އާރްސީސީއާ މެދު ދޮގު ހަބަރު ފެތުރި މައްސަލަ ފުލުހަށް
ދައުވާކުރާނެ ކަމަށް ކުންފުނިން ބުނި
އާރްސީސީގެ ޗެއަރމަން މުހައްމަދު ނާޒިމް
ރަޝީދު ކާޕެންޓަރީ އެންޑް ކޮންސްޓްރަކްޝަން (އާރްސީސީ) ގެ މުވައްޒަފުންތަކެއް މުޒާހަރާކުރަނީ ކަމަށް ބުނެ އެ ކުންފުނީގެ އަގުވެއްޓޭ ގޮތަށް ޝޯޝަލް މީޑިއާގައި މައުލޫމާތުތަކެއް ދައުރުކުރުވާތީ އެ މައްސަލަ ފުލުހަށް ހުށައަޅަން ނިންމައިފިއެވެ.
އާރްސީސީގެ ބިދޭސީ މުވައްޒަފުންތަކަކަށް މުސާރަ ނުދީގެން އިހްތިޖާޖުކުރާ ކަމަށް ބުނާ ފޮޓޯތަކެއް ޝޯޝަލް މީޑިއާގައި ދަނީ ދައުރުވަމުންނެވެ. އެ ވާހަކަތައް ދޮގުކޮށް އާރްސީސީން ބުނީ، ދައުރުވާ ފޮޓޯއަކީ ކުންފުނީގެ މުވައްޒަފުންގެ ވޯކް ވިސާ ކާޑު ހައްދަން ފޮޓޯ ނަގަން ގޮސް ތިއްބާ ނަގާފައިވާ ފޮޓޯއެއް ކަމަށެވެ.
އާރްސީސީގެ ޗެއަރމަން އަދި ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު މުހައްމަދު ނާޒިމް (ކާނަލް ނާޒިމް) ވިދާޅުވީ، ކުންފުނީގެ އަގުވެއްޓޭ ގޮތަށް ހަބަރުފެތުރި ފަރާތާއި ދެކޮޅަށް ފުލުހަށް މައްސަލަ ހުށައަޅާނެ ކަމަށެވެ. އަދި ދައުވާވެސް ކުރާނެ ކަމަށް ނާޒިމް ވިދާޅުވިއެވެ.
މި ފަހަކަށް އައިސް ރާއްޖޭގައި މަސައްކަތްކުރާ ބިދޭސީންނަށް މުސާރަ ނުދޭ މައްސަލަ ދަނީ އިތުރުވަމުންނެވެ. ހޯމަ ދުވަހު ހުޅުމާލޭ ޕޮލިސް އަދި އެމްއެންޑީއެފް ފްލެޓްތައް އަޅަން މަސައްކަތްކުރާ ބިދޭސީންތަކެއް ވަނީ މުޒާހަރާކޮށްފައެވެ.
