ކޮމިޝަނަރ ޖެނެރަލް އޮފް ކަސްޓަމްސްގެ މަޤާމަށް ޢަބްދުﷲ ޝަރީފު ޢައްޔަނު ކުރައްވައިފި
23 ޖޫން 2020 | އަންގާރަ 07:14އަބްދުﷲ ޝަރީފް ވަނީ 27 އަހަރު ކަސްޓަމްސްއަށް ހިދުމަތްކޮށް ދެއްވާފައި
ކޮމިޝަނަރ ޖެނެރަލް އޮފް ކަސްޓަމްސްގެ މަޤާމަށް އައްޔަން ކުރެއްވި ޢަބްދުﷲ ޝަރީފު ނޫސްވެރިންގެ ބައްދަލުވުމެއްގައި ވާހަަކަ ދައްކަވަނީ
ކޮމިޝަނަރ ޖެނެރަލް އޮފް ކަސްޓަމްސްގެ މަޤާމަށް ޢަބްދުﷲ ޝަރީފު، ޢައްޔަނު ކުރައްވައިފިއެވެ.
ރައީސް އޮފީހުގެ ތަރުޖަމާން އިބްރާހީމް ހޫދް ޓުވިޓަރ މެދުވެރިކޮށް ވިދާޅުވީ، ދިވެހިރާއްޖޭގެ ކަސްޓަމްސްގެ ޤާނޫނުގެ 6 ވަނަ މާއްދާގެ (ށ) ގައިވާ ގޮތުގެ މަތިން، ކޮމިޝަނަރ ޖެނެރަލް އޮފް ކަސްޓަމްސްގެ މަޤާމަށް ހުޅުމާލެ ފްލެޓް ނަންބަރު 04-1-38 ޢަބްދުﷲ ޝަރީފު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ޢައްޔަނު ކުރައްވާފައިވާ ކަމަށެވެ.
ޢަބްދުﷲ ޝަރީފަށް ކޮމިޝަނަރ ޖެނެރަލް އޮފް ކަސްޓަމްސްކަމުގެ ލިޔުން ޙަވާލު ކުރެއްވުމުގެ ރަސްމިއްޔާތު އޮތީ، އަންގާރަ ދުވަހުގެ ހެނދުނު ރައީސުލްޖުމްހޫރިއްޔާގެ އޮފީހުގައެވެ. ކޮމިޝަނަރ ޖެނެރަލް އޮފް ކަސްޓަމްސްގެ މަޤާމަށް ޢަބްދުﷲ ޝަރީފު، ޢައްޔަނު ކުރައްވާފައިވަނީ ސްޓޭޓް މިނިސްޓަރ ފެންވަރުގައި ކަމަށް ހޫދު ވިދާޅުވިއެވެ.
ކަސްޓަމްސްގެ ކޮމިޝަނަރ ޖެނެރަލްގެ މަގާމު ހުސްވެފައި ވަނީ އެ މަގާމުގައި ހުންނެވި އަހްމަދު ނުޢުމާނު ނިޔާވުމާއި ގުޅިގެންނެވެ. ކޮމިޝަނަރ ޖެނެރަލް އޮފް ކަސްޓަމްސްގެ މަގާމަށް ބޭފުޅަކު އައްޔަން ކުރެވެންދެން އެ އިދާރާ ހިންގުމާއި ހަވާލުވެ ހުންނެވީ ވެސް ޑެޕިއުޓީ ކޮމިޝަނަރ އޮފް ކަސްޓަމްސް އަބްދުﷲ ޝަރީފެވެ. ޑެޕިއުޓީ ކޮމިޝަނަރުގެ މަގާމަށް އަބްދުﷲ ޝަރީފް އައްޔަނު ކުރެއްވީ މިދިޔަ އަހަރުގެ ޖުލައި މަހުގެ ތެރޭގައެވެ. އޭގެ ކުރިން އޭނާ ހުންނެވީ ސީނިއަރ ސުޕްރިންޓެންޑެންޓްގެ މަގާމުގައެވެ.
ކަސްޓަމްސް ހިންގުމާ ހަވާލުވެޑައިގެންނެވި އަބްދުﷲ ޝަރީފް ވަނީ ކަސްޓަމްސްގައި 27 އަހަރުގެ ހިދުމަތް ކުރައްވާފައެވެ.
އަބްދުﷲ ޝަރީފަކީ ކަސްޓަމްސް އެޑްމިނިސްޓްރޭޝަން ގެ ދާއިރާއިން މާސްޓަރސް ޑިގްރީ ހާސިލުކުރައްވާފައިވާ ބޭފުޅެކެވެ.
