2008 ވަނަ އަހަރުގެ ސާފް ޗެމްޕިއަންޝިޕްގެ ތަށި ރާއްޖެއަށް ހޯދުނީ އެތައް ޖީލަކާއި އެތައް ބަޔަކު ފުޓްބޯޅައަށް ކޮށްދީފައިވާ ބުރަ މަސައްކަތުން ކަމަށާއި މިއަދުވެސް ދިވެހި ގައުމަށް ބުނެލަން ބޭނުން ވަނީ 12 ވަނަ ކުޅުންތެރިޔާ ޓީމުގެ ފަހަތުގައި ތިބުމަށް ކަމަށް، އޭރު ގައުމީ ޓީމުގައި ހިމެނުނު ކުޅުންތެރިން ބުނެފިއެވެ.

ސަރަހައްދީ ބޮޑު ބާރު އިންޑިއާ ބަލިކޮށް ދިވެހިން އުފަލުން ރޮއްވާލި ތަށި ގެނައިތާ 12 އަހަރު ވެފައިވާއިރު، އެ ހަނދާންތަކާއި ގުޅޭ ގޮތުން ރާއްޖެޓީވީގެ ކުޅިވަރު ފައިލް ޕްރޮގްރާމްގައި ވާހަކަ ދައްކަމުން ރާއްޖޭގައި މިހާތަނަށް އުފެދުނު އެންމެ އިތުބާރު ގޯލްކީޕަރު އަދި ސާފް ޗެމްޕިއަންޝިޕްގެ ތަށި ރާއްޖެއަށް ގެނައިރު، ގޯލު ބެލެހެއްޓި އިމްރާން މުޙައްމަދު ބުނީ ރާއްޖޭގެ ފުޓްބޯޅައިގެ މުސްތަގުބަލް ވަރަށް އުޖާލާ ކަމަށާއި މިހާރުގެ ކުޅުންތެރިންނަށް ދިވެހިން ފަޚުރުވެރިވާނެ އެތައް ކާމިޔާބެއް ހޯދޭނެ ކަމަށެވެ.

ތިޔަބޭފުޅުންގެ ގައުމީ ޓީމު އަދިވެސް އެބައޮތް ކަމަށާއި، އެ ޓީމަށް އިތުރު ކާމިޔާބުތައް ހޯދޭނީ ސަޕޯޓަރުން ޓީމުގެ ފަހަތުގައި ތިބެގެންކަން ފާހަގަކުރަމުން އިމްރާން ބުނީ ޓީމަށް ހިތްވަރު ދިނުމުގައި އަބަދުވެސް ސަޕޯޓަރުން ތިބުމަށް އެދޭ ކަމަށެވެ.

ގައުމީ ޓީމުގެ ގޯލު 17 އަހަރު ބެލެހެއްޓިއިރު، 2008 ވަނަ އަހަރުގެ ސާފްޗެމްޕިއަންޝިޕް ފުޓްބޯޅަ މުބާރާތަކީ އެންމެ ތަފާތު ތަޖުރިބާއެއް ކުރަން ޖެހުނު މުބާރާތް ކަމަށާއި ޓީމުގެ ހާލަތު ގޯސްވެ، އެއް ކުޅުންތެރިއަކު އަނެއް ކުޅުންތެރިއަކާއި ވާހަކަ ނުދައްކާ ދުވަސްތަކެއް ހޭދަކުރަން ޖެހުނު ކަމަށް އިމްރާން ވަނީ ބުނެފައެވެ. އަދި ސެމީފައިނަލް މެޗު ގަލޮޅު ދަނޑުގައި ކުޅެލަން ނުލިބުމުން އެކަމާއި ގިނަ ބަޔަކު މާޔޫސްވި ކަމަށާއި، އެހެން ނަމަވެސް އެ މެޗު ލަންކާގައި ކުޅެން ޖެހުމަކީ ވެސް ގައުމީ ޓީމަށް ކުރިމަތިވި ރަނގަޅެއް ކަމަށް އިމްރާން ބުންޏެވެ.

