ވެރިކަން ބަދަލުވި ގޮތް ބަލަންޖެހޭ، އެއްބާރުލުން ދޭނަން: ރައީސް ވަހީދު
22 ޖޫން 2020 | ހޯމަ 19:45ކޯނީގެ ރިޕޯޓުން ހުރިހާ ކަމެއް ފެންނަން އޮންނާނެ: ޑރ ވަހީދު
ކުރީގެ ރައީސް ޑރ. ވަހީދު: އެމަނިކުފާނު ވިދާޅުވީ ވެރިކަން ބަދަލުވި ގޮތަކީ އުފާކުރަން ޖެހޭ ކަމެއް ނޫން ކަމަށް
2012 ވަނަ އަހަރުގެ ހަތެއް ފެބްރުއަރީގައި ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވިގޮތް ބަލަން ބޭނުންފުޅުވާ ކަމަށް، ރައީސް ނަޝީދުގެ ނައިބް ރައީސަކަށް ހުންނަވާ ވެރިކަމަށް އަރާވަޑައިގެންނެވި ކުރީގެ ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.
އެމްޑީޕީން ސިފަކުރާ ގޮތުގައި ރައީސް ނަޝީދުގެ ވެރިކަން ވައްޓާލާފައިވަނީ ބަޢާވާތަކުންނެވެ. އަދި އެމްޑީޕީގެ ވެރިކަން ވައްޓާލާފައިވަނީ އޭރުގެ އިދިކޮޅުގައި ތިބި ފަރާތްތަކާއި ޑރ. ވަހީދު ގުޅިވަޑައިގެން ކަމަށްވެސް އެ ޕާޓީން ދަނީ ތުހުމަތު ކުރަމުންނެވެ.
ގިނަ ދުވަސްތަކެއް ވަންދެން ސިޔާސީ މައިދާނުން ދުރަށް ޖެހިވަޑައިގެން ހުންނެވުމަށް ފަހު ޑރ. ވަހީދު ވަނީ ހޯމަ ދުވަހު އިދިކޮޅު ޕްރޮގްރެސިވް ކޯލިޝަންގެ މަސައްކަތްތަކާއި ގުޅިވަޑައިގެންފައެވެ.
ހޯމަ ދުވަހުގެރޭ ކުރިޔަށް ދިޔަ ޕްރެސްކޮންފަރެންސްގައި ވެރިކަން ބަދަލުވި ގޮތާއި ގުޅުވައި ނޫސްވެރިޔަކު ކުރި ސުވާލަކަށް ޖަވާބުދެއްވަމުން އެމަނިކުފާނު ވިދާޅުވީ، ހަތެއް ފެބްރުއަރީގައި ވެރިކަމަށް އައި ލޮޅުމަކީ އެއްވެސް ގޮތަކަށް އުފާކުރައްވާ ކަހަލަ ކަމެއް ނޫން ކަމަށާއި، އެކަން ވެގެން ދިޔަ ގޮތެއް ބަލަން ޖެހޭ ކަމަށެވެ.
އެ ދުވަސްވަރު ކަންތައް ހިނގާދިޔަ ގޮތުގެ ހަނދާން އާ ކުރައްވަމުން ޑރ. ވަހީދު ވިދާޅުވީ، އެ މައްސަލަ ބެލުމަށްޓަކައި އެކުލަވާލީ ކޮމިޝަން އޮފް އިންކުއަރީ ނޭޝަނަލް (ކޯނީ) ގެ ރިޕޯޓުން ވަރަށް ސާފުކޮށް ކަންވެގެން ދިޔަގޮތް ފެންނަން އޮންނާނެ ކަމަށެވެ. ވެރިކަން ބަދަލުވުމުގައި އެމަނިކުފާނު އަތެއްވާނަމަ އިސްތިއުފާ ދެއްވާނެ ކަމަށް ކޯނީގައި ބުނެފައިވާނެ ކަމަށް ޑރ. ވަހީދު ވިދާޅުވިއެވެ.
ކޯނީ ރިޕޯޓުން ހުރިހާ ކަމެއް ފެންނަން އޮންނާނެ ކަމަށް ރައީސް ވަހީދު ވިދާޅުވެފައިވާއިރު، އެ ރިޕޯޓުގެ ސައްހަ ކަމާއިމެދު އެމްޑީޕީން ވަނީ ސުވާލުއުފައްދާފައެވެ. ދައުލަތާއި ދެކޮޅަށް ހަރަކާތް ހިންގި ފުލުހުންނާއި ސިފައިންނާ ދެކޮޅަށް ފިޔަވަޅު އަޅަން ޖެހޭނެ ކަމަށް ކޯނި ރިޕޯޓްގައި ވަނީ ބުނެފައެވެ. އެކަމަކު ރައީސް ވަހީދުގެ ވެރިކަމުން ވަޑައިގެންނެވިއިރުވެެސް އެ މީހުންނާ މެދު ފިޔަވަޅެއް އެޅިފައެއް ނުވެއެވެ.
ވެރިކަން ބަދަލުކުރިގޮތް އަލުން ބަލައިފިނަމަ، އެއީ "ބަޣާވާތެއް" ގެ ގޮތުގައި ފެންނާނެ ކަމަށް ކުރީގެ ރައީސް މުހައްމަދު ނަޝީދު ދަނީ ވިދާޅުވަމުންނެވެ. ވެރިކަން ބަދަލުވެގެން ދިޔަ ގޮތް ތަހުގީގުކުރަން ޖެހޭ ކަމަށް އެމްޑީޕީގެ ސުޕަރ މެޖޯރިޓީ އޮންނަ ރައްޔިތުންގެ މަޖިލީހުގެ މެމްބަރުންވެސް ގެންދަވަނީ ވިދާޅުވަމުންނެވެ.
