ޕީޖީ ވަކި ކުރުމުގެ ބާރު އަޅުގަނޑަކަށް ނޯވޭ، އެކަން އޮންނަނީ މަޖިލީހަށް: ރައީސް
19 ސެޕްޓެމްބަރު 2019 | ބުރާސްފަތި 16:22ބިޝާމް ޕީޖީގެ މަގާމަށް އައްޔަންކުރީ 2015 ވަނަ އަހަރުގެ ނޮވެމްބަރު މަހުގެ 24 ވަނަ ދުވަހު
ޕްރޮސިކިއުޓާ ޖެނަރަލް (ޕީޖީ) އައިޝަތު ބިޝާމް
ޕްރޮސިކިއުޓާ ޖެނަރަލް (ޕީޖީ) އައިޝަތު ބިޝާމް ވަކި ކުރުމުގައި އެމަނިކުފާނުގެ އެއްވެސް ދައުރެއް ނޯންނަ ކަމަށާއި އެކަމުގެ ބާރު ގާނޫނުން ލިބިދީފައިވަނީ ރައްޔިތުންގެ މަޖިލީހަށް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ ޕީޖީ އައްޔަން ކުރެއްވުމުގައި އެމަނިކުފާނުގެ ދައުރު އޮތް ކަމުގައި ވިޔަސް ވަކި ކުރުމުގެ ބާރު އޮންނަނީ ރައްޔިތުންގެ މަޖިލީހަށް ކަމަށެވެ. އަދި އެކަމުގައި އެމަނިކުފާނުގެ ދައުރެއް ނެތް ކަމަށް ވިދާޅުވިއެވެ.
ބިޝާމް ޕީޖީގެ މަގާމަށް އައްޔަންކުރީ 2015 ވަނަ އަހަރުގެ ނޮވެމްބަރު މަހުގެ 24 ވަނަ ދުވަހުއެވެ.
ރައްޔިތުންގެ މަޖިލީހުގެ މިދިޔަ ދައުރު ނިމެން އުޅެނިކޮށް، މި ސަރުކާރު ވެރިކަމަށް އައިތަނާ ބިޝާމްގެ އިތުބާރު ނެތް ކަމުގެ މައްސަލަ ހުށައެޅިއެވެ. ނަމަވެސް ފަހުން އެ މައްސަލަ ވަނީ ނަގާފައެވެ.
ރައްޔިތުންގެ މަޖިލީހުގެ މިދައުރުގައި ވެސް މަޖިލީހުގެ މެމްބަރުން ބިޝާމްގެ އިތުބާރު ނެތް ކަމަށް ވިދާޅުވެ، ފާޑުކިޔުންތައް އަމާޒު ކޮށްފައިވެއެވެ.
ޖުޑީޝަރީ ކޮމިޓީއަށް ޖުލައި މަހުގެ ތެރޭގައި ބިޝާމް ހާޒިރުކޮށް މެމްބަރުން ވަނީ ސުވާލު ކުރައްވާފައެވެ. ބިޝާމް އިތުރުފުޅު ހެއްދެވިކަން ހާމަވެފައިވާ ކަމަށް މެމްބަރުން ވިދާޅުވެފައިވާއިރު މަރާލާފައިވާ ނޫސްވެރިޔާ އަހުމަދު ރިލްވާންގެ މައްސަލައާއި ރައީސް އޮފީހަށް ވަޑައިގަންނަވާ މައްސަލައާއި ގުޅޭގޮތުން ޖުޑީޝަރީ ކޮމިޓީއަށް ބިޝާމް އިތުރުފުޅު ހައްދަވާފައިވާ ކަމަށް ފޮނަދޫ ދާއިރާގެ މެމްބަރު މޫސާ ސިރާޖު ވަނީ ވިދާޅުވެފައެވެ.
