އޮގަސްޓު އެކެއްގެ ނިޔަލަށް ކުނި ނަގާނީ ގޭބިސީތަކުގެ ތިރިން: ވެމްކޯ
15 ޖޫން 2020 | ހޯމަ 03:17ހިދުމަތް ދެމުންދަނީ 12:00ން 14:00ށް
ވެމްކޯގެ މުވައްޒަފުންތަކެއް ކުނި ނެގުމުގައި ހަރަކާތްތެރިވަނީ
އޮގަސްޓް އެކެއް ނިޔަލަށް، ކުނި ނަގަމުންދާނީ މާލެ ސަރަހައްދުގައިވާ ހުރިހާ އިމާރާތެއްގެ ތިރިން ކަމަށް ވޭސްޓު މެނޭޖްމެންޓް ކޯޕަރޭޝަން (ވެމްކޯ) އިން ބުނެފި އެވެ.
ވެމްކޯއިން އާދިއްތަ ދުވަހު ނެރެފައިވާ ބަޔާނެއްގައި ބުނީ، މާލޭގެ ލޮކްޑައުން އަށް އިތުުރު ލުއިތަކެއް ދިނުމާއި ގުޅިގެން ކުނި ނެގުމުގެ ހިދުމަތްތަކަށް ބަދަލުތަކެއް ގެންނަން ނިންމާފައިވާ ކަމަށެވެ. ވެމްކޯއިން ކުނި ނަގަމުންދާނީ ކުރިޔެކޭވެސް އެއްފަދައިން ކޮންމެ ދުވަހެއްގެ މެންދުރު 12:00 އާއި 14:00އާ ދެމެދު އެވެ. އަދި އެއްވެސް މުވައްޒަފަކު ކުނި ނެގުމަށް އިމާރާތުގެ ވަކިވަކި ފަންގިފިލާތަކަށް ނާރާނެ ކަމަށް ވެމްކޯއިން ބުނެ އެވެ.
ވެމްކޯއިން ވަނީ އެ ކުންފުނީގެ މުވައްޒަފުން އިމާރާތަށް ވަދެ ނިކުމެވޭނެ އިންތިޒާމް އެއް ދުރާލާ ހަމަޖެއްސުމަށް އެދިފައި އެވެ. މޮނިޓަރިންގައިވާ ގޭބިސީތަކުން ކުނި ނަގަމުން ދާނީ ކުރިއެކޭވެސް އެއްފަދައިން އެޗްޕީއޭ ގެ އިރުޝާދުގެ މަތިން އެ ކޯޕަރޭޝަންގެ ހާއްސަ ޓާސްކް ފޯހަކުންކަން ވެމްކޯއިން ވަނީ ފާހަގަކޮށްފަ އެވެ.
މަގުމަތީގައި ކުނި ބަހައްޓާއިރު މަގުގައި ދުއްވާ އެއްޗެއްސަށާއި ހިނގާ މީހުންނަށް ދަތިނުވާ ގޮތަށް މަގުމަތީގައި އެއްފަރާތެއްގައި ކުނި ބެހެއްޓުމަށް ވެސް ވެމްކޯއިން ވަނީ މީގެ ކުރިން ތަކުރާރުކޮށް އިލްތިމާސްކޮށްފަ އެވެ.
