ވައުދުތައް ފުއްދުމުގައި ފުލުހުންގެ ދައުރު ވަރަށް ބޮޑު: ރައީސް ސޯލިހު
5 ޖުލައި 2020 | އާދީއްތަ 17:58ރައްޔިތުންނަށް އަދުލްއިންސާފު ހޯދަދޭން ޖެހޭ
އިސްކަންދަރުކޮށީގައި ބޭއްވި ރަސްމިއްޔާތުގައި ރައީސް ސޯލިހު ވަނީ ފުލުހުން ކުރަމުންދާ މަސައްކަތްތަކުގެ އަގު ވަޒަންކޮށް ވާހަކަފުޅު ދައްކަވާފައި
ރައްޔިތުންނަށް ޚިދުމަތް ކުރުމުގައި ހަވާލުވެ ތިބީ ވަރަށް މުހިންމު ވައުދުތަކާއެކު ކަމަށާއި، މި ވައުދުތައް ފުއްދުމުގައި ފުލުހުންގެ ދައުރު ވަރަށް ބޮޑު ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އާދިއްތަ ދުވަހު އިސްކަންދަރުކޮށީގައި ބޭއްވި ރަސްމިއްޔާތުގައި ފުލުހުންނާއި ބައްދަލުކުރައްވާ ވާހަކަ ދައްކަވަމުން ރައީސް ސޯލިހު ވިދާޅުވީ ރައްޔިތުންނަށް ޚިދުމަތް ކުރުމަށް އައީ ވަރަށް މުހިންމު ވައުދުތަކާއެކު ކަމަށާއި، މި ވައުދުތަކުގެ ތެރެއިން އެންމެ މުހިންމު ކަމަކީ ރައްޔިތުންނަށް އަދުލު އިންސާފު ހޯދައިދީ މުޖުތަމައުގައި އަމާންކަމާއި ހަމަޖެހުން ގާއިމުކޮށްދީ އުފާ ފާހަގަތި ދިރިއުޅުމެއް ހޯދައި ދިނުން ކަމަށެވެ. މި މުހިންމު ވައުދުތައް ފުއްދުމުގައި ދިވެހި ފުލުހުން އަދާކުރަން ޖެހޭ ދައުރު ވަރަށް ބޮޑު ކަމަށް އެމަނިކުފާނު ވިދާޅުވިއެވެ.
ފުލުހުން ކުރަމުންދާ މަސައްކަތްތަކަށް އަލިއަޅުއްވާލައްވާ ރައީސް ސޯލިހު ވިދާޅުވީ މިއަހަރު ފެށުނީއްސުރެ ކޮވިޑް-19އާ ދެކޮޅަށް މިކުރި މަސައްކަތުގައި ދިވެހި ފުލުހުން އަދާ ކުރީ އަދި މިހާރު ވެސް އަދާކުރަމުން ގެންދަނީ ވަރަށް މުހިންމު މަސައްކަތްތެއް ކަމަށާއި، އެއީ ދިވެހި ކޮންމެ ރައްޔިތަކު ހެޔޮ ހިތުން ބަލައި ގަންނާނެ މަސައްކަތެއް ކަމަށެވެ. އަދި ކޮވިޑްގެ ތެރޭގައި ވެރިރަށް މާލެ ފުރަބަންދުގައި ހޭދަކުރި މުއްދަތުގައި ފުލުހުންގެ މަސައްކަތް އެތައް ގުނައަކަށް އިތުވެގެން ދިޔަކަން އެމަނިކުފާނު ފާހަގަކުރެއްވިއެވެ.
ރައީސް ސޯލިހު ވިދާޅުވީ ބަލި ފެތުރުން ހުއްޓުވުމަށް އާންމު ރައްޔިތުން ގޭގައި ތިބިއިރު މޭލެތެރޭގެ ސަލާމަތާއި ރައްކާތެރިކަން ކަށަވަރު ކުރުމަށް ރައްޔިތުންގެ ގެދޮރާއި މުދާ ހިމާޔަތް ކުރުމުގައި ފުރާނަ އަތްމައްޗަށް ލައިގެން އާއިލާއާ ވަކިން ކުރި މަސައްކަތަކީ އަގު ކުރެވޭ ވަރަށްވުރެ މާ މާތި އަދި މާ އަގު ބޮޑު މަސައްކަތެއް ކަމަށެވެ. އަދި މިއުނދަގޫ ހާލަތުގައި އާއިލާތަކާއި ވަކިން ދިވެހި ފުލުހުން ކުރަމުން ގެންދާ މަސައްކަތުގައި ފުލުހުންގެ އާއިލާތަކުން ދިން އެއްބާރުން ވެސް ރައީސް ފާހަގަކުރެއްވިއެވެ.
ކޮވިޑް-19އާ ގުޅިގެން މީހުން ކަރަންޓީން ކުރުމާއި، ކަރަންޓީން ފެސިލިޓީ ބެލެހެއްޓުމާއި، ހުރިހާ ރަށްރަށެއްގެ މޮނިޓަރިންގެ މަސައްކަތްތައް ކުރުމަކީ ބުރަ އަދި ރައްކާތެރި މަސައްކަތެއް ނޫންކަން ފާހަގަކުރައްވައި ރައީސް ސޯލިހު ވިދާޅުވީ ކޮވިޑާއި ގުޅިގެން ކުރެވުނު ހުރިހާ ބާވަތެއްގެ މަސައްކަތުގައި ފުލުހުންގެ ދައުރު ވަރަށް ބޮޑު ކަމަށެވެ.
މި ނުރައްކާތެރި ހާލަތުގައި ދިވެހި ފުލުހުން ޤައުމީ ވާޖިބު ވަރަށް ފުރިހަމައަށް އަދާ ކުރެއްވި ކަމަށް ރައީސް ވިދާޅުވިއެވެ.
