ސްރީ ލަންކާ ރައްޔިތުންނެކޭ އެއް އަގެއްގައި ދިވެހިންނަށް އެގައުމުން ގެދޮރު ގަތުމުގެ ފުރުސަތު ހުޅުވިފައި ވާ ކަމަށް މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ހޯމަ ދުވަހު ހޮޓެލް ޖެންގައި ސްރީ ލަންކާގެ ރިސާރޗް އިންޓެލިޖެންސް ޔުނިޓް (އާރު އައި ޔޫ) އިން އިންތިޒާމްކޮށްގެން ބޭއްވި އެގްޒިބިޓަރ ފޯރަމް ޝަރަފްވެރި ކޮށްދެއްވާ ވާހަކަ ދައްކަވަމުން މިނިސްޓަރ އަސްލަމް ވިދާޅުވީ މީގެ ކުރިން ލަންކާގެ ރައްޔިތުން ނޫން މީހުންނަށް އެ ގައުމުން ގެދޮރު ގަނެވެނީ އެ ގައުމުގެ ފްލެޓްތައް ނުވަތަ އެޕާރޓްމެންޓްތަކުގެ ފަސްވަނަ ފްލޯއިން ފެށިގެން މަތީގެ ފްލޯތައް ކަމަށެވެ.

ނަމަވެސް ދާދި ފަހުން އެގައުމުގެ ގާނޫނަށް ގެނައި ބަދަލާ އެކު ކޮލަމްބޯގެ ރައްޔިތުން ފިޔަވައި އެހެނިހެން ގައުމުތަކުގެ މީހުންނަށް ވެސް އެޕާރޓްމެންޓްތަކާއި ފްލެޓްތަކުގެ ކޮންމެ ފޮލޯއެއް ވެސް، އެ ގައުމުގެ ރައްޔިތުންނަށް ވެސް ލިބޭ އަގުގައި އިތުރު ޓެކްހަކާއި ނުލައި ގަތުމުގެ ފުރުސަތު މިހާރު އެ ގައުމުން ހުޅުވާލާފައި ވާކަމަށެވެ.

"ސްރީ ލަންކާއަކީ ގިނަ އަދަދަކަށް ދިވެހިން ދިރިއުޅެމުންދާ ގައުމެއް. ކިޔެވުމަށާއި ބޭސްފަރުވާގެ އެކި ކަންކަމުގައި. އެހެން ކަމުން އެގައުމުން މި ހުޅުވާލަދިން ފުރުސަތުގެ ސަބަބަބުން ދިވެހިންނަށާއި އަދި އެހެނިހެން ގައުމުތަކުގެ ރައްޔިތުންނަށް އެ ގައުމުން ހެޔޮ އަގުގައި ގެދޮރު ގަތުމުގެ މަގުފަހިވެގެންދާނެ،" އަސްލަމް ވިދާޅުވިއެވެ.

މީގެ އިތުރުން ވެސް ރަހުމަތްތެރިކަމާއި އެކުވެރިކަމާ އެކު ދިވެހި ރާއްޖޭގައި ސްރީލަންކާގެ އިންވެސްޓަރުން އިންވެސްޓްކޮށް އަދި ރާއްޖޭގައި މާކެޓް ކުރުމަކީ ދިވެހި ސަރުކާރުން އެކަމަށް އެއްބަސްވެ މަރުހަބާ ކިޔާނެ ކަމެއް ކަމަށް އަސްލަމް ވިދާޅުވިއެވެ.

ހަމަ އެފަދައިން ލަންކާގެ ރައްޔިތުންނަށް ދިވެހި ރާއްޖޭގައި އުޅުމަށް އެއްވެސް ބިރެއް ނެތް ކަމަށާއި ހަމަ އެފަދައިން ދިވެހިންނަށް ވެސް ލަންކާއަށް ގޮސް އެތަނުގައި ދިރިއުޅުމަށް ބިރެއް ނެތް ކަމަށް ވެސް އޭނާ ވިދާޅުވިއެވެ.  

"ފަހަރެއްގައި ބައެއް އާއިލާތަކަށް ކުއްޔަށް ދައްކާ އަދަދު މޯގޭޖެއްގެ ގޮތުގައި ލޯނެއް ނަގާ، ލޯނު ރީޕޭ ކުރަން އެ އަދަދު ދައްކާ ކަމަށް ވަންޏާ އަމިއްލަ ޕްރޮޕަޓީއަކާ އެކު ލަންކާގައި ދިރިއުޅުމުގެ ފުރުސަތު އޮތްކަން އަޅުގަނޑަށް މިއަދު އެނގިގެން ދިޔައީ،" އަސްލަމް ވިދާޅުވިއެވެ.  

ބޭސް ފަރުވާ އަށާއި ކިޔެވުމަށާއި އަދި އެހެނިހެން ބޭނުންތަކުގައި 13000 ދިވެހިން ކޮލަމްބޯގައި ދިރިއުޅޭއިރު ލަންކާއަކީ ސަގާފީ ގޮތުން ވެސް ރާއްޖެއާ އެއްގޮތް ސިފަތަކެއް ލިބިގެންވާ ގައުމެކެވެ. އެގައުމުގައި ދިރިއުޅޭ ކޮންމެ ދިވެއްސަކު އެންމެ މަދުވެގެން  މަހަކު 300 ޑޮލަރު ޚަރަދު ކުރާއިރު އަހަރަކު 3.9 މިލިއަން ޑޮލަރު އެގައުމަށް ޚަރަދު ކުރާނެއެވެ.