ހިޔާ ފްލެޓުގެ އަގު 7،000ރ. ށްވުރެ ބޮޑެއް ނުވާނެ، ނިންމަން 8 މަސް ދުވަސް ނަގާނެ!
6 ޖުލައި 2020 | ހޯމަ 08:21ފްލެޓުގެ މަހު ކުލި 7000ރ. ގެ މިންވަރުގައި ހިފެހެއްޓޭނެ
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓަރަކްޗަރ މުހައްމަދު އަސްލަމް
ކުރީގެ ރައީސް އަބްދުﷲ ޔާމީނުގެ ސަރުކާރުން ހުޅުމާލޭގައި ހިޔާ މަޝްރޫއުގެ ދަށުން އަޅާފައިވާ ފްލެޓުތަކަށް މަހަކު ދައްކަންޖެހޭ ފައިސާގެ އަދަދު 7000ރ. ށްވުރެ ބޮޑު ނުވާނެ ކަމަށް ހައުސިންގ އެންޑް ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު، ސަރުކާރުގެ ބޯހިޔާވަހިކަމުގެ ސިޔާސަތާ ގުޅޭގޮތުން ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަސްލަމް ވިދާޅުވީ ހިޔާ މަޝްރޫއުގައި ސަރުކާރުން ވައުދުވެފައި އޮތް މިންވަރުގެ ތެރޭގައި ހިފަހައްޓަވާނެ ކަމަށެވެ.
އަސްލަމް ވިދާޅުވީ ހިޔާ ފްލެޓު، އެ ފްލެޓުތަކުގެ ހައްގު ވެރިންނާ ހަވާލުކުރެވޭނީ، ހިޔާ މަޝްރޫއު ހިންގުމަށް ވެފައިވާ އެއްބަސްވުމުގައި ހުރި މަސައްކަތް ނިންމުމަށްފަހުގައި ކަމަށެވެ. އެގޮތުން މިހާރު މައިގަނޑު ގޮތެއްގައި ކުރަންހުރި މަސައްކަތަކީ، ފްލެޓުގައި ތަޅުން އެޅުމުގެ މަސައްކަތްފަދަ ކުދި މަސައްކަތް ކަމަށެވެ. އަދި ފްލެޓުތަކަށް ބޭނުންވާ ފެނާއި ކަރަންޓުގެ ޚިދުމަތް ފޯރުކޮށްދިނުމަށް، އެމްޑަބްލިޔުއެސްސީ އާއި ސްޓެލްކޯއާ މަޝްވަރާ ކުރެވިފައިވާ ކަމަށާއި، އެ މަސައްކަތް ނިންމަން 8 މަސް ދުވަސް ނަގާނެ ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ، ހިޔާ މަޝްރޫއުގެ ފްލެޓު ދޫކުރުމުގައި މިސަރުކާރުން ކަމެއް ލަސްކޮށްފައި ނުވާނެ ކަމަށާއި، މަސައްކަތް ކުރަމުންދަނީ ވީހާވެސް އަވަހަކަށް ފްލެޓުތައް އޭގެ ހައްގުވެރިންނާ ހަވާލު ކުރުމަށެވެ. އެގޮތުން، ހިޔާ ފްލެޓު އިމާރާތް ކުރުމުގެ އެއްބަސްވުމުގައި ނެތް، ކޮޓަރި ތަކުގެ ދޮރާއި، ޓައިލްސް ޖެހުމާއި ފަންކާއާއި ބޮކި، ހަރުކުރުން ފަދަ ކަންކަން ނިންމުމަށްފަހު، ފްލެޓުތައް ހަވާލު ކުރުމުގެ ވިސްނުން ސަރުކާރުން ކުރިން ގެންގުޅުނު ކަމަށާއި ނަމަވެސް މިހާރު ސަރުކާރުން ނިންމާފައިވަނީ، ހިޔާ ފްލެޓުތަކުގެ އެއްބަސްވުމާއެއް ގޮތަށް، އެ މަޝްރޫއު ނިންމާ ފްލެޓުތައް ހަވާލު ކުރުން ކަމަށެވެ.
