ދިވެހިރާއްޖޭގައި މަޝްހޫރު މޯބައިލް ގޭމްތަކެއް ކަމުގައިވާ ފޯޓް ނައިޓް އަދި ޕަބްޖީ ފަދަ ގޭމްތައް ދަރިން ކުޅޭނަމަ ބެލެނިވެރިން އެކަމަށް ސަމާލުވާން ޖެހޭކަމަށް މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީން ބުނެފިއެވެ.
ބުރާސްފަތި ދުވަހު މިނިސްޓްރީން ނެރުނު ބަޔާނެއްގައި ބުނީ، ފުރަބަންދުގައި ގޭގައި މަޑުކުރަން ޖެހުމާއެކު، އިންޓަނެޓާއި އަދި އިންޓަނެޓާއި ގުޅާލެވިފައިވާ އާލާތްތަކާއި އެޕްލިކޭޝަންތައް ބޭނުންކުރާ މިންވަރު އިތުރުވެފައިވާ ކަމަށެވެ. އެގޮތުން މިވަގުތަކީ އިންޓަނެޓް ކަނެކްޓަޑް ޑިވައިސްތައް ތުއްތު ކުދިންނަށް ދިނުމުގައި ބެލެނިވެރިން ސަމާލުވާން ޖެހޭ ވަގުތެއްކަމަށް މިނިސްޓްރީން ބުނެފައިވެއެވެ.
އޭގެ އިތުރުން، އިންޓަނެޓްގެ ޒަރިއްޔާއިންވެސް ދަރީންގެ ދިރިއުޅުމަށް ނޭދެވޭ އަސަރުކުރާކަން ފާހަގަކޮށް މިނިސްޓްރީން ބުނީ، އެކުދިން ބަލާ ކޮންޓެންޓަކީ އުމުރާ ގުޅޭ ތަކެތިކަން ކަށަވަރު ކުރަން ޖެހޭނެ ކަމަށެވެ. އެގޮތުން ޔޫޓިއުބުގައި މިހާރު ހުންނަ ވީޑިއޯ ޗެނަލްތަކަށް ބަލާއިރު، ކުޑަކުދިން ގަޔާވާ ކާޓޫން ކަރެކްޓަރ ބޭނުންކޮށްގެން، އަމިއްލަ ފަރާތްތަކުން ހިންގަމުންދާ ޗެނަލްތައް އިތުރުވަމުންދާކަން ފާހަގަކޮށް މިނިސްޓްރީން ބުނީ، މިފަދަ ޗެނަލްތަކުގައި އިސްލާމްދީނުގެ އިޖްތިމާއީ މިންގަނޑާއި ހިލާފު، ކުޑަކުދިންގެ އުމުރުފުރައާއި ނުގުޅޭ ކަންކަން ހިމަނާފައި ހުންނަ ކަމަށެވެ.
އާންމުންގެ މެދުގައި މަޤުބޫލުވަމުން އަންނަ މަލްޓިޕްލެޔަރ އޮންލައިން ގޭމްތަކަށް އަލިއަޅުވާލައި މިނިސްޓްރީން ބުނީ، ދިވެހިރާއްޖޭގައި މަޝްހޫރު މޯބައިލް ގޭމްތަކެއް ކަމުގައިވާ ފޯޓް ނައިޓް އަދި ޕަބްޖީ ފަދަ ގޭމްތައް ކުޑަކުދިންގެ މެދުގައިވެސް މަޤްބޫލުވަމުންދާ ކަމަށެވެ. އެގޮތުން އެފަދަ ގޭމްތަކުގައި ލައިވް ޗެޓް ފީޗަރ ބޭނުންކޮށްގެން ހަޑި ހުތުރު ބަހުރުވައިން ކުޅުންތެރިންނާ މުއާމަލާތު ކުރާކަން ފާހަގަކޮށްފައިވެއެވެ. އަދި އެކަމުގެ ސަބަބުން ނަފްސާނީ ގޮތުން ބޮޑު އަސަރެއް ބައެއް ކުދިންނަށް ކުރުމަކީ އެކަށީގެންވާ ކަމެއް ކަމަށް ބުނެފައިވެއެވެ.
އޭގެ އިތުރުން، އެކަންކަމަށް ޙައްލެއް ގެނައުމަށްޓަކައި ގޭމް ކުޅުމަށް ވަކި ވަގުތެއް ކަނޑައަޅައި ސްކްރީން ޓައިމް ލިމިޓް ކުރުމަށް އިރުޝާދު ދީފައިވެއެވެ. އަދި ކުދިން ކުޅެނީ އުމުރު ފުރައާއި އެކަށީގެންވާ ގޭމެއްތޯ ބެލުމާއި، ފައިނޭންޝަލް ސްޓޭޓްމަންޓްތައް ރިވިއުކުރުމަށްވެސް އިރުޝާދު ދީފައިވެއެވެ.
