ގަވާއިދާ ހިލާފަށް ކުނި އުފުލާ ފަރާތްތަކާ މެދު ފިޔަވަޅު އެޅުން އެއް މަސް ދުވަހަށް ފަސްކުރުމަށް ނިންމާފައިވާ ކަމަށް އެންވަޔަރަމެންޓް މިނިސްޓްރީ އާއި ވޭސްޓް މެނޭޖްމެންޓް ކޯޕްރޭޝަން (ވެމްކޯ) އިން ބުނެފިއެވެ.

ގަވާއިދާ ހިލާފަށް ކުނި އުފުލާ ފަރާތްތަކާ މެދު ފުލުހުން މެދުވެރިކޮށް ފިޔަވަޅު އަޅާނެ ކަމަށް އެންވަޔަރަމަންޓް މިނިސްޓްރީން ކުރި ބުނެފައި ވީ ނަމަވެސް އެ އިދާރާއިން ބުރާސްފަތި ދުވަހު ނެރުނު ނޫސްބަޔާނުގައި ބުނެފައި ވަނީ ގަވާއިދާ ޚިލާފަށް ކުނި އުފުލާ ފަރާތްތަކާ މެދު ޖުލައި 1، 2017 ވަނަ ދުވަހުން ފެށިގެން ފިޔަވަޅު އަޅަން ނިންމާފައިވީ ނަމަވެސް ގިނަ ފަރާތްތަކަކުން މިމުއްދަތު އިތުރުކޮށްދިނުމަށް އެދެމުންދާ ކަމަށެވެ.

ވެމްކޯގެ ބަޔާނުގައި ބުނެފައި ވަނީ ވޭތުވެދިޔަ މެއި މަހުން ފެށިގެން، ރަޖިސްޓްރީ ވާން މުޅިމާލެއަށް ހުޅުވާލާފައިވީ ނަމަވެސް، ބައެއް ސަބަބުތަކާ ހުރެ، މިއަދާހަމަށް ގިނަ ފަރާތްތަކުން ވެމްކޯގެ ކުނިއުކާލުމުގެ ޚިދުމަތުގައި ރަޖިސްޓްރީ ނުވެ ތިބިކަން ފާހަގަކުރެވޭ ކަމަށެވެ. އަދި މިފަދަ ގިނަ ފަރާތްތަކުން ކުނި އުކާލުމުގެ ޚިދުމަތް ހޯދަނީ ޤަވާއިދާޚިލާފަށް މިމަސައްކަތް ކުރާ ބިދޭސީން ލައްވައިކަން ވެމްކޯ އިން ވަނީ ފާހަގަ ކޮށްފައެވެ.

މުއްދަތު އިތުރުކުރަން ނިންމީ ވެމްކޯގެ ކުނި އުކައިދިނުމުގެ ޚިދުމަތުގައި ރަޖިސްޓްރީ ވުމަށް ފުރުޞަތު ގިނަ ބަޔަކަށް ތަނަވަސްކޮށްދިނުމުގެ ގޮތުންނާއި އަދި މިފަދަ ޙާލަތެއްގައި މޯލްޑިވްސް ޕޮލިސް ސާރވިސަސް އިން ޤަވާޢިދާއި ޚިލާފުވާ ފަރާތްތަކާ މެދު ފިޔަވަޅު އަޅަން ފަށައިފި ނަމަ، ޢާންމުންގެ ގިނަބަޔަކަށް މިކަމުގެ ސަބަބުން ދަތިތަކެއް ކުރިމަތިވާނެ ކަމުގައި ފެންނަ ކަމަށް ބަޔާނުގައި ބުނެފައި ވެއެވެ.

