އިނގިރޭސި ޕްރިމިއާ ލީގުގައި އާދީއްތަ ދުވަހު ސައުތެމްޓަނާ ދެކޮޅަށް ކުޅުނު މެޗަށް ވަޓްފޯޑުން އެކުލަވާލި ސްކޮޑުން ތިން ކުޅުންތެރިއަކު ބާކީކުރި ކަމަށް އެ ކްލަބުން ބުނެފިއެވެ.

އާދީއްތަ ދުވަހުގެރޭ އަމިއްލަ ދަނޑުގައި ކުޅުނު މެޗުން ވަޓްފޯޑް ބަލިވީ ސައުތެމްޓަން އަތުން 3-1 ންނެވެ. މި މެޗުގައި ސައުތެމްޓަންގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި ޑެނީ އިންގްސް އާއި ޖޭމްސް ވާޑް-ޕްރައުސްއެވެ. މެޗުގައި ވަޓްފޯޑުން ކާމިޔާބުކުރި ހަމައެކަނި ލަނޑަކީ ސައުތެމްޓަންގެ ޖޭން ބެޑްނަރެކް އަތުން ބައިކޮޅަށް ވަން ލަނޑެކެވެ.

މި މެޗަށް ވަޓްފޯޑުން އެކުލަވާނި 20 ކުޅުންތެރިންގެ ސްކޮޑުން އެޓީމުގެ ތިން ކުޅުންތެރިއަކު ބާކީކުރިކަން އެ ކްލަބުން ވަނީ ހާމަކޮށްފައެވެ. ސްކޮޑުން އެ ކުޅުންތެރިން ބާކީކުރީ ކޮރޯނާވައިރަސް (ކޮވިޑް-19) ން ރައްކާތެރިވުމަށް އަޅާފައިވާ ފިޔަވަޅުތަކާ ޚިލާފުވުމުންނެވެ. އެ ތިން ކުޅުންތެރިންނަކީ ފޯވާޑް އަންދްރޭ ގްރޭ އާއި މިޑްފީލްޑަރު ނަތަނިއެލް ޗަލޯބާ އަދި މިޑްފީލްޑަރު ޑޮމިންގޯސް ކުއިނާއެވެ.

ރިޕޯޓުތައް ބުނާ ގޮތުން މި ތިން ކުޅުންތެރިންގެ ތެރެއިން ގްރޭ ވަނީ މިދިހަ ހުކުރު ދުވަހު އޭނާގެ 29 ވަނަ އުފަންދުވަސް ފާހަގަކުރުމަށް ގިނަ ބަޔަކާއެކު ޕާޓީއެއް ބާއްވާފައެވެ. އަދި މި ޕާޓީގައި ކުއިނާ އާއި ޗަލޯބާވެސް ބައިވެރިވި ކަމަށް ވަނީ ރިޕޯޓުކޮށްފައެވެ.

ވަޓްފޯޑުން ނެރުނު ބަޔާނެއްގައި ވަނީ ގަވާއިދުތަކާ ޚީލާފަށް އަމަލު އެ ޓީމުގެ ކުޅުންތެރިންގެ މައްސަލަ އިތުރަށް ބަލަމުންދާ ކަމަށް ބުނެފައެވެ.

ޕްރިމިއާ ލީގު އަލުން ފަށައިގެން ކުރިއަށްދާއިރު، މީގެ ކުރިންވެސް ޕްރިމިއާ ލީގުގެ ގިނަ ކްލަބުތަކެއް ކުޅުންތެރިން ވަނީ ކަނޑައަޅާފައިވާ ގަވާއިދުތަކާ ޚިލާފުވެފައެވެ. އަދި އެ މައްސަލަތަކާ ގުޅިގެން ބައެއް ކްލަބުތަކުން ވަނީ ކުޅުންތެރިންނަށް އަދަބުވެސް ދީފައެވެ.