ޖަލުތަކުގެ ކެޕޭސިޓީގެ އިތުރަށް 40 އިންސައްތަ ގައިދީން އެބަތިބި: ހޯމް މިނިސްޓަރ
ކެޕޭސިޓީގެ އިތުރަށް 400 ގައިދީން އެބަތިބި
ހޯމް މިނިސްޓަރ އިމްރާން އަބްދުﷲ މަޖިލީހަށް ހާޒިރު ކުރެއްވުން | ރައްޔިތުންގެ މަޖިލިސް
ޖަލުތަކުގެ ކެޕޭސިޓީއަށް ވުރެ 40 އިންސައްތަ އިތުރަށް ގައިދީން އެބަތިބި ކަމަށް ހޯމް މިނިސްޓަރ ޝެއިހް އިމްރާން އަބްދުﷲ ވިދާޅުވެއްޖެއެވެ.
ރާއްޖޭގެ ޖަލުތަކުގެ ކެޕޭސިޓީއާއި ޖަލުތަކުގެ ހާލަތާއި ބެހޭ ގޮތުން މައްޗަންގޮޅި ދެކުނު ދާއިރާގެ މެމްބަރު ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ، މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުން ގައިދީން ބަލަހައްޓަމުން ދަނީ ހަތަރު ޖަލެއްގައި ކަމަށާއި އެ ޖަލުތަކުގެ ޖުމްލަ ޖާގައަކީ 1300 ކަމަށެވެ. ނަމަވެސް ޖަލުތަކުގެ އާބާދީ 1800ށް އަރާކަން ފާހަގަކޮށް އެއީ ޖަލުތަކުގެ ކެޕޭސިޓީއަށް ވުރެ 40 އިންސައްތަ އިތުރު އަދަދެއްކަން މިނިސްޓަރ ވަނީ ފާހަގަ ކުރައްވާފައެވެ.
ޖަލުތަކުގެ އާބާދީ މަދުކުރުމާއި ހަދަމުންދާ ޖަލުތައް އެކަށީގެންވާ ރަނގަޅު ފެންވަރެއްގައި ހެދުމަށް ގިނަ މަސައްކަތްތަކެއް ކުރަމުން އަންނަ އިރު، ވަކި ގިންތި ތަކަށް ބަހައިލައިގެން ގައިދީން ބަންދުކުރަމުން ދާކަމަށް މިނިސްޓަރ ވިދާޅުވިއެވެ. އެގޮތުން، ހަރުކަށި ފިކުރުގެ ފަރާތްތަކާއި މެދު އަމަލު ކުރަމުންދާ ގޮތާއި ގުޅޭ ގޮތުންވެސް މެމްބަރު ސުވާލު ކުރެއްވުމާއި ގުޅިގެން މިނިސްޓަރ ވަނީ އެކަމުގެ ތަފްސީލު ހިއްސާ ކުރައްވާފައެވެ.
މިނިސްޓަރ ވިދާޅުވީ މިހާރު ޖަލުތަކުގެ ހާލަތު ހުރި ގޮތުން،، ހަރުކަށި ފިކުރުގެ ފަރާތްތައް ވަކި ކުރެވެން އޮތް އެންމެ ބޮޑަށް ވަކި ކޮށްފައިވާ ކަމަށެވެ. އަދި ޖަލުގައި އެފަދަ ފަރާތްތައް ބައިތިއްބަން ހާއްސަ ޔުނިޓެއް އަޅަމުންދާ ކަމަށާއި އެ މަސައްކަތް ލަސްވެގެން ދިޔައީ ކޯވިޑް-19ގެ ސަބަބުން ކަން މިނިސްޓަރ ފާހަގަކުރެއްވިއެވެ. އެހެން ނޫންނަމަ، މީގެ މަހެއް ހާ ދުވަސް ކުރިން އެތަނަށް އެ ގައިދީން ބަދަލުކުރެވުނީސް ކަމަށް މިނިސްޓަރ ވަނީ ވިދާޅުވެފައެވެ. ދޮޅު މަހެއް ހާ ދުވަސް ތެރޭގައި އެ ޔުނިޓު އެއްކޮށް ނިންމާލެވި މީހުން ބަދަލުކުރެވޭނެ ކަމަށް މިނިސްޓަރ ވިދާޅުވިއެވެ.
ޖާގައިގެ ދަތިކަމުގެ ސަބަބުން، ގިންތި ކުރި ކަމުގައިވިޔަސް ކުދި ކުށްތައް ކޮށް ޖަލުގައި ތިބޭ މީހުންނާ އެއްކޮށް ބޮޑެތި ކުށްތައް ސާބިތުވެފައިވާ މީހުން ބައިތިއްބަން ކޮމިޝަނަރ އޮފް ޕްރިޒަންސް ވަނީ މީގެ ކުރިން ފާހަގަކުރައްވާފައެވެ.
ހަރުކަށި ފިކުރުގެ މީހުން ޖަލަށް ލެވޭ އަދަދު އިތުރުވަމުން ދާއިރު އެކަމާއި ގުޅިގެން ހާއްސަ މަސައްކަތްތަކެއް ކަރެކްޝަންސް އިން އަންނަނީ ކުރަމުންނެވެ. އެގޮތުން، ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އިން އަންނަނީ އެފަދަ ފަރާތްތައް ދެނެގަނެ، އެސެސްމަންޓް ހަދައި ރިހިބިލިޓޭޓް ކުރުމަށް ޖަލު ތެރޭގައި އިންތިޒާމުތައް ހަމަޖެއްސުމަށް އެހީތެރިކަން ފޯރުކޮށްދެމުންނެވެ.
އަދި، ޖަލުތެރޭގައި އެ ފިކުރު ފަތުރަން މަސައްކަތް ކުރާ ފަރާތްތައް ހުއްޓުވުމަށްޓަކައި ހާއްސަ އޮފިސަރުންތަކެއް ވެސް ކަރެކްޝަންސް އިން އަންނަނީ ތަމްރީނު ކުރަމުންނެވެ.
