އިންޑޮނޭޝިއާ މީހާ މަރުވީ ކޮވިޑް-19 ޖެހިގެންނެއް ނޫން، ކެންސަރު ބަލީގައި
މަރުވެފައިވަނީ އުމުރުން 39 އަހަރުގެ އިންޑޮނޭޝިއާ ރައްޔިތެއް
އެމީހާ މަރުވެފައި ވަނީ އައިޖީއެމްއެޗްގައި ފަރުވާދެމުން ދަނިކޮށް ކަމަށް އެޗްޕީއޭއިން ބުނެފައިވޭ
ބުރާސްފަތި ދުވަހުގެރޭ މަރުވި އިންޑޮނޭޝިއާ މީހާ މަރުވީ ކޮވިޑް-19 ޖެހިގެން ނޫން ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އުމުރުން 39 އަހަރުގެ އިންޑޮނޭޝިއާ ރައްޔިތަކު ކޮވިޑް-19 ޖެހިގެން މަރުވެފައިވާ ކަމަށް އެޗްޕީއޭއިން މީގެ ކުރިން ޓްވީޓު ކުރި ނަމަވެސް، އެޗްޕީއޭއިން ފަހުން ވަނީ އެ ޓުވީޓް ނަގާފައެވެ. އަދި އެ މީހާ މަރުވެފައިވަނީ ކެންސަރު ބަލީގައި ކަމަށް ވެސް އެޗްޕީއޭއިން ބުނެފައިވެއެވެ.
އެޗްޕީއޭއިން ބުނާ ގޮތުގައި އޭނާ މަރުވީ ސްޓޭޖް-4 ކެންސަރު ބަލީގައެވެ.
އެޗްޕީއޭއިން އެހެން ބުނެފައިވާއިރު، ކޮވިޑް-19ށް އިތުރު 18 މީހަކު ޕޮޒިޓިވްވެ 15 މީހަކު ބަލިން ފަސޭހަވެފައިވާ ކަމަށް ވެސް އެޗްޕީއޭއިން ބުނެފައިވެއެވެ. އެގޮތުން ޕޮޒިޓިވްވި 18 މީހުންނާއެކު ރާއްޖޭގައި ކޮވިޑް-19 ޖެހުނު މީހުންގެ އަދަދު ވަނީ 2400ށް އަރާފައެވެ.
