އެއްދުވަހާ 183،000 މީހުންނަށް ކޮވިޑް-19 ޖެހި، އަނެއްކާވެސް ރިކޯޑެއް
22 ޖޫން 2020 | ހޯމަ 07:46އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓް ކޮށްފައިވަނީ ދެކުނު އަދި އުތުރު އެމެރިކާއިން
ކޮވިޑް-19 އަށް ޓެސްޓް ކުރަނީ
ފާއިތުވި 24 ގަޑިއިރު ތެރޭގައި މުޅި ދުނިޔެއިން 183,000 ށް ވުރެ ގިނަ މީހުންނަށް ވައިރަސް ޖެހިފައިވާކަމަށް ދުނިޔޭގެ ސިއްހަތު ޖަމިއްޔާ(ޑަބްލިޔުއެޗްއޯ) އިން ބުނެފި އެވެ.
މިއީ މިހާތަނަށް ރިކޯޑް އަދަދެކެވެ. އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓް ކޮށްފައިވަނީ ދެކުނު އަދި އުތުރު އެމެރިކާއިންނެވެ. އެސަރަހައްދުން އެކަނި 116,000 މީހުންނަށް ވަނީ ފާއިތުވި 24 ގަޑިއިރު ތެރޭގައި އަލަށް ވައިރަސް ޖެހިފަ އެވެ.
އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓްކޮށްފައިވަނީ ބްރެޒިލް އެވެ. އެއީ 54,771 އެވެ. އެއަށްފަހު އެމެރިކާއެވެ. އެއީ 36,617 މީހުންނެވެ. ތިން ވަނައަށް އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ފާއިތުވި 24 ގަޑިއިރު ރިކޯޑް ކޮށްފައިވަނީ އިންޑިޔާއެވެ. އެއީ 15,400 މީހުންނެވެ.
މާހިރުން ބުނާގޮތުގައި ވައިރަސް ޖެހޭ މީހުން އިތުރުވާކަމަށް ރިކޯޑް ކުރުމުގައި ތަފާތު ސަބަބުތައް އެބަހުއްޓެވެ. އޭގެތެރޭގައި ޓެސްޓް ކުރެވޭ މިންވަރު އިތުރުވުމާއި ވަކި ހިސާބުތަކުގައި ވަކިން ޚާއްސަކޮށް އާބާދީ ބޮޑު ތަންތަނުގައި ވައިރަސް ފެތުރޭ މިންވަރު އަދިވެސް ކޮންޓްރޯލް ކުރެވިފައިނުވުމެވެ.
އެންމެ ފަހުން ރިކޯޑް އަދަދަކަށް އެއްދުވަހާ މީހުންނަށް ވައިރަސް ޖެހިގެން ރިޕޯޓްކޮށްފައިވަނީ ޖޫން މަހުގެ 18 ވަނަ ދުވަހު އެވެ. އެއީ 181,232 (އެއްލައްކަ އަށްޑިހަ އެއް ހާސް ދުއިސައްތަ ތިރީސް ދެ) މީހުންނެވެ.
އެންމެ ގިނަ އަދަދެއްގެ މީހުންނަށް ވައިރަސް ޖެހިގެން މިހާރު ރިޕޯޓްކުރަމުން އަންނަ އެމެރިކާގައި 2,356,715 (ދެ މިލިއަން ތިން ލައްކަ ފަންސާސް ހަ ހާސް ހަތްސަތޭކަ ފަނަރަ) މީހުންނަށް ވަނީ ވައިރަސް ޖެހިފަ އެވެ. ދެ ވަނަ އަށް އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓްކުރަމުން އަންނަނީ ބްރެޒިލް އެވެ. އެއީ 1,086,990 (އެއް މިލިއަން އަށްޑިހަ ހަހާސް ނުވަސަތޭކަ ނުވަދިހަ) މީހުންނެވެ. ތިން ވަނައަށް ރިޕޯޓްކުރަމުން އަންނަނީ ރަޝިޔާ އެވެ. އެއީ 584,680 (ފަސް ލައްކަ އަށްޑިހަ ހަތަރު ހާސް ހަސަތޭކަ އަށްޑިހަ) މީހުންނެވެ.
