ޕެންޑަމިކަށްފަހު ގަލްފްގެ ގިނަ ފަތުރުވެރިން އަންނަން ބޭނުންވަނީ ރާއްޖެއަށް
އެންމެ މަޤުބޫލު ޓްރެވަލް ޕެކޭޖްތަކުގެ ތެރޭގައި ރާއްޖެއަށް ކުރާ ދަތުރުތައް ހިމަނާފައިވޭ
ރާއްޖޭގެ ރިސޯޓެއް: ރާއްޖޭގެ ބޯޑަރު ހުޅުވާލަނީ ޖުލައި މަހު
ކޮވިޑް-19 ޕެންޑަމިކަށްފަހު ޤައުމުތަކުގެ ފަތުރުވެރިކަން އަލުން ހުޅުވާލާއިރު، ގަލްފްގެ ގައުމުތަކުގެ ގިނަ ފަތުރުވެރިން ޗުއްޓީ ހޭދަކުރުމަށް އަންނަން ބޭނުންވާ ގައުމަކީ ދިވެހިރާއްޖެކަމަށް ސާރވޭއަކުން ދައްކައިފިއެވެ.
މާކެޓިން ކުންފުންޏެއް ކަމަށްވާ އޭވިއާރެޕްސް އިން ކޮށްފައިވާ ސާރވޭގައި ގަލްފް ގައުމުތަކުގެ 94 ޓްރެވަލް އެޖެންސީއެއް ބައިވެރިވެ ފައިވާއިރު މި ޓްރެވަލް އޭޖެންސީތައް މެދުވެރިކޮށް އޯގަސްޓާއި ސެޕްޓެމްބަރު މަހަށް ވެސް ގިނަ އަދަދެއްގެ ޓޫރިސްޓުން ޝައުޤުވެރިވާ މަންޒިލެއްގެ ގޮތުގައި ފާހަގަކޮށްފައި ވަނީ ރާއްޖެއެވެ.
ޓްރެވެލް އޭޖެންސީތަކުން ހާއްސަ ޕްރޮމޯޝަނަލް އޮފާތައް އަންނަ ޖުލައި މަހުން ފެށިގެން ސެޕްޓެމްބަރަށް ކުރިއަށްދާއިރު މީގެ ތެރޭގައި ޓްރެވެލް ފުލް ޕެކޭޖުތަކާއި އެކޮމަޑޭޝަން އަދި ޓުއާތަކަށް ހާއްސަ ޕްރޮމޯޝަންތައް ވަނީ ހިމަނާފައެވެ. އަދި މީގެ ތެރެއިންވެސް އެންމެ މަޤުބޫލު ޓްރެވަލް ޕެކޭޖްތަކުގެ ތެރޭގައި ރާއްޖެއަށް ކުރާ ދަތުރުތައް ހިމަނާފައިވެއެވެ.
އޭވިއާރެޕްސް އިން ކޮށްފައިވާ ސާރވެގެ ލިސްޓް ގައި ހިމެނޭ ގައުމުތަކަށް ބަލާއިރު ލިސްޓްގެ އެއްވަނައިގައި ދިވެހިރާއްޖެ އޮތް އިރު ދެވަނައިގައި އޮތީ އަޒަރުބައިޖާނެވެ. އަދި ތިންވަނައިގައި އޮތީ ތުރުކީއެވެ. މީގެ އިތުރުން ޖޯޖިއާ، އޮސްޓްރިއާ، ޔޫއޭއީ، އޮސްޓްރޭލިއާ، ޖަރމަނީ، މެލޭޝިޔާ އަދި ސްރީލަންކާ ހިމެނެއެވެ.
ރާއްޖޭގެ ބޯޑަރުތައް ހުޅުވާލުމަށް ނިންމާފައިވަނީ، ޖުލައި މަހުއެވެ. ޖުލައި މަހު ބޯޑަރުތައް ހުޅުވާލައިއިރު، ރާއްޖެ އަންނަން ފަތުރުވެރިން އަތުން އެއްވެސް އިތުރު ފައިސާއެއް ނުނަގާނެ ކަމަށާއި، ކަރަންޓީނު ވާން ނުޖެހޭނެ ކަމަށް ސަރުކާރުން ވަނީ ހާމަކޮށްފައެވެ.
