ދިރާގުގެ 31 ވަނަ އަހަރީ އާންމު ޖަލްސާ ވާޗުއަލްކޮށް ބާއްވައިފިއެވެ.

ހޯމަ ދުވަހު ހެނދުނު ވާޗުއަލްކޮށް މޯލްޑިވްސް ސެކިއުރިޓީސް ޑިޕޮސިޓަރީގެ 'ފަހިވޯޓް' މެދުވެރިކޮށް ބޭއްވި ޖަލްސާ ގައި ބައިވެރިވުމަށް 68 ހިއްސާދާރުން ރަޖިސްޓަރީކުރިއެވެ.

ދިރާގުގެ އެންމެ ފުރަތަމަ ވަރޗުއަލް އަހަރީ އާންމު ޖަލްސާ ބޭއްވުމާ ގުޅިގެން ދިރާގުގެ ސީއީއޯ އަދި އެމްޑީ އިސްމާއިލް ރަޝީދު ވިދާޅުވީ، ދިރާގުން އަލަށް އަހަރީ އާންމު ޖަލްސާ ވަރޗުއަލްކޮށް ބޭއްވުން ވެގެން ދިޔައީ ކުރެވުނު ވަރަށް ތަފާތު، އަދި ރަނގަޅު ތަޖުރިބާއެއްގެ ކަމަށެވެ.

ޖަލްސާގައި ވަރޗުއަލްކޮށް ބައިވެރިވި ހިއްސާދާރުންގެ އަގުލަބިއްޔަތުން ވަނީ މިދިޔަ އަހަރުގެ ހިއްސާގެ ފައިދާގެ ގޮތުގައި ހިއްސާދާރުންނަށް ބަހާ ފައިސާ ފާސްކޮށްފައެވެ. ދިރާގުން ހިއްސާގެ ފައިދާ ބަހަނީ އަހަރަކު ދެ ފަހަރެވެ.

އެގޮތުން އިންޓަރިމް ޑިވިޑެންޑްގެ ގޮތުގައި 2019 ވަނަ އަހަރު ހިއްސާއަކަށް 4.14 ރުފިޔާ ވަނީ ހިއްސާދާރުންނަށް ބަހާފައެވެ. އަދި ހޯމަ ދުވަހުގެ ނިންމުމާއެކު، ފައިނަލް ޑިވިޑެންޑްގެ ގޮތުގައި ހިއްސާއަކަށް 7.86 ރުފިޔާ ހިއްސާދާރުންނަށް ބަހާނެ އެވެ. އެހެންކަމުން ފައިދާއަށް ޖުމްލަ 12 ރުފިޔާ ހިއްސާދާރުންނަށް ލިބިގެންދާނެ ކަމަށް ދިރާގުން މައުލޫމާތު ދެއެވެ.

ފާއިތުވި އަހަރަކީ އެކި ގޮތްގޮތުން ދިރާގު ކާމިޔާބީ ހޯދާފައިވާ އަހަރެއް ކަމަށް ދިރާގުން ބުންޏެވެ. އެގޮތުން، މިދިޔަ އަހަރުގެ އޭޕްރިލް މަހު ތަޢާރަފުކުރި "ޑިޖިޓަލް ރާއްޖެ" ޕްރޮގުރާމް ވެގެންދިޔައީ ދިރާގުން ފޯރުކޮށްދޭ ހިދުމަތްތަކުގެ ސަބަބުން ރައްޔިތުންގެ ދިރިއުޅުމުގެ ފެންވަރަށް ހެޔޮ ބަދަލުތަކެއް ގެނެސްދިން ފްރޮގުރާމަކަށް ކަމަށް އެ ކުންފުނިން ބުނެއެވެ.

ދިރާގުން ވަނީ ހައި ސްޕީޑް ފައިބަރ ޓުދަ ހޯމްގެ ހިދުމަތް ރާއްޖޭގެ 45 އިންސައްތަ ގޭބިސީ އަށް މިހާރު ފޯރުކޮށްދީފައެވެ. ދިރާގުގެ ފައިބަރ ނެޓްވޯކް ދިވެހިރާއްޖޭގެ 58 ރަށަކަށް ފުޅާ ކުރުމުގެ މަޝްރޫއުގެ މެ އަވަސް، އެންމެ ބޮޑު ފައިބަރ ނެޓްވާރކްއެވެ.

ދިރާގަކީ ހަލުވި ދުވެއްޔެއްގައި ބަދަލުވަމުން އަންނަ ޓެކްނޮލޮޖީއާއި ދިރިއުޅުމުގެ ވައްޓަފާޅިއަށް އަންނަ ބަދަލުތަކާ އެއްބާރު މިނެއްގައި ކުރިއަރަމުން އަންނަ ކުންފުންޏެއް ކަމަށް އެކުންފުނިން ވަނީ ފާހަގަކޮށްފައެވެ. އަދި އަބަދުވެސް ކަސްޓަމަރުންނަށް އަޅާލައި، އިތުބާރުހިފޭ، ފެންވަރު ރަނގަޅު، ފަސޭހަ އަދި މުސްތަޤްބަލާ ރައްޓެހި ޚިދުމަތެއް ފޯރުކޮށްދިނުމުގައި ދިރާގު ދެމިއޮންނާނެ ކުންފުނިން ބުންޏެވެ.