ދައުލަތުގެ ބަޖެޓަށް އެއް ބިލިޔަން ޑޮލަރުގެ އުނިކަމެއް އަންނާނެ: ރައީސް
17 ޖޫން 2020 | ބުދަ 15:18ޓާސްކްފޯސްގެ މަސައްކަތްތައް ރޭވިފައިވާ ގޮތުގައި މައުލޫމަތު އޮޅުންފިލުއްވި
ނިއުނޯމަލްގެ އުސޫލުތަކާއި އެކު ކުރިޔަށް ދިޔަ ނެޝަނަލް ޓާސްކްފޯރސް އޮން ރެސިލިއަންސް ބިލްޑިންގް އެންޑް އިކޮނޮމިކް ރިކަވަރީ ބައްދަލުވުމުގެ ތެރެއިން
ކޮވިޑް-19 އާ ގުޅިގެން ދައުލަތުގެ ބަޖެޓަށް އެއް ބިލިޔަން ޑޮލަރުގެ އުނިކަމެއް އަންނާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު އެހެން ވިދާޅުވީ، "ނެޝަނަލް ޓާސްކްފޯރސް އޮން ރެސިލިއަންސް ބިލްޑިންގް އެންޑް އިކޮނޮމިކް ރިކަވަރީ"ގެ ފުރަތަމަ ބައްދަލުވުމުގައެވެ. ބުދަ ދުވަހު ރައީސް އޮފީހުގައި ކުރިޔަށްގެންދިޔަ ބައްދަލުވުމުގައި، ޓާސްކްފޯސްގެ މަސައްކަތްތައް ރޭވިފައިވާ ގޮތުގައ މައުލޫމަތު ރައީސް ސޯލިހު އޮޅުންފިލުއްވިއެވެ.
އެ ބައްދަލުވުމުގައި ޓާސްކްފޯސް ގައި ހިމެނޭ ތިން ވަރކިންގ ގްރޫޕްކަމަށްވާ، ވަރކިންގް ގްރޫޕް އޮން ފައިނޭންސް، ވަރކިންގް ގްރޫޕް އޮން އިކޮނޮމިކް ރިކަވަރީ އަދި ސޯޝަލް ސެކްޓަރގެ ވަރކިންގް ގްރޫޕުން، އެ ގްރޫޕުތަކާއި ޙަވާލުވެފައިވާ ދާއިރާތަކުގެ ކަންކަން ކުރިޔަށް ގެންދަވަން ރާއްވަވާފައިވާ ގޮތްތަކާއި ބެހޭ ޕްރެޒެންޓޭޝަންތައް ހުށަހެޅުއްވިއެވެ.
އެގޮތުން ހުށަހެޅުއްވި ޕްރެޒެންޓޭޝަން ތަކުގައި ހިމެނޭ ކަންތައްތަކުގެ ތެރޭގައި ކޮވިޑާ ގުޅިގެން ދިމާވި ދަތިތަކާއެކު ބަޖެޓު ރިވައިސްކޮށް މާލީ ކަންކަން ކުރިޔަށް ގެންދިއުމަށް ރޭވިފައިވާ ގޮތްތަކާއި، އިގްތިސާދު ނެގެހެއްޓުމާއި، އިގްތިސާދު ކަންކަން ކުރިޔަށް ގެންދިއުމުގައި އެންމެ މުހިންމުކަން ދޭނެ ދާއިރާތަކާއި އަދި މަސައްކަތްތައް ކުރިއަށް ގެންދިއުމަށް ރޭވިފައިވާ ގޮތްތަކާ ބެހޭގޮތުންނާއި، ސޯޝަލް ސެކްޓަރއިން ސިއްހި ދާއިރާ ވަރުގަދަކުރުމާއި، އެހީތެރިކަން ބޭނުންވާ ފަރާތްތަކަށް އެހީފޯރުކޮށްދިނުމާއި އަދި ސްކޫލުތައް ހުޅުވުމުގެ މަސައްކަތްތައް ކުރިޔަށްގެންދިއުމަށް ރޭވިފައިވާ ގޮތްތައް ހިމެނޭ ކަމަށް ރައީސް އޮފީހުން މައުލޫމާތުދެއެވެ.
ޓާސްކްފޯސް އުފެއްދެވުމުގެ މަގުސަދުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވަމުން ރައީސް ސޯލިހު ވަނީ، މިހާރު ބައްޔާ ގުޅިގެން ކުރިމަތިވެފައިވާ އިގްތިސާދީ ހާލަތުން އަރައިގަތުމަށް މަސައްކަތްކުރުމުގެ ފުރުސަތު ލިބިފައިވާކަން ފާހަގަކުރައްވާފައެވެ.
ބައްޔާ ގުޅިގެން އިގްތިސާދީ ގޮތުން ލިބުނު ގެއްލުންތައް ދައުލަތުގެ އިތުރުން އަމިއްލަ ފަރާތްތަކަށްވެސް ލިބިފައިވާކަން ފާހަގަކުރައްވައި އެގޮތުން އެއް ބިލިޔަން ޑޮލަރުގެ އުނިކަމެއް ދައުލަތުގެ ބަޖެޓަށްވެސް އަންނާނެ ކަމަށް ރައީސް ވިދާޅުވިއެވެ. އެހެންކަމުން މިކަންކަމުން އަރައިގަތުމަށް ބަޖެޓުގެ ހަރަދުތަކާއި އާމްދަނީ އަލުން ދިރާސާކޮށް އެކުލަވާލަން ޖެހޭކަންވެސް އެމަނިކުފާނު ފާހަގަކުރެއްވިއެވެ.
ޓާސްކްފޯހުގައި ކުރައްވަމުން ގެންދަވާ މަސައްކަތްތަކުގެ މައްޗަށް އަލިއަޅުއްވާލައްވަމުން ރައީސް ވަނީ ވަރަށް އަވަހަށް ރާއްޖޭގެ ބޯޑަރުތައްވެސް ހުޅުވާލައި ފަތުރުވެރިކަން ފެށުމަށް ސަރުކާރުން މަސައްކަތްކުރައްވަމުން ގެންދަވާކަން ފާހަގަކުރައްވާފައެވެ.
ޓާސްކްފޯސްގައި ހިމެނޭ ތިން ވަރކިންގ ގްރޫޕުން ހިއްސާކުރެއްވި ތިން ޕްރެޒެންޓޭޝަނުގެ އިތުރުން ރާއްޖޭގެ ޓޫރިޒަމް ހުޅުވާލުމާ ބެހޭ ގައިޑުލައިންގެ ކަރުދާސް ޓޫރިޒަމް މިނިސްޓަރު އަލީ ވަހީދު ހުށަހެޅުއްވިއެވެ.
ޓާސްކްފޯސްގެ ބައްދަލުވުމުގައި ތިން ވަރކިންގ ގުރޫޕުން ހުޅަހެޅުއްވި ހުށަހެޅުންވުންތަކާއި އަދި ބުދަ ދުވަހު ހުށަހެޅުއްވި ރާއްޖޭގެ ފަތުރުވެރިކަން އަލުން ހުޅުވާލުމާ ބެހޭ ގައިޑްލައިންއާ މެދު ދެން ބާއްވަވާ ބައްދަލުވުމުގައި ގޮތެއް ނިންމަވާނެކަން އިޢުލާނުކުރައްވާފައެވެ.