ފްލެޓުތަކުގެ ފިނިޝިންގެ އެ މަސައްކަތް ކުރުމަށް 42 މިލިއަން ޑޮލަރުގެ ލޯނެއް ނެގުމުގެ ވިސްނުން މި ސަރުކާރުން ކުރިން ގެންގުޅުނެވެ. ނަމަވެސް ސަރުކާރުގެ ވިސްނުން ފަހުން ބަދަލުކުރީ ވަރަށް މުހިއްމު ސަބަބުތަކަކަށްޓަކައި ކަމަށް އަސްލަމް ވިދާޅުވިއެވެ. އެގޮތުން، ކުރީގެ ސަރުކާރުން ނިންމާފައިވާ ގޮތަށް، (އެއްބަސްވުމާ އެއްގޮތަށް) މަސައްކަތް ނިންމުމާއި، އިތުރު ޚަރަދު ކުރާނަމަ، ފްލެޓަށް ދައްކަންޖެހޭ މަހުކުލި ވެސް ބޮޑުވެގެންދާނެތީ އާއި، އަދި ފްލެޓު ހަވާލުކުރުން ވެސް އިތުރު ލަސްތަކެއް އަންނާނެތީ ކަމަށް އަސްލަމް ވިދާޅުވިއެވެ.
"ހިޔާ" މަޝްރޫއުގެ ދަށުން 25 ބުރީގެ 16 ޓަވަރު އިމާރާތް ކުރުމަށް ޗައިނާ ސްޓޭޓް ކޮންސްޓަރަކްޝަން އިންޖީނިއަރިންގ ކޯޕަރޭޝަން ލިމިޓެޑާ ހަވާލުކުރުމުގެ އެއްބަސްވުމުގައި ސޮއިކުރީ، 2016 ޖުލައި 20 ގައެވެ. މިއީ ދިވެހި ސަރުކާރުން، 434 މިލިއަން ޑޮލަރުގެ ލޯނެއް ނަގައިގެން ހިންގާ ޕްރޮޖެޓެކެވެ. އެއީ 7،000 ފްލެޓަށް 62،000 ޑޮލަރުގެ ރޭޓުންނެވެ.
މި މަޝްރޫއުގެ އަމަލީ މަސައްކަތް ފަށާފައިވަނީ 2017 ޑިސެމްބަރު 19 ގައެވެ. އެގްރީމެންޓުގައިވާ ގޮތުން، 730 ދުވަހުގެ ތެރޭގައި އެ މަޝްރޫއު ނިންމަންޖެހެއެވެ. އެއީ ދެ އަހަރުގެ މުއްދަތެކެވެ. އެހެންކަމުން މި މަޝްރޫއު 2019 ޑިސެމްބަރު 19 ހުންނަން ޖެހޭނީ ނިމިފައެވެ.
ރައީސް ޞާލިޙުގެ ސަރުކާރުން ވަނީ، މުޅި ޓަވަރުގައި ޔުނިޓުތައް ނުވަތަ ފްލެޓު ހަދައިގެން ރައްޔިތުންނަށް އެތަންތައް ދިނުމުގެ ބަދަލުގައި، އެތަންތަނުން ރައްޔިތުންނަށް ލިބެންޖެހޭ ޚިދުމަތްތައްވެސް ލިބިދޭގޮތަށް ފްލެޓުތައް ދޫކުރުމަށެވެ. އެގޮތުން، ރައީސް ޞާލިޙުގެ ސަރުކާރުން ވަނީ 7،000 ފްލެޓުގެ ބަދަލުގައި 6،720 ފްލެޓު ދިނުމަށް ނިންމާފައެވެ. އެގޮތުން، ކޮންމެ ޓަވަރެއްގެ ގްރައުންޑް ފްލޯ ބޭނުންކުރާނީ ފިހާރަތަކަށާއި ބުކްޝޮޕްތަކަށާއި ސެކިއުރިޓީ އާއި ކުނި މެނޭޖު ކުރުމާއި އިމާރާތުގެ މެއިންޓެނެންސް އަދި އިދާރީ ކަންކަމުގެ އިތުރުން، ޤުރުޢާން ކްލާސްތައްފަދަ ތަންތަން ހިންގުމަށެވެ.
