މާލޭ ލުއި ޖަލަށް ރޯދަ ވީއްލުމަށް ގެނައި ތަކެތި ކުނިވެފައި ހުންނާތީ ގައިދީން ހަޅުތާލުކުރަނީ!
މައުލޫމާތު ލިބޭގޮތުގައި ގައިދީން މިހާރުވެސް ދަނީ ހަޅުތާލުކުރަމުން
މާލޭ ޖަލު - ޖަލުތަކުގައި ބައެއް ޒަރޫރީ ޚިދުމަތްތައް ލިބެން ނުހުންނަކަމުގެ ޝަކުވާ ގައިދީން ކުރޭ
މާލޭގައި ހުންނަ ލުއި ޖަލަށް ރޯދަ ވީއްލުމަށް ގެނައި ތަކެތި ކުނިވެފައި ހުންނާތީ ބަންދުގައިތިބި ގައިދީން ހަޅުތާލުކުރަން ފަށައިފިއެވެ.
ރާއްޖެޓީވީއަށް މައުލޫމާތު ދިން ޖަލު ބަލަހައްޓާ އޮފިޝަލަކު ވިދާޅުވީ، ރޯދަ ވީއްލުމަށް ގެނައި ތަކެތި ކުނިވެފައި ހުންނަކަމަށް ބުނެ، މާލޭ ލުއި ޖަލުގައި ގައިދީންތަކެއް ހަޅުތާލު ކުރަންފަށާފައިވާ ކަމަށެވެ.
ގައިދީންގެ މި ހަޅުތާލާއި ގުޅިގެން މޯލްޑިވްސް ކަރެކްޝަނަލް ސާވިސްގެ މީޑިއާ އޮފިޝަލްއަށް ގުޅާލުމުން ވިދާޅުވީ، އެއްވެސް ޖަލެއްގައި ހަޅުތާލެއް ނުކުރާ ކަމަށެވެ. އަދި އެއީ ދޮގު ވާހަކައެއް ކަމަށް އޮފިޝަލް ވިދާޅުވި އެވެ.
ރާއްޖެޓީވީއަށް މައުލޫމާތުދެއްވަމުން ޖަލަށް ކާބޯތަކެތީގެ ހިދުމަތް ފޯރުކޮށްދޭ ފަރާތުން ބުނީ ކާބޯތަކެތީގެ އެއްވެސް މައްސަލައެއް ނޫޅޭނެ ކަމަށާއި، އެއީ ބަޔަކު ފަތުރައިގެން އުޅޭ އަޑެއް ކަމަށެވެ. އަދި އެއީ މިހާރު ޖަލަށް ކާބޯތަކެތީގެ ހިދުމަތް ފޯރުކޮށްދޭ ފަރާތުންގެ އަތުން އެ ހިދުމަތް ދިނުން އަތުލުމަށް ފަތުރައިގެން އުޅޭ އަޑެއް ކަމަށް އެ ފަރާތުން ބުންޏެވެ.
ރޯދަވީއްލުމަށް ގެނައި ތަކެތި ކުނިވެފައި ހުރުމުން މާލޭ ލުއި ޖަލުގައި ހަޅުތާލުކުރަމުންދާކަމުގެ މައުލޫމާތު ލިބިފައިވާއިރު، ޖަލުތަކުގައި ކާންދޭން ތަކެއްޗާއި އަދި ލިބެން ހުންނަ ބައެއް ޒަރޫރީ ޚިދުމަތްތައް ލިބުމުގައި ދަތިތައް ދިމާވަމުންދާކަމަށްބުނެ ބަނޑުހައިހޫނުކަމުގެ ހަޅުތާލުކޮށްފައި ވާކަމުގެ މައުލޫމާތު ކުރިންވެސް ވަނީ ލިބިފައެވެ. އެގޮތުން މިދިޔަ މާޗް މަހުގެ ތެރޭގައި މާފުށީ ޖަލުގައި ތިބި ބައެއް ގައިދީން ވަނީ ބަޑުހައިހޫނުކަމުގެ ހަޅުތާލެއްކޮށްފައެވެ. އެފަހަރު ހަޅުތާލުކުރަނީ ޖަލުގައި އެމީހުންނަށް ލިބެންޖެހޭ ބަހެއް ހިދުމަތްތައް އެންމެ ރަނގަޅުގޮތުގައި ނުލިބޭތީ ކަމަށް ބުނެ އެވެ. އެގޮތުން ޑޮކްޓަރަށް ދެއްކުމުގައިވެސް ގައިދީންނަށް ދަތިތައް ހުރިކަން ރާއްޖެޓީވީއާ ވާހަކަ ދެއްކި ގައިދީއަކު ވަނީ ބުނެފަ އެވެ.
