އައިކޮމްއިން ކުރެވުނު މަސައްކަތުގެ ރިޕޯޓު ފުރަތަމަ ފަހަރަށް އާންމުކޮށްފި
19 ޖޫން 2020 | ހުކުރު 13:01ރިޕޯޓް އާންމު ކޮށްފައިވަނީ ވެބްސައިޓާއި، އައިކޮމްގެ ޓްވިޓަރ އަދި ފޭސްބުކް އެކައުންޓު މެދުވެރިކޮށް
އިންފޮރމޭޝަން ކޮމިޝަނަރުގެ އޮފީހުން ބޭއްވި ނޫސްވެރިންގެ ބައްދަލުވުމެއްގައި އިންފޮރމޭޝަން ކޮމިޝަނަރު ހުސައިން ފިޔާޒް ވާހަކަދައްކަވަނީ
އިންފޮމޭޝަން ކޮމިޝަނަރުގެ އޮފީހުން (އައިކޮމްއިން) ކުރެވުނު މަސައްކަތުގެ މައްޗަށް އެކުލަވާލާ ރައްޔިތުންގެ މަޖިލީހަށް ހުށަހެޅި ރިޕޯޓު, ފުރަތަމަ ފަހަރަށް އާންމު ކޮށްފިއެވެ.
އިންފޮމޭޝަން ކޮމިޝަނަރުގެ އޮފީހުގެ ވެބްސައިޓާއި، އައިކޮމްގެ ޓްވިޓަރ އަދި ފޭސްބުކް އެކައުންޓު މެދުވެރިކޮށް ރިޕޯޓް އާންމު ކޮށްފައިވާއިރު، މި ރިޕޯޓަކީ ފުރަބަންދުގައި އިންފޮމޭޝަން ކޮމިޝަނަރުގެ އޮފީހުން ކުރަމުންދާ މަސައްކަތްތަކުގެ މައްޗަށް އެކުލަވައިލާ ކޮންމެ ދެ ހަފްތާއަކުން ރައްޔިތުންގެ މަޖިލީހަށް ހުށަހަޅަން ޖެހޭ ރިޕޯޓެއް ކަމަށް އެ އޮފީހުން ބުނެއެވެ.
އޭގެ އިތުރުން، ފުރަބަންދުގެ ލުޔާއިއެކު އިންފޮމޭޝަން ކޮމިޝަަނަރުގެ އޮފީސް ހުޅުވުމުގައި ޢަމަލު ކުރަމުންދާ ގޮތާއި، މުވައްޒަފުންގެ ހާޒިރީ ބަލަހަށްޓަމުންދާ ގޮތާއި، އޮފީހަށް ހާޒިރުވެ މަސައްކަތްކުރި މުވައްޒަފުންނާއި، ގޭގައި ތިބެގެން މަސައްކަތްކުރި މުވައްޒަފުންނާއި، އޮފީހަށް ލިބުނު އަދި ފޮނުވުނު ލިޔުންތަކުގެ ތަފުސީލާއި، ވޭތުވެދިޔަ ދެ ހަފްތާގައި ބޭއްވި ބައްދަލުވުންތަކުގެ ތަފްސީލާއި، ކުރެވުނު މުހިންމު މަސައްކަތްތަކުގެ ތަފުސީލު މި ރިޕޯޓްގައި ހިމަނާފައި ވެއެވެ.
އިންފޮމޭޝަން ކޮމިޝަނަރުގެ އޮފީހުން ބުނީ، މި ރިޕޯޓު އާންމު ކުރުމުގެ މައިގަނޑު މަޤްސަދަކީ، ވީހާވެސް ހާމަކަން ބޮޑުގޮތެއްގައި އިންފޮމޭޝަން ކޮމިޝަނަރުގެ އޮފީހާ ބެހޭ މައުލޫމާތު އާންމުންނަށް ފޯރުކޮށްދިނުން ކަމަށެވެ. އަދި ކުރިއަށް އޮތްތަނުގައި ވެސް މި ގޮތަށް އެކުލަވައިލާ ރިޕޯޓުތަކާއި އަދި އެހެނިހެން މަޢުލޫމާތުތައް ހާމަކަން ބޮޑުގޮތެއްގައި އިންފޮމޭޝަން ކޮމިޝަނަރުގެ އޮފީހުން އާންމުކުރާނެ ކަމަށް ބުނެފައިވެއެވެ.
