މާވަރުލު އެއާޕޯޓުގެ މަސައްކަތް ނިމުމަކަށް

ގދ. މާވަރުލުގައި ތަރައްގީކުރި މާވަރުލު ޑޮމެސްޓިކް އެއާޕޯޓްގެ ހުރިހާ މަސައްކަތް ނިންމާލައިފިއެވެ.

ގދ. މާވަރުލު އެއާޕޯޓްގެ ދެ ވަނަ ފޭސް ތަރައްގީކޮށް ނިންމާލީ ޖޫން މަހުގެ 30 ވަނަ ދުވަހުއެވެ. އެ ޕްރޮޖެކްޓުގެ ދަށުން ފަސެންޖަރ ޓާމިނަލް އަކާއި، މުވައްޒަފުންގެ ކުއާޓާއަކާާއި، ޕަވަރ ހައުސްއެއްގެ އިތުރުން ރެސްޓޯރެންޓެއް ވަނީ އަޅާފައެވެ.

އެ ޕްރޮޖެކްޓުގެ މަސައްކަތް ކުރަން ޓްރާންސްޕޯޓް މިނިސްޓްރީން އެމްޓީސީސީއާ ހަވާލުކޮށްފައިވަނީ މިދިޔަ އަހަރުގެ ޖުލައި މަހުގެ 25 ވަނަ ދުވަހުއެވެ. ސަރުކާރުން 12.1 މިލިއަން ރުފިޔާ ހަރަދުކުރި ޕްރޮޖެކްޓް ނިންމާލާފައިވަނީ މިދިޔަ އަހަރުގެ އޮގަސްޓު މަހުގެ ފަހެއްގައެވެ.

ދެވަނަ ފިޔަވަހީގެ ދަށުން އެމްޓީސީސީން ވަނީ އެއާޕޯޓުގެ ރަންވޭއާއި، ޓެކްސީވޭގެ އިތުރުން އޭޕްރޯންގެ މަސައްކަތް މިދިޔަ އަހަރުގެ ޖުލައި މަހުގެ 31 ގައި ނިންމާފައެވެ.

މާވަރުލު އެއާޕޯޓުގެ ރަންވޭ އަކީ 1200 މީޓަރު ދިގު އަދި 20 މީޓަރު ފުޅާ ރަންވޭއެކެވެ. މި ޕްރޮޖެކްޓަށް ސަރުކާރުން ވަނީ 57.04 މިލިއަން ރުފިޔާގެ ހަރަދުކޮށްފައެވެ. ޕްރޮޖެކްޓް އެމްޓީސީސީއާ ހަވާލުކުރީ 15 މާޗްގައެވެ. މަސައްކަތް ނިންމާއި އޭޕްރީލް މަހުގެ 18 ގައެވެ.

މާވަރުލު އެއާޕޯޓުގެ މަސައްކަތް ނިންމަވައި ދެއްވާނެ ކަމަށް ރިޔާސީ އިންތިހާބުގެ ކެމްޕޭނުގެ ދުވަސްވަރު ރައީސް ސޯލިހު ވަނީ ވިދާޅުވެފައެވެ. މާވަރުލުގައި އެއާޕޯޓެއް ތަރައްގީ ކުރުމުގެ މަޝްރޫއަކީ ގައްދޫ ދާއިރާގެ ކުރީގެ މެމްބަރު ޒާހިރު އާދަމް (ގައްދޫ ޒާހިރު)އާ ހަވާލުކުރި މަޝްރޫއުއެކެވެ. ނަމަވެސް ކުރީ ސަރުކާރުން ވަނީ އެ އެއްބަސްވުން ބާތިލްކޮށްފައެވެ.