ވޭތުވެދިޔަ 4 ދުވަހުގެ ތެރޭގައި 446 ދިވެހިން ރާއްޖެ ގެނެސްފި

ވޭތުވެދިޔަ 4 ދުވަހުގެ ތެރޭގައި 446 ދިވެހިން ރާއްޖެ ގެނެސްފައިވާކަމަށް ހާރިޖީ ވުޒާރާއިން ބުނެފިއެވެ.

ރާއްޖެއިން ބޭރުގެ އެކި ޤައުމުތަކުގައި ތިބި ދިވެހިންގެ ތެރެއިން ކޮންމެހެން އަންނަން ބޭނުންވާ މީހުންނަށް އެފުރުސަތު ހޯދައިދިނުމަށް ހާރިޖީ ވުޒާރާއިން ކުރަމުން އަންނަ މަސައްކަތުގެ ތެރެއިން، މިމަހުގެ 15 ވަނަ ދުވަހުން ފެށިގެން މިއަދާ ހަމަޔަށް 446 ދިވެހިން ރާއްޖެ ގެނެސްފައިވާކަމަށް އެ ވުޒާރާއިން ވަނީ ބުނެފައެވެ.

ހާރިޖީ ވުޒާރާއިން ހާމަކޮށްފައިވާ މައުލޫމާތުގަ ވާގޮތުން، ޖޫން 15 ވަނަ ދުވަހު މެލޭޝިއާއިން އައި މޯލްޑިވިއަންގެ ފްލައިޓްގައި 198 ދިވެހިން ވަނީ ގެނެސްފައެވެ. މީގެއިތުރުން، ޖޫން 17 ވަނަ ދުވަހު މެލޭޝިއާއިން އައި މޯލްޑިވިއަންގެ ފްލައިޓްގައި 175 ދިވެހިން ގެނެސްފައިވާއިރު، ޖޫން 16 ވަނަ ދުވަހު ރާއްޖޭގައި ތިބި އިންޑިއާ މީހުން ބަލާ އިންޑިއާގެ ބެންގަލޯރ އިން އައި ފްލައިޓްގައި 54 ދިވެހިން ވަނީ ގެނެސްފައެވެ.

ރާއްޖޭގައި ތިބި އިންޑިއާ މީހުން ބަލާ އައި އިތުރު ފްލައިޓްތަކެއްގައިވެސް ވަނީ ދިވެހިން ގެނެސްފައެވެ. އެގޮތުން، ޖޫން 17 ވަނަ ދުވަހު އިންޑިއާގެ ވެރިރަށް ދިއްލީއިން އައި ފްލައިޓްގައި 10 ދިވެހިން ގެނެސްފައިވާއިރު ޖޫން 18 ދިއްލީން އައި ފްލައިޓްގައި 2 ދިވެހިން ވަނީ ގެނެސްފައެވެ. އޭގެ އިތުރުން، ރާއްޖޭގައި ތިބި ނޭޕާލް މީހުން ބަލާ ޖޫން މަހުގެ 16 ވަނަ ދުވަހު އައި ފްލައިޓެއްގައި ވަނީ 7 ދިވެހިން ގެނެސްފައެވެ.

ހާރިޖީ ވުޒާރާއިން ވަނީ ރިޕެޓްރިއޭޝަން ފްލައިޓްތަކުން ޖާގަ ލިބުމުން އެފުރުސަތު ބޭނުން ނުހިފާކަން ފާހަގަކޮށް، ފުރުސަތު ތަކަކީ ބޭނުން އިރަކު ލިބޭނެ ފުރުސަތެއް ނޫންކަމުން، ފްލައިޓްތައް އޮންނަ ތާރީޚުތަކުގައި ރާއްޖެއަށް ވަޑައިގަންނަވަން ޖެހޭ ފަރާތްތަކުން ރާއްޖެއަށް ވަޑައިގަތުން އިލްތިމާސްކޮށްފައެވެ.

ހާރިޖީ ވުޒާރާއިން ބުނެފައިވަނީމ އެންމެ ފަހުން ލަންކާއިން އައި ފްލައިޓްގައިވެސް ގިނަ އަދަދެއްގެ ހުސް ޖާގަ ހުރިކަމަށާއި އެހެންނަމަވެސް އަނެއްކާވެސް އަނބުރާ އަންނަން ބޭނުންވެގެން ލަންކާގައި ތިބި ބައެއް ދިވެހިން އެދެމުންދާކަމަށެވެ.