އެންގުންތަކާ ހިލާފަށް އެއްވުންތައް ރާވައި ނުބޭއްވުމަށް ފުލުހުން އިލްތިމާސްކޮށްފި
20 ޖޫން 2020 | ހޮނިހިރު 07:14އިދިކޮޅު ކޯލިޝަނުން ދަނީ އެއްވުންތައް ބޭއްވުމަށް ތައްޔާރު ވަމުން
ފުލުހުންގެ މައި މަރުކަޒު: ރާއްޖޭގައި އޮތީ އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާން ކޮށްފައި، އެހެންކަމުން އެއްވުންތައް ބޭއްވުންވެސް ވަނީ މަނާ ކޮށްފައި
ޑިރެކްޓަރ ޖެނެރަލް އޮފް ޕަބްލިކް ހެލްތު އަންގަވާފައިވާ އެންގެވުމާ ހިލާފަށް، ބައެއް ފަރާތްތަކުން އެއްވުން ބޭއްވުމަށް ރާވަމުންދާކަމުގެ މައުލޫމާތު ފުލުހުންނަށް ލިބިފައިވާތީ، އެންގުންތަކަ ހިލާފަށް އެއްވުންތައް ނުބޭއްވުމަށް ފުލުހުން އިލްތިމާސްކޮށްފިއެވެ.
މޯލްޑީވްސް ޕޮލިސް ސަރވިސްއިން ހޮނިހިރު ދުވަހު ކުރި ޓްވީޓެއްގައި ބުނެފައިވަނީ، ރާއްޖޭގައި އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށްފައިވާ މިދަނޑިވަޅުގައި، ފުރަބަންދުގެ ހާލަތަށް ލުއި ދިނުމުގެ ދެވަނަ މަރުހަލާގައިވެސް، އާންމު ތަންތަނުގައި އެއްވެ އުޅޭވޭނީ އެއްފަހަރާ 3 މީހުންނަށްވުރެ ގިނަ ނުވާގޮތަކަށްކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތް އަންގަވާފައިވާ އެންގެވުމާއި ހިލާފަށް، ބައެއް ފަރާތްތަކުން އެއްވުން ބޭއްވުމަށް ރާވަމުންދާކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ.
އެހެންކަމުން، އާންމު ސިއްހަތުގެ ކުއްލި ނުރައްކަލުގެ މިހާލަތުގައި، ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އެންގުންތަކާ ހިލާފަށް އެއްނުވުމަށާއި، އެންމެހައި ލޮބުވެތި ރައްޔިތުންގެ ރައްކާތެރިކަން ކުރިއަށް ނެރެ، ހުރިހާ ބޭފުޅުންވެސް އެޗްޕީއޭއިން ނެރެފައިވާ އިރުޝާދުތަކާ އެއްގޮތަށް އަމަލުތައް ބެހެއްޓުމަށް އިލްތިމާސް ކުރާކަމަށް ފުލުހުން ބުނެފައި ވެއެވެ.
ފުލުހުން މިހެން ބުނެފައިވާއިރު، ރައްޔިތުންގެ ހައްގުތައް ހޯދައިދިނުމަށް ކަމަށްބުނެ، ބާއްވާ އިހްތިޖާޖުތައް ފެށުމަށް ތައްޔާރުވަމުންދާ ކަމަށް އިދިކޮޅު ޕްރޮގްރެސިވް ކޯލިޝަނުން ވަނީ ބުނެފައެވެ. އިދިކޮޅު ކޯލިޝަންގެ ނިންމާފައިވަނީ، ރާއްޖޭގެ ހުރިހާ ސަރަހައްދެއްގައިވެސް ރައްޔިތުންގެ ހައްގުތައް ހޯދައިދިނުމަށް ބާއްވާ އިހްތިޖާޖުތައް ފެށުމަށް ކަމަށް ވެއެވެ.
މީގެ އިތުރުން، ސިޔާސީ، އިގުތިސާދީ އަދި އިޖްތިމާއީ ގޮތުން ރައްޔިތުން ބާރުވެރިކުރުވުމަށް ނަވާނަވައިއިން ވެސް ވަނީ، ހޯމަ ދުވަހު ރައްޔިތުންގެ މަޖިލީހުގެ އިދާރާގެ ކައިރީގައި އެއްވުމެއް ބާއްވާނެ ކަމަށް ވެސް ބުނެފައެވެ.