މި ޕްރޮގްރާމުގައި ވާހަކަ ދައްކަމުން ގޯލްޑް ކެޕްޓަން އަސްއަދު އަބްދުލް ޣަނީ ބުނީ ގައުމީ ދިދައަށާއި ގައުމީ ޖާޒީއަށް ކުޅުންތެރިންގެ ހިތުގައި އޮންނަ ލޯބި އިތުރު ކުރުމަށާއި، ގައުމީ ޖާޒީ ލުމަކީ އެހާ ފަސޭހަ އަދި އެހާ ކުޑަކަމެއް ކަމަށް އެއްވެސް ކުޅުންތެރިއަކު ނުދެކުމަކީ އާދޭހެއް ކަމަށެވެ. މިހާރުގެ ފުޓްބޯޅަ ޖީލުގެ ކުޅުންތެރިންނަކީ ހުނަރުގެ ގޮތުން މާ މަތީ ކުޅުންތެރިންނަށް ވާއިރު، އެ ކުޅުންތެރިންނަށް ގައުމަށް އެތައް ކާމިޔާބެއް އަދި ހޯދޭނެ ކަމަށް އަސްއަދު ވަނީ ބުނެފައެވެ.

ރާއްޖެ އާއި ސްރީލަންކާގައި ބޭއްވި ސަރަހައްދީ އެންމެ ބޮޑު ފުޓްބޯޅަ މުބާރާތުގެ ހަނދާންތައް އާ ކުރަމުން އަސްއަދު ބުނީ 2008 ވަނަ އަހަރަކީ ކުޅިވަރު ހަޔާތުގައި އައި އެންމެ އުފާވެރި އަހަރު ނަމަވެސް، އެ އަހަރަކީ ގައުމީ ޓީމުގައި ހޭދަކުރި ދުވަސްތަކުގައި އެންމެ ގޯސްކޮށް ކަންތައްތައް ދިމާވެގެން ދިޔަ އަހަރު ކަމަށެވެ.

މި ޕްރޮގްރާމުގައި ވާހަކަ ދައްކަމުން 2008 އަހަރުގެ ސާފް ޗެމްޕިއަންޝިޕް ޕްރޮމޯޓް ކުރުމާއި ގައުމީ ޓީމު ޕްރޮމޯޓް ކުރުމަށް އެކުލަވާލި މާކެޓިންގ ކޮމިޓީގައި އިސް މަސައްކަތްތަކެއް ކުރި މަޝްހޫރު ކޯޗު އަލީ ސުޒޭން ބުނީ މުޅި ގައުމު އުފަލުން ފޮޅުވާލި މީގެ 12 އަހަރުގެ ހަނދާންތަކީ ފުޓްބޯޅައިން މިހާތަނަށް މުޅި ގައުމަށް އައި އެއްމެ ބޮޑު ޢީދު ކަމަށާއި، އެ ހަނދާންތަކުގެ ވާހަކަ މިއަދު ދައްކާއިރު އަދިވެސް ދިވެހި ގައުމުގެ ކިބައިން އެދެނީ އެ ރޫހުގައި ނުކުތުމަށް ކަމަށެވެ.

ސާފް ޗެމްޕިއަންޝިޕްގެ ތަށި ރާއްޖެއަށް ގެނައިއިރު އެޓީމުގައި ތިބި އޮފިޝަލުން ކަމަށްވާ އިހުސާން އަބުލް ޣަނީ އާއި މުޙައްމަދު ޝިޔާޒް އާއި މުޙައްމަދު ހާނިމަކީ މުހިންމު ދައުރެއް އަދާކުރި ފަރާތްތަކެއް ކަމަށާއި ކޯޗާއެކު ޓީމުގައި ހުރި ހުރިހާ މައްސަލަތަކެއް އެ ބޭފުޅުން ހައްލު ކުރެއްވީ ވަރަށް ފުރިހަމައަށް ކަމަށް 12 އަހަރުގެ ހަނދާންތައް އާ ކުރަމުން ސުޒޭން ބުންޏެވެ.

ފައިނަލް މެޗުގެ ހަނދާންތައް އާ ކުރަމުން އަސްއަދު އަދި އިމްރާން ބުނީ އެ ދުވަހު ދަނޑުމަތީގައި ހުރެ، ކުރެވުނު އިހުސާސް އެއީ ފުޓްބޯޅައިގެ ހަޔާތުގައި ކުރިމަތިލާން ޖެހުނު އެންމެ ތަފާތު އަދި އެއްމެ ދުނދަގޫ ހާލަތު ކަމަށެވެ. މުޚުތާރުގެ ލަނޑަށްފަހު އިތުރު ވަގުތާއެކު ކުޅެވުނީ ހަ މިނެޓު ކަމަށާއި، އެހެން ނަމަވެސް އެ ހަ މިނެޓަކީ 30 މިނެޓް ކަމުގެ އިހުސާސް ވެހެންދިޔަ ކަމަށް ދެ ކުޅުންތެރިން ވަނީ ބުނެފައެވެ.

