ކުރިއަށް ވުރެ އިތުރަށް ބޭންކުތަކަށް ޑޮލަރު ދޫކުރަމުންދާނެ ކަމަށް މޯލްޑިވްސް މަނިޓަރީ އޮތޯރިޓީ އެމްއެމްއޭއިން ހާމަކޮށްފިއެވެ.

އެމްއޭއިން ބުނީ ކޮވިޑް19އާ ގުޅިގެން ފަތުރުވެރިކަމުގެ ސިނާއަތުން ރާއްޖޭގެ ބޭންކިން ނިޒާމަށް ލިބެމުން ދިޔަ ޑޮލަރުގެ ސަޕްލައި ހުއްޓިފައިވީ ނަމަވެސް އެކި ސްޓްރެޓަޖީތައް ބޭނުންކޮށްގެން ޑޮލަރަށް އޮތް ޑިމާންޑާ އެއްވަރަށް ޑޮލަރު ފޯރުކޮށްދިނުމަށް އެޅެން ހުރި ހުރިހާ ފިޔަވަޅެއް އަޅަމުންދާ ކަމަށެވެ. ދައުލަތުގެ ރަސްމީ ރިޒާވް ތަންދޭ މިންވަރަކުން، ޑޮލަރު ފެސިލިޓީތައް މެދުވެރިކޮށް ޑޮލަރު ލިބޭނެ އިންތިޒާމު ހަމަޖައްސަމުން ގެންދާނެކަމަށް ވެސް އެމްއެމްއޭއިން ބުންޏެވެ.

ރާއްޖޭގައި ޑޮލަރުގެ ރަސްމީ ރޭޓަކީ 15.42 ރުފިޔާއެވެ. ނަމަވެސް ބައެއް ފަރާތްތަކުން މި ދަނޑިވަޅުގެ ނާޖާއިޒް ފައިދާ ނަގާ، ޑޮލަރުގެ ތާށިކަމެއް އުޅެނީ ކަމަށްބުނެ ކަޅު ބާޒާރުގައި ޑޮލަރު އަގުބޮޑުކޮށް ދަނީ ވިއްކަމުންނެވެ. ކަޅު ބާޒާރުގައި ޑޮލަރުގެ ރޭޓު އުޅެނީ 16 ރުފިޔާއާއި 18 ރުފިޔާއާ ދެމެދުގެ އަގެއްގައެވެ.