އެހެން ކަމުން ރައްޔިތުންނަށް މިކަމުން ދިމާވެދާނެ ދަތިތަކަށް ލުޔެއްދިނުމުގެ ގޮތުން، ޤަވާޢިދާއި ޚިލާފަށް ކުނިއުފުލާ ފަރާތްތަކާ މެދު ފުލުހުން މެދުވެރިކޮށް ފިޔަވަޅު އަޅަން ފަށާ ތާރީޚު، 1 މަސްދުވަހުގެ މުއްދަތަށް ލަސްކޮށްލުމަށް ހަމަޖައްސައިފައިވާ ކަމަށް ވެމްކޯގެ ބަޔާނުގައި ވެއެވެ.

ވެމްކޯގެ ބަޔާނުގައި ބުނެފައިވާ ގޮތުގައި މިހާރު ހަމަޖެހިފައިވާ ގޮތުން ޤަވާއިދާއި ޚިލާފަށް ކުނި އުފުލާ ފަރާތްތައް މިފެށޭ ޖުލައި މަހުގެ 15 ވަނަ ދުވަހުން ފެށިގެން ހުއްޓުވައި ނަސޭހަތްދީ ހަނދާންކޮށްދީ، އެއަށްފަހު އެކަން ތަކުރާރުކުރާ ނަމަ، އިންޒާރުދީ، އަދި 1 އޯގަސްޓް 2017 ވަނަ ދުވަހުން ފެށިގެން ޤަވާޢިދާ ޚިލާފުވާ ފަރާތްތަކާމެދު ފިޔަވަޅު އަޅަން ފައްޓާނެ ކަމަށް ބަޔާނުގައި ބުނެފައި ވެއެވެ.

މިފަދައިން ފިޔަވަޅު އަޅަން ޖެހުމުގެ ސަބަބުން ދިމާވެދާނެ ދަތިތަކަކުން ސަލާމަތް ވުމުގެ ގޮތުން، އެންމެ ފަހު ވަގުތާ ޖެހެންދެން މަޑުކުރުމުގެ ބަދަލުގައި ވީއެންމެ އަވަހަކަށް ވެމްކޯގެ ކުނި އުކައިދިނުމުގެ ޚިދުމަތުގައި ރެޖިސްޓްރީވެ، ޤަވާޢިދާއި ޚިލާފަށް ކުނިއުކުމުގައި ޝާމިލްވާފަރާތްތަކުގެ ޚިދުމަތް ހޯދުން ހުއްޓާލުމަށް، އެންމެހާ ރައްޔިތުންނަށް ވެމްކޯ އިން ވަނީ އިއުތިމާސްކޮށްފައެވެ.

މީގެ އިތުރުން ވެމްކޯގެ ބަޔާނުގައި ބުނެފައި ވަނީ މާލޭގެ ގޭގެއިން ކުނި އުކާލުމުގައި ބޭނުންކުރާނެ އިކްއިޕްމަންޓް ގެނެސް މުވައްޒަފުން ހަމަޖައްސައި، މިޚިދުމަތް ދިނުމަށް ވެމްކޯ ފުރިހަމައަށް ތައްޔާރުވެފައިވާ ކަމަށެވެ. އެގޮތުން މާލޭގެ ކޮންމެ ސަރަޙައްދަކުން ވިޔަސް، އެކަމަށް އެދޭ ފަރާތްތަކުގެ ކުނި އެފަރާތްތަކުގެ ގޭގެއިން ނަގައިދިނުމުގެ ޚިދުމަތް ދިނުމަށް ވެމްކޯއިން ތައްޔާރަށް ތިބި ކަމަށް ވަނީ ބުނެފައެވެ.

ކުނި އުކާލުމުގެ ޚިދުމަތް ވެމްކޯއާ ހަވާލުކުރުމަށް ފަހު ކުނި އުކޭނެ ގަވާއިދެއް ވަނީ އެކުލަވާލާފައެވެ. އެ ގޮތުން ކުރިއަށް އޮތްތަނުގައި ކުނި އުކާ ސަރަހައްދަށް ވަދެވޭނީ ވެމްކޯގެ އިތުރުން އެކަމަށް ރަޖިސްޓްރީކުރާ ފަރާތްތަކަށެވެ.