ދޮޅު އަހަރަށް ފަހު އެމްއޭސީއެލްގެ ސީއީއޯ އަދި އެމްޑީގެ މަގާމަށް މީހަކު ހަމަޖައްސައިފި
މަގާމާއި ހަވާލުވެވަޑައިގަންނަވާނީ ޖުލައި މަހު
އެމްއޭސީއެލުން މުވައްޒަފުންތަކެއް
މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) ގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރގެ މަގާމަށް އިނގިރޭސި ވިލާތުގެ ރައްޔިތެއް ކަމަށްވާ ގޯޑަން އެންޑްރޫ ސްޓުއަރޓް އައްޔަނު ކުރައްވައިފިއެވެ.
އެ ކުންފުނިން ނެރުނު ސާކިއުލާއެއް ގައި ބުނީ، ގޯޑަން އަކީ ޔޫރަޕް، މެދުއިރުމަތި، އުތުރު އެފްރިކާ، އޭޝިޔާ އަދި އުތުރު އެމެރިކާގައި އޭވިއޭޝަން އެންޑް ޓްރާންސްޕޮޓޭޝަން އިންޑަސްޓްރީގައި 30 އަހަރުގެ ތަޖުރިބާ ލިބިވަޑައިގެން ހުންނެވި ބޭފުޅެއް ކަމަށެވެ.
އޭގެ ތެރެއިން 20 އަހަރަށް ވުރެ ގިނަ ދުވަސް އޭނާ ހޭދަކުރައްވާފައި ވަނީ އެގްޒެކެޓިވް އަދި ބޯޑު ފެންވަރުގެ މަގާމު ތަކުގައި ކަމަށް އެމްއޭސީއެލްއިން ބުންޏެވެ. އެމްއޭސީއެލްގެ ބޯޑާއި ގޯޑަން ގުޅިވަޑައިގަންނަވާނީ ޖުލައި މަހު އިންޓަނޭޝަނަލް ބޯޑަރު ހުޅުވުމަށްފަހުއެވެ.
އެމްއޭސީއެލްގެ އެމްޑީގެ މަގާމަށް ބޭފުޅަކު އައްޔަން ކުރައްވާފައިމިވަނީ ކުރީ ސަރުކާރުގައި އެ މަގާމުގައި ހުންނެވި އާދިލް މޫސާ އިސްތިއުފާ ދެއްވިތަ ދޮޅު އަަހަރެއްހާ ދުވަސް ފަހުންނެވެ. އެމްއޭސީއެލްގެ އެމްޑީކަމުގެ މަގާމުން އާދިލް އިސްތިއުފާ ދެއްވާފައިވަނީ 2018 ވަނަ އަހަރުގެ ނޮވެމްބަރު މަހުއެވެ. އޭގެ ފަހުން ވަގުތީ ގޮތުން އެމްއޭސީއެލް ބެލެހެއްޓުމާ ހަވާލުވެ، އެކްޓިންގ އެމްޑީގެ މަގާމު އަދާކުރައްވަމުން އައީ މުސާ ސޯލިހުއެވެ.
