ނަޒާހަތްތެރިކަން ދެމެހެއްޓުމަށްޓަކައި ކިތައްމެ މަސައްކަތްތަކެއް ކުރި ނަމަވެސް، ވައްކަން ކުރާ ބަޔަކު އެކަން ކުރާނެ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ސަރުކާރުގެ ވަޒީރުންނާއި ރައްޔިތުންގެ މަޖިލީހުގެ މެމްބަރުންގެ ކިބައިގައި ނަޒާހާތްތެރިކަން ހިފަހައްޓާދޭ ބަޔަކީ ރައްޔިތުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ ރައީސް މިހެން ވިދާޅުވީ އާއްމު ކޮމެޓީގެ ރިޕޯޓާއި ގުޅިގެން ވާހަކަދައްކަވަމުންނެވެ.
އާއްމު ކޮމެޓީގެ ރިޕޯޓުގައި ވާގޮތުން ގަވާއިދުގެ 68 ވަނަ މާއްދާގެ (ހ) ގައި މަޖިލީހުގެ މެމްބަރުންގެ މުދަލާއި ފައިސާގެ ބަޔާން ނުވަތަ މާލީ ބަޔާން، އަނބިން އަދި ފިރިން އަދި 18 އަހަރު ނުފުރޭ ދަރިންވެސް ހިމެނޭގޮތަށް ތައްޔާރުކޮށް ކޮންމެ މީލާދީ އަހަރެއްގެ އޮގަސްޓް މަހުގެ 31 ވަނަ ދުވަހުގެ ކުރިން އަމީން އާންމަށް ހުށަހަޅަން ވާނެއެވެ. އަދި އެ މާއްދާގެ (ރ) އަށް ކޮމިޓީން ގެނައި ބަދަލަކީ 68 ވަނަ މާއްދާގެ (ހ) ގެ ދަށުން ހުށަހަޅާ މެމްބަރުންގެ މުދަލާއި ފައިސާގެ ބަޔާން ނުވަތަ މާލީ ބަޔާން، އަނބިން/ފިރިން އަދި 18 އަހަރު ނުފުރޭ ދަރިންގެ މާލީ ބަޔާން ނުހިމެނޭ ގޮތުން ރައްޔިތުންގެ މަޖިލީހުގެ ވެބްސައިޓްގައި ޝާއިއުކުރަންވާނެ ކަމަށެވެ.
މިކަމާއި ގުޅިގެން ވާހަކަދައްކަވަމުން އެމަނިކުފާނު ވިދާޅުވީ ނަޒާހަތްތެރިކަން ދެމެހެއްޓުމަށްޓަކައި ކިތައްމެ މަސައްކަތްތަކެއް ކުރި ނަމަވެސް، ވައްކަން ކުރާ ބަޔަކު އެކަން ކުރާނެ ކަމަށެވެ.
މަޖިލީހުގެ ގަވާއިދަށް މިގެނެވޭ ބަދަލުގެ މުހިއްމުކަން ފާހަގަކުރައްވާ ރައީސް ނަޝީދު ވިދާޅުވީ ސަރުކާރުގެ ވަޒީރުންނާއި ރައްޔިތުންގެ މަޖިލީހުގެ މެމްބަރުންގެ ކިބައިގައި ނަޒާހާތްތެރިކަން ހިފަހައްޓާދޭ ބަޔަކީ ރައްޔިތުން ކަމަށެވެ. އަދި މެމްބަރުން އިންތިހާބުވެވަޑައިގަންނަވަނީ ރައްޔިތުންގެ ވޯޓުން ކަމަށާއި ރައްޔިތުންނަށް އެ މައުލޫމާތުތައް އެނގެން ޖެހޭ ކަމަށެވެ.
އެމަނިކުފާނު ވިދާޅުވީ ތަރައްގީއަށް އެޅޭ ކޮންމެ ހުރަހަކީ ކޮރަޕްޝަން ކަމަށެވެ. އެގޮތުން، އެމްއެމްޕީއާރުސީގެ ޚިޔަނާތުގެ މައްސަލަ ފާހަގަ ކުރައްވާ އެ މަނިކުފާނު ވިދާޅުވީ އެ މައްސަލައިގައި ގެއްލުނު ފައިސާއަށް ވުރެ ދިވެހިރާއްޖޭގެ އިގްތިސާދަށް ގެއްލުނު އިތުބާރު މާ ބޮޑު ކަމަށެވެ.
