ސްކޫލް އަޅަން ނެގި ވޮލީބޯޅަ ކޯޓުގެ ބަދަލުގައި އިތުރު ތިން ކޯޓު އަޅަނީ

ދަރުމަވަންތަ ސްކޫލްގެ އައު އިމާރާތް އެޅުމަށް ވިލާ ކޮލެޖު ކުރިމަތީގައި އޮތް ބިމުގައި އަޅާފައިވާ ދެ ވޮލީބޯޅަ ކޯޓު އެޑިއުކޭޝަން މިނިސްޓްރީން ނެގުމާ ގުޅިގެން، އޭގެ ބަދަލުގައި އިތުރު ތިން ކޯޓު އެޅުމަށް ޔޫތު މިނިސްޓްރީން ނިންމައިފިއެވެ.

މާލެ ވިލާ ކޮލެޖު ކުރިމަތީ އޮންނަ 369 ނަމްބަރު ކޮށީގައި އަޅާފައިވާ ފުޓްސަލް ދަނޑާއި ދެ ވޮލީބޯޅަ ކޯޓު ހުރިތަން ރޫޅާ ސާފު ކުރުމަށް އެޑިއުކޭޝަން މިނިސްޓްރީން މިހާރު ވަނީ ކޮންސްޓްރަކްޝަން ކުންފުންޏަކާއި ހަވާލުކޮށްފައެވެ. އެއާއެކު ވޮލީބޯޅަ ކޯޗުންނާއި ކުޅުންތެރިން ވަނީ ސޯޝަލް މީޑިއާގައި ކަންބޮޑުވުން ފާޅުކޮށްފައެވެ.

ރާއްޖެ.އެމްވީއާ ވާހަކަ ދައްކަމުން ވޮލީބޯޅަ ކޯޗު ޚާލިދު މުހައްމަދު ބުނީ މާލޭގެ އެލްޓީ ދަނޑުގައި އަޅާފައިވާ ވޮލީބޯޅަ ކޯޓުތައް ނެގުމުން ކުޅުންތެރިންނަށް އެކަމުގެ ގެއްލުންވާނެ ކަމަށާއި، ކުޅުންތެރިން މާލޭގައި ފަރިތަކުރަން ހަދާފައިވާ ހަމައެކަނި ކޯޓު ނެގުން ވެގެންދާނީ ކުޅުންތެރިންގެ މޯޓިވޭޝަން ދަށްވާނެ ކަމެއް ކަމަށެވެ.

އެއާއެކު ކުޅިވަރާ ބެހޭ ވަޒީރު އަޙްމަދު މަހުލޫފް ބުދަ ދުވަހު ކުރެއްވި ޓްއީޓެއްގައި ވިދާޅުވީ ދަރުމަވަންތަ ސްކޫލް އެޅުމަށް ވޮލީބޯޅަ ކޯޓުތައް ނަގަން ޖެހުމާ ގުޅިގެން، ވަގުތީ ތިން ކޯޓު އެޅުމުގެ މަސައްކަތް ކުރިޔަށްދާ ކަމަށެވެ. މީގެ އިތުރުން މަހުލޫފް ވިދާޅުވީ ވޮލީބޯޅައަށް ހާއްސަ ކުރެވިފައިވާ ބިމުގައި ވީ އެންމެ އަވަހަކަށް ރަނގަޅު ފެންވަރެއްގެ އިންޑޯ ކޯޓުތަކެއް އެޅުމަށްވެސް ރޭވިފައިވާ ކަމަށެވެ.

މައުލޫމާތު ލިބިފައިވާ ގޮތުގައި ވަގުތީ ވޮލީބޯޅަ ތިން ކޯޓު އަޅަނީ ކުރިން ރުމާލު ދޭއް ޖަގަހަ ހުރި ބިމުގައެވެ.

ވަގުތީ ވޮލީބޯޅަ ތިން ކޯޓު އަޅާއިރު، މީގެ ކުރިން މި ސަރުކާރުން ވަނީ ފެންވަރު ރަނގަޅު ބީޗް ވޮލީބޯޅަ ކޯޓެއް އަޅާފައެވެ. އެގޮތުން ހުޅުމާލޭ ބީޗް ވޮލީބޯޅަ ކޯޓު މިހާރު ވަނީ ބައިނަލްއަގުވާމީ ފެންވަރުގެ ޓްރެއިނިން ފެސިލިޓީއަކަށް ބަދަލުކޮށްފައެވެ. އަދި ބީޗް ވޮލީބޯޅަ ކުޅުމަށާއި ގައުމީ މުބާރާތްތައް ބޭއްވުމަށް ބޭނުންކުރަމުން އަންނަ މާލޭ ދޮންގަނޑު ބީޗް ވޮލީބޯޅަ ކޯޓު މިދިޔަ ސަރުކާރުން ބަންދުކުރި ނަމަވެސް، މި ސަރުކާރުން ވަނީ އެ ކޯޓު އަލުން ހުޅުވާފައެވެ.