މުޖްތަމައު އެއްބައިވަންތަ ކުރުމަށް ބަސްމަގު ރީތި ކުރަންޖެހޭ: ޚުތުބާ
12 ޖޫން 2020 | ހުކުރު 08:28ހެޔޮ ބަހަކީ ރަނގަޅު ނަފްސަކުން ނުކުންނަ ރީތި މަލެއް
ހުކުރު ޚުތުބާ އިއްވީ \'ހެޔޮބަސް ބުނުން\'\' މިމައުޟޫއަށް
މުޖްތަމައު އެއްބައިވަންތަ ކުރުމަށް ބަސްމަގު ރީތިކޮށް ކުރަންޖެހޭ ކަމަށާއި، ހިނިތުންވުމާ ރިވެތި އަހުލާގުން މީސްތަކުންގެ ލޯބި ލިބިގަތުމަށް ހުކުރު ޚުތުބާގައި ގޮވާލައިފިއެވެ.
''ހެޔޮބަސް ބުނުން'' މިމައުޟޫއަށް އިއްވި ޚުތުބާގައި ބުނީ ރިވެތި ހެޔޮ ބަހަކީ ރަނގަޅު ނަފްސަކުން ނުކުންނަ ރީތި މަލެއް ކަމަށާއި، ހަޔާތުގެ ހިނިތުންވުން ކަމަށެވެ. އަދި އެއީ ތުންފަތުގެ ހުވަނދު ކަމަށާއި، ޒަހަމްތަކުގެ ފަރުވާ ކަމަށެވެ.
ރިވެތި ހެޔޮ ބަހުން ހަށިގަނޑާއި ފުރާނައިގެ ޝިފާ ލިބޭއިރު އެއީ މީސްތަކުންގެ ހިތްތައް ހުޅުވައިދޭ ތަޅުދަނޑި ކަމަށް ޚުތުބާގައިވެއެވެ.
ހެޔޮ ބަހަކީ ހެޔޮކަން ބޮޑު ގަހެއް ފަދަ އެއްޗެއް ގޮތުގައި ސިފަ ކުރަމުން ޚުތުބާގައި ބުނީ އެ ގަހުގެ މަންޒަރު ރީތިވެފައި ވަސްމީރުވެ މޭވާ ފޮނިވާނެ ކަމަށެވެ. އަދި ދުވަހަކު ވެސް މޭވާ ހުސްނުވާނެ ކަމަށާއި، މި ފަދަ ގަހެއް ހެދުމަށް ރަނގަޅު ބިމަކަށް ބޭނުންވާ ކަމަށް ޚުތުބާގައިވެއެވެ.
ޚުތުބާގައި ބުނީ މި ރަނގަޅު ބިމަކީ ﷲ އަށް އަޅުކަން ކުރާ ޞާލިޙު މުއުމިނާގެ ނަފްސު ކަމަށާއި، ދަރިންނަކީ މިފަދަ ބަޔަކަށް ހެދުމަށް މަސައްކަތް ކުރަން ޖެހޭ ކަމަށެވެ. އެ ދަރިންގެ ހިތްތަކުގައި މި ފަދަ ބިމެއް ތައްޔާރު ކުރެވޭނީ އާއިލާ އާއި މަދްރަސާ އަދި ވެށިން ރަނގަޅު ތަރުބިޔަތެއް ފޯރުކޮށްދީގެން ކަމަށް ޚުތުބާގައިވެއެވެ.
ޚުތުބާގައި ބުނީ މި ތިން ވެށި، ނުރަނގަޅު ބިމެއް ފަދަ ތަނަކަށް ވެއްޖެ ނަމަ، ދަރިންގެ ހިތްތަކުގައި، ހެޔޮ ބަސް ބުނުމުގެ ގަހެއް ނުފަޅާނެ ކަމަށާއި، އެމީހުންގެ ސަބަބުން މުޖްތަމައު އެއްބައިވަންތަ ނުކުރެވޭނެ ކަމަށެވެ. އަދި އެ މީހުންގެ ކިބައިން ގައުމަށް ރަނގަޅު ޚިދްމަތެއް ވެސް ނުލިބޭނެ ކަމަށެވެ.
