ހިޔާ ފްލެޓްގެ ބޭރުން ފޮޓޯ ނަގަން ވަރަށް ރީތިވާނެ، ދިރިއުޅެން ކަމަކު ނުދޭ: ރައީސް ސޯލިހު
23 ޖޫން 2020 | އަންގާރަ 14:005000 މީހުން ދިރިއުޅޭ ޓަވަރެއްގައި އަރާ ފޭބުމަށް ހުރީ އެންމެ ތިން ލިފްޓު
ހިޔާ ފްލެޓްތައް އޭގެ ހައްގުވެރިންނަށް ވަރަށް އަވަހަށް ދޫކުރާނެ ކަމަށް ރައީސް ސޯލިހު ވިދާޅުވެފައިވޭ
އިރުއޮއްސެމުންދާ ވަގުތު ހިޔާފްލެޓްގެ ބޭރުން ފޮޓޯ ނަގަން ވަރަށް ރީތިވާނެ ކަމަށާއި، އެއީ ދިރިއުޅެން އެކަށީގެންވާ ވަރުގެ ތަނެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ ހިޔާ ފްލެޓަކީ މީހުން ދިރިއުޅެން ރަނގަޅު ތަނެއް ނޫން ކަމަށާއި، އެތަނަށް ވަންނަ މީހުންގެ ތެރެއިން ގިނަ މީހުން އެތަން ދޫކޮށްފައިދާނެ ކަމަށެވެ. ނަމަވެސް އެވެސް ގޮތެއް ނެތް މީހުން އެތަނުގައި ދިރިއުޅެފާނެ ކަމަށް އެމަނިކުފާނު ވިދާޅުވިއެވެ.
ރައީސް ސޯލިހު ވިދާޅުވީ ވިދާޅުވީ ފްލެޓަށް ވަންނަ 80 އިންސައްތަ މީހުން އެތަނުގައި ދިރިއުޅެން ކަމުދާ ތަނެއްގެ ގޮތުގައި ގަބޫލުނުކުރާނެ ކަމަށެވެ. އެގޮތުން ހިޔާ ފްލެޓް އިރުއޮއްސޭ ވަގުތު ބޭރުން ފޮޓޯ ނެގަން ވަރަށް ރީތި ކަމަށާއި، ދިރިއުޅެން ރީތި، ރަނގަޅުތަނެއް ނޫން ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ ހިޔާ ފްލެޓްގެ ޓަވަރެއްގައި ގާތްގަނޑަކަށް 5000 މީހުން ދިރިއުޅެމުންދާއިރު، އަރާ ފޭބުމަށް އެތާގައި ހުރީ އެންމެ ތިން ލިފްޓް ކަމަށެވެ. އެހެންކަމުން އޮފީހަށް ދާ ވަގުތާއި، ސްކޫލުތަކަށް ކުދިން ގެންދާ ވަގުތުގައި ލިފްޓަށް އެރުމަށް ދެގަޑިއިރު ކުރިން ކިއުގައި ޖެހެން ޖެހޭނެ ކަމަށާއި، އެހެން ނޫންނަމަ ގަޑި ޖެހޭނެ ކަމަށް ރައީސް ސޯލިހު ވިދާޅުވިއެވެ. އަދި ވިދާޅުވީ މީގެ އިތުރުން ވެސް ގިނަ މައްސަލަތަކެއް ފާހަގަކުރެވިފައިވާ ކަމަށެވެ.
ހިލާ ފްލެޓްގެ ކުލީގެ އަގަށް އަލިއަޅުއްވާލައްވާ ރައީސް ސޯލިހު ވިދާޅުވީ ކުރީ ސަރުކާރުގެ ބޭފުޅުން އެފްލެޓްތަކުގެ އަގު 6000 ރުފިޔާ ނުވަތަ 7000 ރުފިޔާއަށް ކީ ނަމަވެސް މިހާރު އެހުރި ގޮތަށް ފްލެޓް ދޫކުރާއިރު ވެސް އެންމެ ހެޔޮ އަގުގެ ގޮތުގައި 11000 ރުފިޔާ ޖެހޭ ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ ހިޔާ ފްލެޓްގެ 7000 ފްލެޓް އެންމެ ފަހުގެ މަސައްކަތްތައް މިހާރު ކުރިއަށްދާ ކަމަށާއި، ނުނިމި ހުރީ ވަރަށް މަދު މަސައްކަތެއް ކަމަށެވެ. ނަމަވެސް ފްލެޓްތަކަށް މީހުން ވަންނައިރު ދޮރެއް ނުހުންނާނެ ކަމަށާއި، ޓައެލެސް ޖަހާފައި ނުހުންނާނެ ކަމަށް އެމަނިކުފާނު ވިދާޅުވިއެވެ.
ރައީސް ސޯލިހު ވިދާޅުވީ 7000 ފްލެޓަށް 23000 އެތައް ބަޔަކު ކުރިމަތިލާފައިވާ ކަމަށެވެ. އަދި އެންމެ ފަހު ވަގުތު އެތައް ބަޔެއް ދަފްތަރުގައި ޖައްސާ، ފޯމުގައި ހަމައެކަނި ނަން އަދި ފޯމް ނުލާ ބަޔަކަށް ފްލެޓް ލިވޭނެ ކަމުގެ ޔަގީންކަން ކުރީގެ ސަރުކާރުން ދީފައިވާ ކަމަށެވެ.
ފްލެޓް ދޫކުރުމަށް ކޮށްފައިވާ މަސައްކަތުގައި އަމަލުކޮށްފައިވަނީ ބޮޑު އޮޅުން ބޮޅުން ގަނޑެއްގެ ތެރެއިންކަން ފާހަގަކުރައްވައި ރައީސް ސޯލިހު ވިދާޅުވީ ފްލެޓް ހައްގުވާ މީހެއްގެ ތޯ ބެލުމުގެ މަސައްކަތުގެ 90 އިންސައްތަ މަސައްކަތް ނިމިފައިވާ ކަމަށެވެ. އަދި އެމަސައްކަތް ހުއްޓުނީ ކޮވިޑް-19އާ ގުޅިގެން ކަމަށާއި، ހާލަތު ބަދަލުވުމާއެކު އެމަސައްކަތް އަލުން ފެށޭނެ ކަމަށް އެމަނިކުފާނު ވިދާޅުވިއެވެ.
