ސްޕެނިޝް ލީގުގެ ފުލުގައި އޮތް އެސްޕަންޔޯލްގެ ކޯޗުގެ މަގާމުން އަބެލާޑޯ ފެނާންޑޭޒް ވަކިކޮށްފިއެވެ.

މިދިޔަ އަހަރުގެ ޑިސެމްބަރު މަހު އެސްޕަންޔޯލްއާ ހަވާލުވި އަބެލާޑޯގެ އިރުޝާދުގެ ދަށުން އެޓީމަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން ލީގުގެ ފުލުގައި އެޓީމު އޮތީ 31 މެޗުން 24 ޕޮއިންޓާއެކުއެވެ. ލީގުގައި ބާކީ ހަތް މެޗު އެސްޕަންޔޯލަށް އޮތްއިރު، ރެލިގޭޝަން ޒޯނުން ސަލާމަތްވުމަށް އެޓީމަށް މަދުވެގެން އަށް ޕޮއިންޓު ބޭނުންވެއެވެ.

އަބެލާޑޯގެ އިރުޝާދުގެ ދަށުން އެސްޕަންޔޯލުން މިހާތަނަށް 17 މެޗެއް ކުޅެފައިވާއިރު، ހަތް މެޗުން އެޓީމު ވަނީ ބަލިވެފައެވެ. އަދި ފަސް މެޗުން އެޓީމު މޮޅުވެފައިވާއިރު، އަނެއް ފަސް މެޗު ނިމުނީ އެއްވަރުވެގެންނެވެ.

އެސްޕަންޔޯލްގެ ކޯޗުގެ މަގާމުން އުމުރުން 50 އަހަރުގެ އަބެލާޑޯ ވަކިކުރުމާއެކު، މި ސީޒަނުގެ ބާކީ އޮތް ބައިގައި އެޓީމަށް އިރުޝާދުދޭނީ ސްޕޯޓިންގ ޑިރެކްޓަރު ހުއާކިން ޕެރޭޒް ރުފެތޭއެވެ.

އަލެބާޑޯ އަކީ ކޮރޯނާވައިރަސް (ކޮވިޑް-19) ށްފަހު ސްޕެނިޝް ލީގު އަލުން ފެށި ފަހުން، އެ ލީގުގެ ކްލަބަކުން ވަކިކުރި ދެވަނަ ކޯޗެވެ. މީގެ ކުރިން ރެއާލް ބެޓިސްއިން ވަނީ އެޓީމުގެ ކޯޗުގެ މަގާމުން ޖޮއާން ފްރާންސެސް (ރުބީ) ވަކިކޮށްފައެވެ.

އެސްޕަންޔޯލްގެ ކޯޗުގެ މަގާމުން އަބެލާޑޯ ވަކިކުރިއިރު، ލީގުގައި އާދީއްތަ ދުވަހުގެރޭ އެޓީމުން ވަރުގަދަ ރެއާލް މެޑްރިޑާ ދެކޮޅަށް ނުކުންނާނެއެވެ. މި މެޗު ފަށާނީ ރާއްޖެ ގަޑިން ދަންވަރު 1:00 ގައެވެ.