"ނަވާނަވައި" މޫވްމެންޓުން ރައްޔިތުންގެ މަޖިލިސް އިދާރާ ސަރަޙައްދުގައި ކުރި މުޒާހަރާގައި އަސާސީ ތަމްރީން އެއްކޮށް ފުރިހަމަ ނުކޮށް ތިބި ފުލުހުން ހަރަކާތްތެރިވިކަމަށް މޯލްޑިވިސް ޕޮލިސް ސާރވިސް އިން ބުނެފިއެވެ.

މައުލޫމާތު ލިބިފައިވާ ގޮތުގައި ހޯމަ ދުވަހު ނަވާނަވައިން މަޖިލިސް އިދާރާ ސަރަހައްދުގައި ކުރި މުޒާހަރާ ރުޅާލުމަށް ހަރަކާތްތެރިވީ ކޯވިޑް-19އާ ގުޅިގެން ޓްރެއިނިންގް މެދުކެނޑުމަށްފަހު އެހީތެރިވުމަށް މާލެ އައި ބެޗެކެވެ. ފުލުހުންގެ ވަޒީފާއަށް ވަނުމަށްފަހު އަސާސީ ތަމްރީންގެ 1 އަހަރު ދުވަހު ހޭދަވެގެން ދާއިރު، އެ ފަރާތްތައް ތަމްރީން ކުރުމަށް ފަހުވެސް 6 މަސް ދުވަހުގެ ޕްރޮބޭޝަނެއް ފުރިހަމަ ކުރަންޖެހެއެވެ.

މުޒާހަރާގައި މީހުން ހައްޔަރުކުރުމުގައި އަމަލުކުރި ގޮތަށް ފުލުހުންނަށް ފާޑުކިޔުންތައް އަމާޒުވެފައިވާއިރު، ސަބަބެއްގެ ގޮތުގައި ބައެއް ފަރާތްތަކުން މިކަން ހާމަކޮށްފައިވުމާއިއެކު ރާއްޖެޓީވީގެ ފަލަސުރުހީ ޕްރޮގުރާމްގައި މިކަމާއި ގުޅޭ ގޮތުން ސުވާލު ކުރުމުން، ސްޕްރިންޓެންޑެންޓް އޮފް ޕޮލިސް ހުސައިން ސަމީރު ވިދާޅުވީ މޯލްޑިވިސް ޕޮލިސް ސާރވިސްގެ ވަޒީފާއަށް ހުވާކުރާ ހިސާބުން އެއީ އެ އިދާރާގެ މުވައްޒަފެއް ކަމަށާއި ހުވާކުރާއިރު ފުރަތަމަ ސްޓޭޖްގައި ތަމްރީންތަކެއް ލިބޭ ކަމަށެވެ. އޭނާ ވިދާޅުވީ އަސާސީ ތަމްރީން ފުރިހަމަ ކުރުމަށްޓަކައި ދ.ވާނީގައި މަސައްކަތް ކުރަމުން ދިޔަ ކުދިންވެސް އޮޕަރޭޝަން ތެރޭގައި މަސައްކަތް ކުރަމުންދާނެކަމަށެވެ.

އެކަމަށް އިޝާރާތް ކުރައްވާ ސަމީރު ވިދާޅުވީ، މުޒާހަރާގައި ޓްރެއިނިންގް ހަދަމުންދާ (އަސާސީ ތަމްރީން) އެއްކޮށް ފުރިހަމަ ނުކޮށް ތިބި ފަރާތްތައް ހަރަކާތްތެރިވަމުން ދިޔަކަަމަށެވެ. އަދި ޕްރޮފެޝަނަލް އޮފިސަރުންވެސް ހަރަކާތްތެރިވިކަމަށް އޭނާ ވިދާޅުވިއެވެ.

މުޒާހަރާގައި ފުލުހުން ކަންތައް ކުރީ ރަނގަޅަށް ނޫންކަން ހޯމް މިނިސްޓަރ އިމްރާން ވެސް ފާހަގަކޮށްފައިވެއެވެ. އެގޮތުން، އިންސާނީ ކަރާމާތަށް އިސްކަންދީގެން ޕްރޮފެޝަނަލްކޮށް ޣައިރު ޤާނޫނީ އެއްވުންތައް ރޫޅާލެވޭނެ ޤާބިލުކަން ފުލުހުންގެ ކިބައިގައި ހުންނަތަން ދެކެން ބޭނުންވާ ކަމަށާއި ފުލުހުންނަށް ދެވޭ ތަޢުލީމާއި ތަމްރީންތަކުގެ ތެރެއިން ކުރިއަށް އޮތްތާންގައި އެކަން ކަށަވަރު ކުރައްވާނެ ކަމަށް މިނިސްޓަރ ވަނީ ވިދާޅުވެފައެވެ.