މޯލްޑިވިއަނުން ކުޅުދުއްފުށްޓާއި އައްޑޫއާ ދެމެދު ސީދާ ދަތުރުތައް ފަށަނީ

މޯލްޑިވިއަނުން ކުޅުދުއްފުށްޓާއި އައްޑޫއާ ދެމެދު ސީދާ ދަތުރުތައް ފަށަން ތައްޔާރުވެއްޖެއެވެ.

މޯލްޑިވިއަނުން ބުނީ ކުޅުދުއްފުށްޓާއި އައްޑޫއާ ދެމެދު ހަފްތާއަކު ދެ ދަތުރު ކުރާ ގޮތަށް ޝެޑިއުލް ކޮށްފައިވާ ކަމަށާއި މި ދަތުރުގެ ޓިކެޓްގެ އަގަކީ ކޮޅަކަށް 1444 ރުފިޔާ ކަމަށެވެ. އަދި ދަތުރުކުރުމަށް ހަމަޖެހިފައިވަނީ ހަފުތާގެ ބުރާސްފަތި ދުވަހު ކުޅުދުއްފުށި ސިޓީން އައްޑޫ ސިޓީ ގަމަށް، އަދި ހޮނިހިރު ދުވަހު އައްޑޫސިޓީ ގަމުން ކުޅުދުއްފުށި ސިޓީއަށް ކަމަށް ވެސް މޯލްޑިވިއަނުން ބުންޏެވެ.

މި ދަތުރުގައި ބޯޓަށް ތެޔޮ އަޅަން ވެލާނާ އިންޓަރނޭޝަނަލް އެއަރޕޯޓްގައި ވިއްސަކަށް މިނެޓް ޓްރާންސިޓް ކުރާނެކަން ފާހަގަކޮށް މޯލްޑިވިއަނުން ބުނީ ފަސިންޖަރުން ބޯޓުގައި މަޑުކުރާނެ ކަމަށެވެ.

މިއީ އިކޮނޮމިކް މިނިސްޓްރީގެ އިސް ނެންގެވުމުގެ މަތިން މި ދެ ސަރަހައްދުގައި އިޤްތިޞާދީ ހަރަކާތްތަކެއް ހިންގޭނެ މަގު ފަހިކުރުމުގެ ގޮތުން ޝެޑިއުލްކުރާ ދަތުރުތަކެއް ކަމަށް މޯލްޑިވިއަނުން ހާމަކުރެއެވެ.

މާރޗު މަހު ޓެސްޓް ފްލައިޓް ޖެއްސި މާވަރުލަށް ވެސް މޯލްޑިވިއަންގެ ޝެޑިއުލް ދަތުރުތައް ވަނީ ހަމަޖައްސާފައެވެ.

ކޯވިޑް19އާ ގުޅިގެން އެތެރޭގެ އުދުހުންތައް މެދުކަނޑާލާފައި އޮތުމަށްފަހު އަލުން ފަށާއިރު އެތެރޭގެ އެއް އެއަރޕޯޓުން އަނެއް އެއަރޕޯޓަށް ވެސް ދަތުރުތައް ވަނީ ޝެޑިއުލް ކޮށްފައިވެއެވެ. އެގޮތުން ދަރަވަންދޫން ހަނިމާދޫއަށް، ތިމަރަފުށިން ކައްދޫއަށް ވެސް ވަނީ މޯލްޑިވިއަންގެ ދަތުރުތައް ޝެޑިއުލް ކޮށްފައެވެ.