ސަފާރީ ރޭޕް ކޭސް: ޖެންޑަރ ކޮމިޓީން ހޯމަ ދުވަހު މައްސަލަ ދިރާސާ ކުރަނީ
މައްސަލަ ދިރާސާ ކުރުމަށް އެޖެންޑާ ކޮށްފައިވަނީ ހޯމަ ދުވަހުގެ މެންދުރުފަހު 14:00 ށް
ހުޅުމާލޭގެ ފަޅުތެރޭގައި ސަފާރީތައް އަޅާފައި: ހަފުތާ ބަންދުގައި ގިނަ ބަޔަކު ސަފާރީތަކަށް ދާ ކަމަށްވޭ
ހުޅުމާލެ ކައިރީ އަޅާފައި އޮތް ސަފާރީއަކަށް ދިޔަ ބިދޭސީ އަންހެނަކަށް ޖިންސީ ގޯނާކުރި މައްސަލަ ދިރާސާ ކުރުމަށް ހޯމަ ދުވަހުގެ ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި އެޖެންޑާ ކޮށްފިއެވެ.
މި މައްސަލަ ދިރާސާ ކުރުމަށް އެޖެންޑާ ކޮށްފައިވަނީ ހޯމަ ދުވަހުގެ މެންދުރުފަހު 14:00 ށެވެ.
އެކަމާ ގުޅޭގޮތުން ކޮމިޓީގައި ހިމެނިވަޑައިގަންނަވާ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ކުރެއްވި ޓްވީޓެއްގައި ވިދާޅުވީ، މި މައްސަލައިގެ ކޮމިޓީގެ ޗެއާކަން ކުރައްވާނީ ކޮމިޓީގެ ނައިބު މުޤައްރިރު އަދި ވައިކަރަދޫ ދާއިރާގެ މެމްބަރު ހުސައިން ޒިޔާދު ކަމަށެވެ. އަދި މި މައްސަލަ ގާތުން ބައްލަވާނެ ކަމުގެ ޔަޤީންކަން މެމްބަރު ރޮޒެއިނާ ވަނީ ދެއްވާފައެވެ.
މި މައްސަލައިގެ ތުހުމަތުގައި ކުށުގެ ވެށިން 39 އަހަރުގެ ދިވެހި ދެ ފިރިހެނުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން އޭރު ބުނެފައިވެއެވެ. އެކަމަކު މި މައްސަލައިގައި ތުހުމަތު ކުރެވޭ މީހުންގެ މައްޗަށް ހެކި ނެތް ކަމަށް ބުނެ، އެ މީހުން ދޫކޮށްލުމާއި ގުޅިގެން ފުލުހުންނާއި، ކަމާބެހޭ އިދާރާތަކަށް އެތައް ސުވާލުތަކެއް ކުރިމަތިވަމުންދެއެވެ.
އެކަމާ ގުޅޭގޮތުން ފުލުހުންގެ މީޑިއާއިން ބުނީ، އެމީހުން ދޫކޮށްލާފައިވަނީ ތަހުގީގަށް ހައްޔަރުކޮށްފައި ބެހެއްޓޭނެ އެކަށީގެންވާ ސަބަބެއް ނެތުމުން ކަމަށެވެ.
އޭގެ އިތުރުން، ހިއުމަން ރައިޓްސް ކޮމިޝަން (އެޗްއާރްސީއެމް)ންވެސް ވަނީ އެ މައްސަލަ ބަލަމުންދާ ކަމަށް ބުނެފައެވެ.