ކީރިތި ގުރުއާންގައިވާ ރިވެތި މިސާލެއް ދައްކަމުން ޚުތުބާގައި ބުނެފައިވަނީ، މާތް ﷲ ގެ ބަސްފުޅެއްގެ މާނައިގައި ވެއެވެ:
ޚުތުބާގައި ބުނީ ބުނެވޭ ބަހެއްގެ ސަބަބުން މީސްތަކުންގެ މެދުގައި ފިތުނަފަސާދަ އުފެދޭ ކަމަށާއި، އެބަހުގެ ސަބަބުން މީހުންނަށް މަގު އޮޅޭ ކަމަށެވެ. އަދި އެކަކު އަނެކަކާ ޖެހި މޫނުކެނޑޭ ގޮތް މެދުވެރިވާ ކަމަށާއި، ހައްގުގެ މަގަށް ހުރަސް އެޅޭ ކަމަށް ޚުތުބާގައި ބުނެފައިވެއެވެ.
އެހެންކަމުން މިފަދަ ކަންކަމަށް ސަމާލުވެ، އިސްލާމީ ތަރްބިޔަތު އުނގެނުމަށް ޚުތުބާގައި ގޮވާލެއްވިއެވެ. އަދި އިސްލާމީ އަދަބުތަކާއި އަހްލާގަށް އިންސާނާ ބޭނުން ވަނީ މިސަބަބުތަކާ ހުރެކެން ފާހަގަކޮށް ޚުތުބާގައި ބުނީ މުސްލިމް އަޅާ، އޭނާބުނާ ބަސްތަކާ މެދު ޒިންމާވާން ޖެހޭނެކަން ދަސްކޮށްދީ، އޭނާގެ ދުލުން ހެޔޮ ބަސްބުނުމަށް އާދަކޮށްދެނީ އިސްލާމީ ތަރުބިޔަތުން ކަމަށެވެ.
ދުލުން ބުނެ ދޫކޮށްލާ ބަހަކީ، ދުނިދަނޑީގައި ރުވައި ދޫކޮށްލާ ތީރެއް ފަދަ އެއްޗެއްކަން ސިފަކޮށް ޚުތުބާގައި ބުނީ އެއީ އަނބުރާ ގެނެވޭނެ އެއްޗެއް ނޫން ކަމަށެވެ. ދަށުން އަރައިގެން އަންނަ ޅަޖީލުތައް ނަކަލު ކުރާނީ މިއަދުގެ ޒުވާނުންގެ އުޅުންތަކާއި ގުޅުންތަކާއި ބަސްމަގާއި އަޅާފޭރާން ކަމުގައި ވާތީ ރިވެތި ބަހުން މުއާމަލާތް ކުރުން އާދައަކަށް ހަދަންޖެހޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މުޖްތަމައުގެ އަފްރާދުންނާއި މުއައްސަސާތަކުގެ މެދުގައި ކުރާ ބަހުސްތަކާއި ދޭ ރައްދުތަކުގައި، ބަސްމަގު ގެންގުޅެން ޖެހޭނީ އަދަބުވެރިކޮށް ކަމަށެވެ. އަދި ކުޅިވަރުގެ މައިދާން ތަކާއި މަސައްކަތުގެ މާޙައުލާއި އިޖްތިމާއީ އެހެނިހެން އެއްވުންތަކުގައި ޒުވާނުން ޙަރަކާތްތެރިވާ އިރު، އެ މީހުންގެ ޢަމަލުތަކާއި ބަސްމަގު ރިވެތި ކުރަން ޖެހޭ ކަމަށް ޚުތުބާގައި ވަނީ ގޮވާލާފައެވެ.
