ޖަލުތަކުގައި އާއިލީ ބައްދަލުވުންތައް ފަށައިފި
އާއިލާތަކުން ގައިދީންނަށް އަންނައުނު ވެސް މިހާރު ފޮނުވޭނެ
ޖަލުގައި އާއިލީ ބައްދަލުވުން ކުރިއަަށްދަނީ
މާފުށީ ޖަލާއި އައްސޭރި ޖަލުގައި އާއިލީ ބައްދަލުވުންތައް ބުދަ ދުވަހު ފަށައިފިއެވެ.
ބުދަ ދުވަހުގެ ރޭ ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު ކުރައްވާފައިވާ ޓްވީޓްގައި ވިދާޅުވީ މިވަގުތު ކޮވިޑު ނެތް ރަށްރަށުގައި ދިރިއުޅޭ އާއިލާތަކަށް މިހާރު ޖަލުގައި ތިބި އާއިލީ މެންބަރުންނާއި ބައްދަލު ކުރެވޭނެ ކަމަށެވެ.
އަދި ހޮނިހިރު ދުވަހުން ފެށިގެން ގައިދީންގެ އާއިލާތަކުން ގައިދީންނަށް އަންނައުނު ވެސް ފޮނުވޭނެ ކަމަށް އޭނާ ވިދާޅުވިއެވެ.
ރާއްޖޭގައި ސިއްހީ ކުއްލި ހާލަތު އިއުލާން ކުރުމާއި ގުޅިގެން ޖަލުތަކުގައި ތިބި ގައިދީންނަށް ރައްކާތެރިކަމުގެ ފިޔަވަޅެއްގެ ގޮތުން އާއިލީ އަދި އެކަހެރި ބައްދަލުވުންތައް މިދިޔަ މާރަޗް މަހުގެ 12 އިން ފެށިގެން ވަނީ މެދުކަނޑާލާފައެވެ.
ނަމަވެސް، ޢާއިލާއާ އޮންނަ ގުޅުން ބަދަހިކޮށް، އިތުރު ފުރުޞަތު ހޯދައިދިނުމުގެ ގޮތުން ފޯން ކޯލު ދެމުންދާ މިންވަރު ވަނީ އިތުރުކޮށްފައެވެ.
