ފޫޓްބޯލް އެސޯސިއޭޗަން އޮފް މޯލްޑިވްސް (އެފްއޭއެމް) ގެ އެގްޒެކެޓިވް ކޮމިޓީ (އެކްސްކޯ) ގެ ތިން މެމްބަރަކު މަގާމުން ވަކިކޮށްފިއެވެ.

އެފްއޭއެމް އިން އާދީއްތަ ދުވަހު މީޑިއާ ތަކާއި ހިއްސާކުރި ބަޔާނެއްގައި ބުނެފައިވަނީ، ވިދިވިދިގެން އެކްސްކޯގެ 6 ބައްދަލުވުމަށް ހާސިރުވެފައި ނުވާތީ، އެއިދާރާގެ އެކްސްކޯގެ މެމްބަރުން ކަމަށްވާ، ހުސައިން ޝަހުދީ އާއި، އަލީ ޝާހް އާއި، އަބްދުﷲ އަހުމަދު، އެކްސްކޯގައި ފުރުއްވަމުން ގެންދަވާ މަގާމުން ވަކިކުރެވިފައި ވާކަމަށެވެ.

އެފްއޭމްއިން ބުނެފައިވަނީ، އެއިދާރާގެ ހިންގާ ގަވާއިދުގެ އާރޓިކަލް (ށ) ގެ (33) ވަނަ ވާއްދާގެ (9) ވަނަ ނަމްބަރަށް ރިއާޔަތްކޮށް އެކްސްކޯ މެމްބަރެއްގެ މަގާމު ހުސްވުމަށް ކަނޑައަޅާފައިވާ ހާލަތްތަކުގެ ތެރެއިން، ހުސައިން ޝަހުދީ އާއި، އަލީ ޝާހް އާއި، އަބްދުﷲ އަހުމަދު، ވިދިވިދިގެން އެކްސްކޯގެ 6 ބައްދަލުވުމަށް ހާޒިރުވެފައި ނުވާތީ، އެހާލަތަކީ އިސްވެ ދެންނެވެވުނު މާއްދާގެ ދަށުން މަގާމު ހުސްވުމަށް މެދުވެރިވާ ހާލަތެއްކަމުން، 23 ޖުލައި 2017 ވަނަ ދުވަހުން ފެށިގެން މި 3 މެމްބަރުން އެކްސްކޯގައި ފުރުއްވަމުން ގެންދަވާ މަގާމުން ވަކިކުރެވިފައިވާ ކަމަށެވެ.

އަދި ހުސްވެފައިވާ މަގާމުތަކުން އެކްސްކޯގެ މެމްބަރުކަމަށް އަލްފާޟިލް އަލީ އުމަރު އައްޔަންކުރުމަށް، 22 ޖުލައި 2017 ވަނަ ދުވަހު ބޭއްވުނު އެކްސްކޯގެ ބައްދަލުވުމުގައި ފުރިހަމަ އަގުލަބިއްޔަތުން ފާސްކުރެވިފައިވާ ކަމަށްވެސް އެއިދާރާއިން ވަނީ ބުނެފައެވެ.

މީގެ އިތުރަށްވެސް އެއިދާރާއިން ބުނެފައިވަނި، އެއިދާރާއަށް ދިމާވެފައިވާ މައްސަލަތަށް ހައްލު ކުރުމަށާއި، ފުޓުބޯޅަ ކުރިއެރުވުމަށް އެއިދާރާއިން ގިނަ މަސައްކަތްތަކެއް ކުރަމުންދާ ކަމަށާއި، އަސާސީ ގަވާއިދުގެ މަތީން އެކްސްކޯގެ މެމްބަރުންނަށް މަސްއޫލިއްޔަތުތަކެއް ހަވާލުކުރެވިފައިވާ ކަމަށެވެ. އަދި މެމްބަރުންނަށް ހަވާލުކުރެވިފައިވާ މަސްއޫލިއްޔަތުތަށް އަސާސީ ގަވާއިދާ އެއްގޮތަށް ޕްރޮފެޝަނަލް ކަމާއި އެކު އަދާކުރުމަށް ނަސޭހަތްތެރި ވެފައިވާ ކަމަށާއި، ނަމަވެސް އިސްވެ ދެންނެވުނު 3 މެމްބަރުންންގެ ފަރާތްޕުޅުން އެންމެ ފުރިހަމަ އެއްބާރުލުން ލިބެމުން ނުދާކަށް އެއިދާރާއިން ވަނީ ފާހަގަކޮށްފައެވެ.