ފުލުހަށް ހާޒިރުވާން ހައިލަމަށް އަންގައިފި
21 ޖޫން 2020 | އާދީއްތަ 18:04ފުލުހަށް ހާޒިރުވާން ޖެހެނީ އަންގާރަ ދުވަހު
ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް
ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ފުލުހަށް ހާޒިރުވާން އަންގައިފި އެވެ.
ފުލުހަށް ހާޒިރުވާން ހައިލަމް އަށް އަންގާފައިވަނީ އަންގާރަ ދުވަހުގެރޭ 20:00 އަށެވެ.
ފުލުހުންގެ އިދާރާ އަށް ހާޒިރުވާން އަންގާފައިވާ ލިޔުން ހައިލަމް ވަނީ އޭނާގެ ޓްވިޓާ އެކައުންޓު ގައި ހިއްސާކުރައްވާފައެވެ. ފުލުހުންގެ އިދާރާ އަށް އޭނާ ހާޒިރުވާން އަންގާފައިވަނީ ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީގެ ފަރާތުން މިދިޔަ އަހަރުގެ މޭމަހު ހޯދި 200،000 (ދެލައްކަ) ރުފިޔާގެ މައްސަލާގައެވެ.
ފުލުހުން ބުނެފައިވާގޮތުން އެ އިދާރާއިން ދަނީ ފަނޑިޔާރު ކަމުގެ މަގާމުގައި ހައިލަމް ހުންނެވިއިރު ވިޔަފާރިކޮށްފައިވާ ކަމަށް ތުހުމަތު ކުރެވޭ މައްސަލައެއްވެސް ބަލަމުންނެވެ.
ހައިލަމް އަކީ ކުރީގެ ރައީސް އަބްދުﷲ ޔާމީންގެ މަނީލޯންޑަރިންގެ މައްސަލަ ބައްލަވަމުން ގެންދެވި ގާޒީއެވެ. ގާޒީކަމުން ހައިލަމް ސަސްޕެންޑް ކޮށްފައިވަނީ، ނަސްރުގެ ދުވަސް ކަމަށްވާ ނޮވެމްބަރު 3 ފާހަގަ ކުރުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހާއި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ކަރުފުޅުގައި ޗޭނުޖަހާފައިވާ ފޮޓޯއެއް ކްރިމިނަލް ކޯޓުގެ މުވައްޒަފުންގެ ވައިބަރ ގުރޫޕަށްލުމާ ގުޅިގެންނެވެ.
ހައިލަމް ސަސްޕެންޑް ކޮށްފައިވަނީ އެކަން ފަޅާއަރައި، ނޮވެމްބަރު މަހުގެ ފަސް ވަނަ ދުވަހު އެވެ. ހައިލަމް ސަސްޕެންޑް ކުރި ދުވަހަކީ، ކުރީގެ ރައީސް އަބްދުﷲ ޔާމީނުގެ މައްޗަށް ދައުލަތުން ކޮށްފައިވާ މަނީ ލޯންޑަރިންގ ދައުވާގެ ހުކުމް ކުރުމަށް އޮތް ދުވަހެވެ.
ފަނޑިޔާރު ކަމުން ހައިލަމް އިސްތިއުފާ ދެއްވާފައިވަނީ ފަނޑިޔާރު ކަމުގެ މަގާމުން އޭނާ ވަކިކުރަން ޖުޑީޝަލް ސަރވިސް ކޮމިޝަނުން ނިންމާފައި ވަނިކޮށެވެ.
