ރައީސް ނަޝީދުގެ ދަތުރުފުޅަކަށް އޭސީސީން ދައްކަން ބުނި، 444ރ ދައްކައިފި
މިމައްސަލަ އޭސީސީން މަޖިލީހުގެ އިދާރާއަށް ފޮނުވުމުން، މަޖިލީހުގެ މެމްބަރުންނާ ހިއްސާ ކުރައްވަފައިވަނީ ފެބްރުއަރީ މަހުގެ 19 ވަނަ ދުވަހުގެ ޖަލްސާގައި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު: އެމްޑީޕީގެ ދަތުރެއްގައި، ދައުލަތުގެ މުވައްޒަފުންނާއި ވަސީލަތްތައް ބޭނުން ކުރެއްވި ކަމަށްބުނެ، 444ރ ދައްކަން އޭސީސީން ވަނީ މަޖިލީހުގެ އިދާރާއަށ
ރައްޔިތުންގެ މަޖިލީހުގެ ރައީސް، އަދި ކުރީގެ ރައީސް މުހައްމަދު ނަޝީދުގެ ދަތުރުފުޅަކަށް އެންޓި ކޮރަޕްޝަން ކޮމިޝަން (އޭސީސީ) އިން ދައްކަން އެންގި، 444ރ (ހަތަރުސަތޭކަ ހަތަރު ރުފިޔާ) ދައްކަވައިފި އެވެ.
މިހާރު ހިނގަމުންދާ 19 ވަނަ ރައްޔިތުންގެ ފުރަތަމަ ދައުރުގެ މަޖިލީހުގެ މަސައްކަތްތަކާ ގުޅޭ މައުލޫމާތު ހިއްސާކޮށްދެއްވުމަށް ރައްޔިތުންގެ މަޖިލީހުގެ އިދާރާގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މަޖިލީހުގެ ރައީސް، ރައީސް ނަޝީދު ވަނީ އެފައިސާ ދައްކަވާފައިވާ ކަމަށް ވިދާޅުވެފަ އެވެ.
މައުލޫމާތު ލިބިފައިވާ ގޮތުގައި، އެފައިސާ އޭސީސީއަށް ދައްކާފައިވަނީ ފެބްރުއަރީ މަހުގެ 23 ވަނަ ދުވަހު އެވެ. އަދި އެފައިސާ ދައްކާފައިވަނީ މަޖިލީހުގެ އިދާރާއިން ކަމަށްވެސް ވެއެވެ.
އޭސީސީން ތަހުގީގުކޮށްފައިވަނީ ރައީސް ނަޝީދު، އެމްޑީޕީގެ ދަތުރެއްގައި، ކުރައްވާ އަމިއްލަފުޅު ދަތުރުތަކުގައި ދައުލަތުގެ މުވައްޒަފުންނާއި ވަސީލަތްތައް ބޭނުންކުރައްވައިގެން ރަސްމީ ދަތުރެއްގެ ގޮތުގައި މަޖިލީހުގެ ރަސްމީ މީޑިއާ ބޭނުންކޮށްގެން ކަވަރު ކުރަމުންދާ މައްސަލައެވެ. މި މައްސަލައާއި ގުޅިގެން އޭސީސީން މަޖިލީހަށް ފޮނުވި "އިސްލާހު ކުރުމަށް އަންގާ އެންގުން" މިއަހަރުގެ ފެބްރުއަރީ 19 ވަނަ ދުވަހުގެ ޖަލްސާގައި ރައީސް ނަޝީދު ވަނީ މެމްބަރުންނަށް އިއްވަވާ ދެއްވާފައެވެ.
އޭސީސީން ބުނެފައިވަނީ 31 އޮކްޓޫބަރު 2019 ގައި ގއ. ވިލިނގިލީގައި ބޭއްވި "ދެކުނު މަހާސިންތާ" ނިންމާލުމަށްފަހު ކޫއްޑޫއިން މާލެ އައި މަޖިލީހުގެ ދެ މުވައްޒަފުންގެ ޓިކެޓަށް، މީހަކަށް ޙަރަދުކޮށްފައިވަނީ 1,222.00ރ (ބާރަ ސަތޭކަ ބާވީސް ރުފިޔާ) ކަމަށް ފާހަގަވެފައިވާ ކަމަށެވެ. އެގޮތުން މަހާސިންތާ ނިންމާލުމަށްފަހު ރައްޔިތުންގެ މަޖިލީހުގެ ރައީސް ފުވައްމުލަކު ސިޓީ އާއި އައްޑޫ ސިޓީއަށް ކުރި ދަތުރުގައި ބައިވެރިވި ރައްޔިތުންގެ މަޖިލީހުގެ ރައީސް ނަޝީދުގެ ހަށިފާރަވެރިންނާއި ޗީފް ބިއުރޯ އޮފިސަރ، ގަމުން މާލެ ދިއުމުގެ ޓިކެޓަށް ކޮންމެ މީހަކަށް 1,333,00ރ (ތޭރަ ސަތޭކަ ތިރީސް ތިން ރުފިޔާ) ޚަރަދުކޮށްފައިވާ ކަން ވެސް އެ ކޮމިޝަނުން ފާހަގަކޮށްފައި ވެއެވެ.
ނަމަވެސް އެ ދުވަސްވަރު ކޫއްޑޫއިން މާލެއަށް ކުރާ ދަތުރުތަކުގެ އަގަކީ މީހަކަށް 1,222.00ރ (ބާރަ ސަތޭކަ ބާވީސް ރުފިޔާ) ކަމަށާއި، މަހާސިންތާ ނިންމާލުމަށްފަހު ކޫއްޑޫއިން މާލެ ދިއުމުގެ ބަދަލުގައި މަހާސިންތާގެ ޕްރޮގްރާމްތަކުގެ ތެރޭގައި ނުހިމެނޭ ކަންކަމުގައި ބައިވެރިވުމަށް ފުވައްމުލަކު ސިޓީއާއި އައްޑޫ ސިޓީއަށް ދަތުރުކުރުމުގެ ސަބަބުން ޓިކެޓަށް އިތުރަށް ޚަރަދުކޮށްފައިވާ 444ރ ދައުލަތަށް އަނބުރާ ހޯދުމަށް އެ ކޮމިޝަނުން އަންގާފައި ވެއެވެ. އަދި އެފައިސާ ހޯދުމަށްފަހު އެކަން އެ ކޮމިޝަނަށް އެންގުމަށް މަޖިލީހުގެ އިދާރާއަށް އަންގާފައިވެއެވެ.
އެކަމާއި ގުޅިގެން ރައީސް ނަޝީދު ވިދާޅުވީ އޭސީސީގެ މި ނިންމުމަށް ދެކޮޅު ހައްދަވަން ބޭނުންފުޅު ނުވާކަމަށެވެ. ނަމަވެސް މަޖިލީހުގެ މެމްބަރުން އެދިވަޑައިގަންނަވާ ގޮތަކަށް މިމައްސަލާގައި އަމަލު ކުރައްވާނެ ކަމަށް ވިދާޅުވެފައި ވެއެވެ.
