އައްޑޫގައި ކޮވިޑަށް ޓެސްޓުކުރަން ފަށައިފި
21 ޖޫން 2020 | އާދީއްތަ 19:56ދުވާލެއްގެ މައްޗަށް 100 ޓެސްޓު ކުރެވޭނެ
އައްޑޫ އިކުއެޓޯރިއަލް ހޮސްޕިޓަލުގައި ކޮވިޑަށް ޓެސްޓުކުރުމުގައި ލެބް ޓެކްނިޝަނުން ހަރަކާތްތެރިވަނީ
އައްޑޫ ސިޓީގައި ކޮވިޑް-19ށް ޓެސްޓު ކުރެވޭނެ އިންތިޒާމް ހަމަޖައްސައި ޓެސްޓުތައް ހަދަން ފަށައިފިއެވެ.
އައްޑޫ އިކުއެޓޯރިއަލް ހޮސްޕިޓަލުން ކުރި ޓްވީޓެއްގައި ބުނީ، ޕީސީއާރް މެޝިނެއް ގެނެސް ހޮސްޕިޓަލުގެ ލެބޯރަޓަރީގައި ޓެސްޓްތައް ހަދަން ފަށާފައިވާ ކަމަށެވެ. އައްޑޫގައި ދުވާލެއްގެ މައްޗަށް 100 ޓެސްޓު ހެދޭނެއެވެ.
އައްޑޫ ސިޓީއަކީ މާލެ ސިޓީ ފިޔަވަ ރާއްޖޭގައި ކޮވިޑަށް ޓެސްޓު ކުރެވޭ ފުރަތަމަ ސިޓީއެވެ. މާލޭގައި ކޮވިޑް-19ށް ޓެސްޓު ކުރަމުންދަނީ އައިޖީއެމްއެޗްގެ ނެޝަނަލް ރިފަރެންސް ލެބޯރަޓަރީގަ އާއި އޭޑީކޭގެ އިތުރުން ފުލުހުންގެ ލެބޯރަޓަރީގައެވެ. މިހާރު ދުވާލެއްގެ މައްޗަށް 1000އަކާއި ގާތްކުރާ އަދަދަށް ކޮވިޑަށް ޓެސްޓު ކުރެވެއެވެ.
ކޮވިޑް-19 އަށް ދެ ބާވަތެއްގެ ޓެސްޓެއް ހަދާއިރު، ފުރަތަމަ ހަދާ ޓެސްޓަކީ ސްކްރީނިން ޓެސްޓެވެ. ސްކްރީނިން ޓެސްޓަކީ ވަރަށް އަވަހަށް ނަތީޖާ ލިބޭ ޓެސްޓެކެވެ. އެ ޓެސްޓުން ބަލަނީ ކޮވިޑް-19 ހުރިތޯ ނުވަތަ ނޫންތޯ އެވެ. ސްކްރީނިން ޓެސްޓަކީ އެންމެ އިތުބާރު އޮންނަ އެއް ޓެސްޓެވެ. އެކަމަކު އެ ޓެސްޓުގެ ނަތީޖާވެސް ޕޮޒިޓިވްވެއްޖެނަމަ ޖެނެޓިކް ޓެސްޓެއް އިތުރަށް ހަދައެވެ. މި ޓެސްޓު ކުރެވިގެންދަނީ ވައިރަސްގެ އާރްއެންއޭ ނުވަތަ ޑީއެންއޭ ހުރިތޯ ބަލާށެވެ.
