ރާއްޖޭގައި ތިބި ލަންކާ ރައްޔިތުންނަށް 10،000 ކިލޯގެ ކާބޯތަކެތި
11 ޖޫން 2020 | ބުރާސްފަތި 04:06ތަކެތި ގެނެސްފައިވަނީ މި މަހުގެ ހަތްވަނަ ދުވަހު
ކާބޯތަކެތި ރާއްޖެ ގެނެސްފައިވަނީ މި މަހުގެ ހަތް ވަނަ ދުވަހު
މާލެ ލޮކްޑައުން ކުރުމާއި ގުޅިގެން ތާށިވެފައި ތިބި ސްރީލަންކާގެ ރައްޔިތުންނަށް 10،000 ކިލޯގެކާބޯތަކެތި ފޯރުކޮށްދީފައިވާކަމަށް އެ ގައުމުގެ ފޮރިން މިނިސްޓްރީން ބުނެފި އެވެ.
ލަންކާގެ ފޮރިން މިނިސްޓްރީން ބުނީ، ރާއްޖޭގައި ތިބި ލަންކާގެ ރައްޔިތުންނަށް ފޯރުކޮށްދިން ތަކެތީގެ ތެރޭގައި، އަަސާސީ ބޭނުންތަކަށް ބޭނުންވާ ތަކެތީގެ އިތުރުން މި ދަނޑިވަޅަށް ބޭނުންވާ ބޭހުގެ ސާމާނުތައް ހިމެނޭނެ ކަމަށެވެ.
މި ތަކެތި ރާއްޖެ ގެނެސްފައިވަނީ މި މަހުގެ ހަތް ވަނަ ދުވަހު ލަންކާއިން ރާއްޖެ އައި ސްރިލަންކަން އެއާލައިންގެ ކާގޯ ފްލައިޓެއްގައި އެވެ. ލަންކާ ރައްޔިތުންނަށް ހަދިޔާކުރި ތަކެތި ބަހާނީ ރާއްޖޭގައި ހުންނަ ސްރީލަންކާގެ ހައި ކޮމިޝަނުންނެވެ.
މާލެ ލޮކްޑައުން ކުރުމާއި ގުޅިގެން, އެނބުރި ސްރީލަންކާ އަށް އަންނަ ބޭނުންވާ 7000 މީހަކު ރާއްޖޭގައި އެބަތިބި ކަމަށް އެ ގައުމުގެ ފޮރިން މިނިސްޓްރިން ވަނީ މީގެ ކުރިން ބުނެފައި އެވެ.
އޭގެ ތެރެއިން 2000 މީހުންނަކީ މާލެ ސަރަހައްދު ގައި ދިރިއުޅެމުންދާ މީހުން ކަމަށް އެ މިނިސްޓްރީން ނެރުނު ބަޔާނެއްގައި ބުންޏެވެ.
މޭ މަހުގެ 14 ވަނަ ދުވަހު ރާއްޖޭގައި ތިބި ލަންކާ މީހުންގެ ތެރެއިން 285 މީހަކު ވަނީ ފުުރުވާލާފަ އެވެ. ރާއްޖޭގައި މަސައްކަތްކުރާ ލަންކާ މީހުންގެ ބޮޑު އިންސައްތަ އަކީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކެވެ. ކޮވިޑް-19 ނުރައްކާ ރާއްޖެ އަށް ބޮޑުވެ ރިސޯޓުތައް ބަންދުކުރުމާއި ގުޅިގެން އޭގެ ތެރެއިން ގިނަ ބައެއްގެ ވަޒީފާ ވަނީ ގެއްލިފަ އެވެ.
ލަންކާ ސަރުކާރުން ދަނީ ދުނިޔޭގެ އެކި ކަންކޮޅުތަކުގައި ތިބި އެ ގައުމުގެ ރައްޔިތުން އަނބުރާ ގައުމަށް ގެންދިޔުމުގެ މަސައްކަތް ކުރަމުންނެވެ.