ސަރަހައްދީ ރަން ތައްޓަކަށް ދިވެހިން އެދި އެދި ތިބިއިރު، ހަތަރު އަހަރު ތެރޭ ޕެނަލްޓީ ޖަހައިގެން ރާއްޖެ ދެ ފަހަރަށް ފައިނަލުގައި ބަލިވެފައިވެއެވެ. ރާއްޖޭގެ ފުޓްބޯޅައަށް 50 އަހަރު ފުރިގެން 2000 ވަނަ އަހަރު ބޭއްވި ގޯލްޑަން ޖުބިލީ ފުޓްބޯޅަ މުބާރާތުގެ ފައިނަލުން ބަލިވީ ޕެނަލްޓީ ޖަހައިގެން ލަންކާ އަތުންނެވެ. 2003 ވަނަ އަހަރުގެ ފައިނަލުގައި ޕެނަލްޓީ ޖަހައިގެން ސްރީލަންކާ އަތުން ބަލިވުމުން ދިވެހިން އެ ދުވަހު ވެސް ކަރުނައެޅީ ރަން މެޑެއްޔަށް ބޭނުންވެފައި ތިބި ވަރުންނެވެ.

ބަންގްލަދޭޝް އާއި ދެކޮޅަށް ރާއްޖެ ކުޅުނު ފައިނަލް މެޗުގެ ފުރިހަމަ ވަގުތު 1-1 އެއްވަރުވެ، ގޯލްޑަން ގޯލުން ނަތީޖާ ނެރުމަށް ކުޅުނު ދެ ހާފުގައިވެސް ލަނޑެއް ނުޖެހުމުން، ޕެނަލްޓީއަށް ގޮސް ރާއްޖެ ބަލިވީ 5-3 ގެ ނަތީޖާއަކުންނެވެ.

ލަންކާ އާއި ރާއްޖޭގައި 2008 ވަނަ އަހަރު ބޭއްވި ސާފް ޗެމްޕިއަންޝިޕްގެ ފައިނަލް މެޗުގައި، އިންޑިއާ ކޮޅަށް ރާއްޖެ ކުޅުނު މެޗު ބަލަން ލަންކާގެ ސުގަތަދާތަ ސްޓޭޑިއަމަށް ވަން ދިވެހިންގެ އަދަދު 10،000ށް ވުރެން ގިނައެވެ. ދިވެހިންގެ ހިތްތަކާއި ކުޅެލި ލަނޑު މެޗު ނިމެން ދެ މިނެޓަށް ވެފައި ވަނިކޮށް މުޚުތާރު ނަސީރު (ޓޫކިލޯ) ބާރު އުންޑައެއްހެން ވައްދާލުމާއެކު 10،000 ދިވެހި ސަޕޯޓަރުންގެ ސަޕޯޓުގެ އަޑުން މުޅި ސްޓޭޑިއަމް ގުޑުވާލިއެވެ.

ރާއްޖެއިން 2008 ގެ ސާފް ޗެމްޕިއަންޝިޕްގެ ޗެމްޕިއަންކަން ހޯދާފައިވަނީ ސިޔާސީ ގޮތުން ވަރަށް ހަލަބޮލި ސިޔާސީ ފިކުރާއެކު ބައިބައިވެފައިވީ ދުވަސްވަރެއްގައެވެ. ރިޔާސީ އިންތިޚާބު ގާތްވެ، ވަރަށް ފޯރިއާއެކު ސިޔާސީ ކަންކަން އޭރުވެސް މުޅި ރާއްޖޭގައި ކުރިޔަށްދިޔައެވެ. އެހެން ނަމަވެސް އެ ހުރިހާ ބައިބައިވުމާއެކުވެސް އެއްބައިވަންތަކަން ގެނެސްދިން ކަމަކީ ފުޓްބޯޅައެވެ. ސާފް ޗެމްޕިއަންޝިޕެވެ.