުވަހުގެ ޝިޔާރަކީ، "ކޮވިޑް-19 ހުއްޓުމަށް: އަންހެނުންނާއި އަންހެން ކުދިންގެ ސިއްހަތު ރައްކާތެރި ކުރާނީ ކިހިނެއް؟" މި ޝިއާރެވެ.
ޝިޔާރަތް އަލިއަޅުއްވާލަމުން ރައީސްގެ ހިތޯބުގައި ވިދާޅުވީ، މިބަލީގެ ނުރައްކަލަށް އެންމެ ބޮޑަށް ހުށަހެޅިފައިވާ އެއް ބަޔަކީ އަންހެނުން ކަމަށެވެ. ސަބަބެއް ކަމަށް އެމަނިކުފާނު ވިދާޅުވީ، މި ބައްޔާ ދެކޮޅަށް އެންމެ ކުރީ ސަފުގައި މަސައްކަތްކުރާ، ސިއްޙީ ހިދުމަތްތެރިންގެ ތެރޭގައި ގިނައީ އަންހެނުން ކަމަށްވާތީއެވެ. ރާއްޖޭގައިވެސް ސިއްހީ ހިދުމަތްތެރިންގެ 70 އިންސައްތައަކީ އަންހެނުންނެވެ.
ސިއްހީ ނިޒާމަށްވެސް ވަރަށް ބާރު ބޮޑު ދުވަސްވަރެއް ކަމަށާއި، އޭގެ ސަބަބުން އާންމު ސިއްހަތުގެ ނިޒާމަށް ވަރަށް ގޮންޖެހުންތަކެއް ކުރިމަތިވެފައިވާ ކަމަށް ރައީސްގެ ހިތޯބުގައި ވިދާޅުވިއެވެ.
ނަފްސާނީ ދުޅަހެޔޮ ކަމަށްވެސް ވަރަށް ނޭދެވޭ އަސަރުތައް ފޯރަމުންދާ ކަމަށް ވިދާޅުވިއެވެ. ރައީސް ވިދާޅުވީ، ގެވެށި އަނިޔާގެ މައްސަލަތަކާއި، ކުޑަކުދިންނާއި އަންހެނުންނަށް ކުރިމަތިވާ ޖިންސީ ގޯނާގެ މައްސަލަތައްވެސް އިތުރުވެފައިވާ ކަމަށެވެ. އެއީ ވަރަށް ހާއްސަ އިސްކަމެއް ދީގެން ހައްލުކުރަން ޖެހިފައިވާ ކަންކަމަށް ވިދާޅުވިއެވެ.
ދިވެހިރާއްޖެއަކީ، މި ސަރަހައްދުގެ ގައުމުތަކާ އަޅައިބަލާއިރު، ދުޅަހެޔޮ އާބާދީއެއް ބިނާކުރުމުގައި ބޮޑެތި ކުރިއެރުންތަކެއް ހޯދާފައިވާ ގައުމެކެވެ. އެގޮތުން ބަލާއިރު، ވިހެއުމުގެ ތެރޭގައި އަންހެނުންނާއި ކުޑަކުދިން މަރުވާ ނިސްބަތް ވަނީ ވަރަށް ބޮޑަށް ދަށްކުރެވިފައެވެ. ރައީސް ވިދާޅުވި ގޮތުގައި ކާމިޔާބު ދެމެހެއްޓޭނީ، ކޮވިޑް-19 ފަދަ ބޮޑެތި ބަލިތަކާއެކުވެސް ދުޅަހެޔޮ އާބާދީއެއް ބިނާކޮށް، އުފަންވެނި ސިއްހަތަށާއި، އެހެނިހެން އިޖުތިމާއީ ކަންކަމަށް އިސްކަންދީގެންނެވެ.
