ބިލުގެ މަގްސަދަކީ ފުލުހުންގެ ހިދުމަތް ''ލާމަރުކަޒު ކުރުން'': ހަސަން ލަތީފް
19 ޖޫން 2020 | ހުކުރު 18:33ބިލު ހުށައެޅުއްވީ އެމްޑީޕީގެ ޗެއަރޕަސަން ހަސަން ލަތީފް
އެމްޑީޕީގެ ޗެއަރޕަސަން ހަސަން ލަތީފް ވިދާޅުވީ، ބިލް ގާނޫނަކަށްވުމުގެ ކުރިން ރައްޔިތުންގެ މަޝްވަރާ ހޯދާނެ ކަމަށް
ރައްޔިތުންގެ މަޖިލީހުގައި މިހާރު ބަހުސް ކުރެވެމުންދާ ދިވެހި ފުލުހުންގެ ހިދުމަތުގެ ބިލުގެ މައިގަނޑު މަގްސަދަކީ ފުލުހުންގެ ހިދުމަތް ލާމަރުކަޒުކޮށް ހިންގުން ކަމަށް ސަރުކާރުގެ ފަރާތުން އެ ބިލް މަޖިލީހަށް ހުށައެޅުއްވި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ހުކުރު ދުވަހުގެރޭ ހަސަން ލަތީފް ކުރައްވާފައިވާ ޓްވީޓެއްގައި ވިދާޅުވީ، ފުލުހުންގެ ހިދުމަތުގެ ބިލަކީ ގަދަރުވެރި، ޝަރަފުވެރި، ރައްޔިތުންގެ އިތުބާރާއި ލޯބި ލިބޭނެ ފުލުހުންގެ ހިދުމަތެއް އުފެއްދުމަށް އެކުލަވާލަފައިވާ ބިލެއް ކަމަށެވެ. ޓްވީޓްގެ ތަފްސީލު ރާއްޖެ.އެމްވީއާ ހިއްސާކުރައްވަމުން އެމްޑީޕީގެ ޗެއަރޕަސަންގެ މަގާމުވެސް އަދާކުރައްވަމުން ގެންދަވާ ހަސަން ލަތީފް ވިދާޅުވީ، މަގްސަދަކީ ފުލުހުންގެ ހިދުމަތްތައްވެސް ''ލާމަރުކަޒީ'' ކޮށް ހިންގުން ކަމަށެވެ. އިތުރު ތަފްސީލު ހާމަކުރައްވަމުން މެމްބަރު ހަސަން ލަތީފް ވިދާޅުވީ، މުއައްސަސާ ލާމަރުކަޒީވެގެން ރާއްޖޭގެ އެކި ސަރަހައްދު ތަކުގައި ފުލުހުންގެ ރީޖަނަލް އޮފީސްތަކެއް ގާއިމްކުރެވިގެންދާނެ ކަމަށެވެ.
އެ ބިލުގެ 7 ވަނަ މާއްދާގެ (ހ) ގައި ބަޔާންކޮށްފައިވާ ގޮތުން ފުލުހުންގެ ހިދުމަތް ދޭންވާނީ އެ ހިދުމަތެއް ދެވޭ ސަރަހައްދެއްގެ ރައްޔިތުންނާއި، ކައުންސިލްގެ މެންބަރުންނާއި، މަދަނީ ޖަމްއިއްޔާތަކާއި، ދައުލަތުގެ މުއައްސަސާތަކުގެ ބައިވެރިވުން ލިބޭނެފަދަ ގޮތަކަށެވެ. މިގޮތުން އެތަންތަނުން ދެވޭ ފުލުހުންގެ ހުދުމަތް ބައްޓަންކުރަންވާނީ ކޮމިއުނިޓީ ޕޮލިސިންގގެ ފަލްސަފާއި މައްޗަށް ކަމަށްވެސް ބިލުގައިވެއެވެ.
ހަސަން ލަތީފް ވިދާޅުވި ގޮތުގައި އެ ބިލަކީ ''އެމްޑީޕީ ސްޓައިލު'' ގައި މަޝްވަރާ ކުރެވިގެންދާނެ ބިލެއް ކަމަށެވެ. ސަބަބެއް ކަމަށް އޭނާ ވިދާޅުވީ، އެ ބިލް ގާނޫނަކަށްވުމުގެ ކުރިން ގިނަ ފަރާތްތަކަކާއި އެކު ފުޅާދާއިރާއެއްގައި މަޝްވަރާކުރެވި މައުލޫމާތު ބަދަލުކުރެވޭނެތީއެވެ. އެމްޑީޕީގެ ޗެއަރޕަސަން ވިދާޅުވީ، ބިލު ގާނޫނަކަށްވެގެންދާނީ ރައްޔިތުންގެ މަޝްވަރާ ހޯދުމަށް ފަހު ކަމަށެވެ. އެގޮތުން ކުރިޔަށް އޮތްތަނުގައި އެ މަޝްވަރާ ބައްދަލުވުން ބާއްވާނެ ކަމަށް ވިދާޅުވިއެވެ. އެއީ އެ ޕާޓީން ދެކޭގޮތުގައި ބިލެއް ގާނޫނަކަށް ވެގެންދާނީ ރައްޔިތުންވެސް ދެކޭ ގޮތްތައް ބެލުމަށް ފަހު ކަމަށްވާތީ ކަމަށް ވިދާޅުވިއެވެ.
ފުލުހުންގެ ހިދުމަތުގެ ބިލުގައި ބުނެފައިވާ ގޮތުން، މި ބިލުގެ ބޭނުމަކީ ފުލުހުންގެ ހިދުމަތުގެ އެންމެހާ ކަންކަމަކީ ދިވެހި ޖުމްހޫރިއްޔާގެ ގާނޫނުއަސާސީ އާއި، ގާނޫނުއާސާސީ ގައި ބަޔާންކޮށްފައިވާ ދުސްތޫރީ ހަމަތަކާއި އިންސާނީ ހައްގުތަކަށް އިހުތިރާމާއެކު ގާނޫނުގެ ހުކޫމާތުގެ ތެރެއިން ދެވޭ ހިދުމަތެއްކަން ކަށަވަރުކުރުން ކަމަށެވެ. އަދި މިހާރު އަމަލު ކުރަމުންދާ ގާނޫނު ނަންބަރު 5/2008 (ފުލުހުންގެ ޤާނޫނު)ގެ ބަދަލުގައި އާ ގާނޫނެއް ތަޢާރަފުކޮށް، ފުލުހުންގެ ހިދުމަތް ގާއިމުކުރެވިފައިވާ ގޮތާއި، ފުލުހުންގެ ހިދުމަތް ފޯރުކޮށްދިނުމުގެ މައިގަނޑު އަސާސްތަކާއި އުސޫލުތަކާއި، ފުލުހުން ހިދުމަތުގެ މައިގަނޑު މަސްއޫލިއްޔަތުތަކާއި، ބާރުތަކާއި، އެ ހިދުމަތާގުޅޭ އެނޫންވެސް ކަންކަން އެ ގާނޫނު މެދުވެރިކޮށް އަލުން ކަނޑައެޅުން ކަމަށްވެސް ދިވެހި ފުލުހުންގެ ހިދުމަތުގެ ބިލުގައިވެއެވެ.
