ރައީސް ވަހީދު ދޮގު ހައްދަވައި އާންމު މީހާއަށް އިތުރު އަނިޔާއެއް ދޭން އުޅުއްވާ ކަމަށްބުނެ މަޖިލީހަށް ކުއްލި މައްސަލަ އެއް
15 ޖޫން 2020 | ހޯމަ 05:25މިމައްސަލަ މަޖިލީހަށް ހުށަހެޅުއްވީ އުނގޫފާރު ދާއިރާގެ އެމްޑީޕީ މެމްބަރ މުހައްމަދު ވަހީދު
ކުރީގެ ރައީސް ޑރ. މުހައްމަދު ވަހީދު ހަސަން މަނިކު
ކުރީގެ ރައީސް ޑރ މުހައްމަދު ވަހީދު ހަސަން މަނިކު އާއި އާއްމު ރައްޔިތަކާ ދެމެދު ހިނގި ދެބަސްވުމެއްގެ ތެރޭގައި އޭނާއަށާއި އަނބިކަނބަލުންނަށް ހަމަލާދިންކަމަށް ބުނެ، ހަގީގަތާއި ޚިލާފު އިލްޒާމުތަކެއް އަޅުވައި އެމައްސަލަ ފުލުހުންނަށް ހުށަހަޅައި އާންމު ރައްޔިތު މީހާއަށް ނުހައްގުން އިތުރު އަދަބެއް ދިނުމަށް މަސައްކަތް ކުރަމުންދާތީ މިކަން ސަރުކާރާއި މަޖިލީހުގެ ސަމާލުކަމަށް ގެނައުމަށް ރައްޔިތުންގެ މަޖިލީހަށް ކުއްލި މައްސަލަ އެއް ހުށަހަޅައި ބަހުސް ފަށައިފި އެވެ.
މިމައްސަލަ މަޖިލީހަށް ހުށަހެޅުއްވީ އުނގޫފާރު ދާއިރާގެ އެމްޑީޕީ މެމްބަރ މުހައްމަދު ވަހީދެވެ. ކުއްލި މައްސަލަ ހުށަހަޅުއްވަމުން ވަހީދު ވިދާޅުވީ ރާއްޖޭގައި ބޭއްވުނު އެންމެ ފުރަތަމަ ރިޔާސީ އިންތިޚާބުގައި ޑިމޮކްރަޓިކް އުސޫލުން ރައްޔިތުން އިންތިޚާބުކުރި ވެރިކަން 7 ފެބްރުއަރީ 2012 ގައި ބަޣާވާތަކުން ވައްޓާލުމަށްފަހު ވެރިކަމާ ހަވާލުވި ޑރ މުހައްމަދު ވަހީދު ހަސަން މަނިކު އާދިއްތަ ދުވަހުގެ ހެނދުނުގެ ވަގުތެއްގައި އާންމު ރައްޔިތަކާ ދެމެދު ހިނގި ދެބަސްވުމެއްގައި އޭނާ އަށާއި އަނބިކަނބަލުންނަށް ހަމަލާދިން ކަމަށް ބުނެ ދޮގު ހަދައި ހަގީގަތާއި ޚިލާފު އިލްޒާމުތަކެއް އަޅުވައި ބިރު ދައްކާފައިވާ ކަމަށެވެ.
މަޖިލީހަށް ހުށަހެޅުއްވި ކުއްލި މައްސަލައަށް ބަހުސްކުރަން ފެނޭތޯ ނެގުނު ވޯޓުގައި ބައިވެރިވެ ވަޑައިގެންނެވި 33 މެމްބަރުން ވަނީ މިމައްސަލައަށް ބަހުސްކުރުމަށް ފެންނަކަމަށް ވޯޓު ދެއްވާފަ އެވެ. އެއާއެކު މެމްބަރުން ގެންދަވަނީ އެމައްސަލައަށް ބަހުސް ކުރައްވަމުންނެވެ.
