ސްޓެލްކޯގެ ކަރަންޓް ބިލް ދައްކަން ދަތިވާނަމަ ބަހާލައިގެން ދެއްކޭނެ

މާލީ ހާލަތު ހުރިގޮތުން ކަރަންޓު ބިލު ދެއްކުމަށް ދަތިވާ ފަރާތްތަކުން ބަހާލައިގެން ބިލްތައް ދެއްކޭނެކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ބުނެފިއެވެ.

އާދިއްތަ ދުވަހު ސްޓެލްކޯއިން ކުރި ޓްވީޓެއްގައި ބުނީ، ކޮވިޑް-19ގެ ހާލަތާއި ގުޅިގެން މާރިޗު، އެޕްރީލް، މެއި އަދި ޖޫން މަހުގެ ބިލްތައް މާލީ ހާލަތު ހުރިގޮތުން ދެއްކުމަށް ދަތިވެފައިވާ ފަރާތްތަކުން، ބަހާލައިގެން ބިލްތައް ދެއްކުމަށް އެދި ފޯމް ހުށައެޅޭނެ ކަމަށެވެ. އެގޮތުން ބިލު ދެއްކުމަށް އެދޭ ފަރާތްތަކުން ސްޓެލްކޯގެލިންކުމެދުވެރިކޮށް ފޯމް ހުށައެޅުމަށް އެދިފައިވެއެވެ.

އޭގެ އިތުރުން، ބިލުތައް ބަހާލައިގެން ދެއްކުމަށް އެދި ހުށަހަޅާ ފޯމް ކުންފުނީގެ ކައުންޓަރުންވެސް ލިބެން ހުންނާނެ ކަމަށް ސްޓެލްކޯއިން ބުނެއެވެ.

މި ހަތަރު މަހުގެ ބިލުތައް ބަހާލައިގެން ދައްކަން ބޭނުންވާ ފަރާތްތަކުން 5 ޖުލައި 2020ވާ އާދީއްތަ ދުވަހުން ފެށިގެން 19 ޖުލައި 2020ވާ އާދީއްތަ ދުވަހުގެ މެންދުރު 2:00 ގެ ކުރިން އެކަމަށް އެދި ސްޓެލްކޯއަށް ފޯމް ހުށަހެޅުމަށް އެ ކުންފުނިން ބުންޏެވެ. އަދި އެކަމަށް އެދޭ ފޯމް 5 ޖުލައިން ފެށިގެން ސްޓެލްކޯގެ ވެބްސައިޓުން ލިބެން ހުންނާނެ ކަމަށް ވެސް ސްޓެލްކޯއިން ބުނެއެވެ.

ސްޓެލްކޯއިން ވަނީ ކޮވިޑް-19ގެ ހާލަތާއި ގުޅިގެން ޖޫން މަހުގެ ކަރަންޓު ބިލުން 40 އިންސައްތައިގެ ސަބްސިޑީއެއް ދިނުމަށް ނިންމާފައެވެ. މި ސަބްސިޑީ ދިނުމަށް ނިންމާފައިވަނީ، ނިމިދިޔަ މަހުގެ ބިލުތައް އިންތިހާއަށް ބޮޑުވުމާއި ގުޅިގެން އާންމުންގެ ޝަކުވާތައް ބޮޑުވެފައިވާ ދަނޑިވަޅެއްގައެވެ.