ނ. ފޮއްދޫ ގޮނޑުދޮށް ހިމާޔަތްކުރުމުގެ މަޝްރޫއުގެ މަސައްކަތް މި ހިނގާ ޖުލައި މަސްތެރޭގައި ނިންމާލެވޭނެ ކަމަށް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ން ބުނެފިއެވެ.

އެމްޓީސީސީން ބުނީ މިހާރު ކުރިއަށް ދަނީ ޖިއޯ ބޭގް ޖެހުމުގެ މަސައްކަތް ކަމަށެވެ.

މި ޕްރޮޖެކްޓްގެ މަސައްކަތް މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ ގެ ފަރާތުން އެމްޓީސީސީ އާ ހަވާލުކޮށްފައިވަނީ މިއަހަރުގެ ފެބްރުއަރީ މަހުގެ 25 ގައެވެ.

މި މަސައްކަތުގެ އީއައިއޭ ހަދައި ނިމި ހުއްދަ ދީފައިވަނީ މިއަހަރުގެ މާރޗް މަހުގެ 18 ގައި ކަމަށް އެމްޓީސީސީން މަައުލޫމާތު ދެއެވެ.

މަޝްރޫއު އެކުންފުންޏާ ހަވާލުކުރީ 7612،602.00 (ހަތް މިލިއަން ހަ ލައްކަ ބާރަ ހާސް ހަ ސަތޭކެ ދޭއް) ރުފިޔާއަށް، 180 ދުވަހުގެ ތެރޭގައި ނިންމާ ގޮތަށްށެވެ.

ފޮއްދޫ ގޮނޑުދޮށް ޙިމާޔަތްކުރުމުގެ މަސައްކަތުގެދަށުން އެރަށުގެ ގޮނޑުދޮށުން 180 މީޓަރު ސަރަޙައްދުގައި ޖިއޯބޭގް ޖަހައިގެން ޙިމާޔަތްކުރާނެކަމަށް އެމްޓީސީސީން ބުނެއެވެ.

މި މަޝްރޫއުގެ ސަބަބުން ފޮއްދުއަށް ދިމާވެފައިވާ ރަށް ގިރުމުގެ މައްސަލަތައް ހައްލުވެ، މީހުންނަށް ދިރިއުޅުމަށް ރައްކާތެރި ތަނަކަށް ވެގެންދާނެ ކަމަށެވެ.