ކޯވިޑް-19އާ ގުޅިގެން އިއުލާން ކޮށްފައިވާ ފުރަބަންދަށް ލުއިދިނުމާ ގުޅިގެން ވޭސްޓު މެނޭޖްމެންޓް ކޯޕަރޭޝަން (ވެމްކޯ)ގެ ސައިޓްތަކުން ހިދުމަތް ފޯރުކޮށްދޭ ވަގުތުތަކަށް ބަދަލު ގެނެސްފިއެވެ.

މިގެނެވުނު ބަދަލާއެކު ވެމްކޯއިން ބުނީ ހޮނިހިރު ދުވަހުން ބުރާސްފަތި ދުވަހުގެ ނިޔަލަށް މާލެ، ވިލިމާލެ، ހުޅުމާލެ، އައްޑޫ ސިޓީ، ފުވައްމުލައް ސިޓީ، ސ. ހުޅުމީދޫ އަދި ރ. ވަންދޫ ހަފުތާއަކު ކޮންމެ ދުވަހަކު ވެސް ޚިދުމަތް ދޭން ފަށާނީ ހެނދުނު 8:00 ގައި ކަމަށެވެ. އަދި ތިލަފުށި ސައިޓުގެ ޚިދުމަތްތައް ފަށާނީ ހެނދުނު 8:30 ގައި ކަމަށް ވެމްކޯއިން ބުނެއެވެ.

ވެމްކޯއިން ބުނީ ޚިދުމަތްތަކާއި ގުޅޭ އިތުރު މައުލޫމާތު ވެމްކޯގެ ކޯލް ސެންޓަރު ނަންބަރު 1666ށް ގުޅުމުން ލިބޭނެ ކަމަށެވެ. އަދި ކޯލް ސެންޓަރު ހުޅުވާފައި ހުންނާނީ ހެނދުނު 9:00ން ހަވީރު 6:00އާ ހަމައަށެވެ.

ޚިދުމަތް ހޯދާ ކަސްޓަމަރުން ނިއު ނޯމަލްއާއެކު ގެނެވުނު ބަދަލުތަކަށް އިތުރު ސަމާލުކަމެއް ދިނުމަށް ވެސް ވެމްކޯއިން ވަނީ އިލްތިމާސް ކޮށްފައެވެ.

ކުނި އުކާލާ ސައިޓުތައް ކުރިއެކޭ އެއްގޮތަށް ހުޅުވާލި ނަމަވެސް، ގޭގެއިން ކުނި ނެގުމުގެ ޚިދުމަތް އަދިވެސް ދެމުން ގެންދާނީ ލޮކްޑައުންގައި ޚިދުމަތް ދިން ގޮތަށެވެ. އޮގަސްޓް އެކެއް ނިޔަލަށް، ކުނި ނަގަމުންދާނީ މާލެ ސަރަހައްދުގައިވާ ހުރިހާ އިމާރާތެއްގެ ތިރިން ކަމަށް ވެމްކޯއިން ބުނެއެވެ.

އެގޮތުން މެންދުރު 12:00 ން 14:00އާ ދެމެދު، ބޭރަށް ކުނި ނެރެފައި ބެހެއްޓުމަށް އެދިފައެވެ. މަގުމަތީގައި ކުނި ބަހައްޓާއިރު މަގުގައި ދުއްވާ އެއްޗެއްސަށާއި ހިނގާ މީހުންނަށް ދަތިނުވާ ގޮތަށް މަގުމަތީގައި އެއްފަރާތެއްގައި ކުނި ބެހެއްޓުމަށް ވެސް ވެމްކޯއިން ވަނީ އިލްތިމާސްކޮށްފައެވެ.