މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ހުސްވެފައިވާ މަޤާމަށް އައިމިނަތު އަމީނާ ނައީމް(އަނާ) އައްޔަނުކުރުމަށް ރައްޔިތުންގެ މަޖިލީހުން ފާސްކޮށްފި އެވެ.
އަންގާރަ ދުވަހު ކުރިޔަށްދިޔަ ޖަލްސާގައި ބްރޯޑްކޮމް އަށް މެމްބަރަކު އައްޔަނުކުރުމަށްޓަކައި އަނާ އަށް ރުހުން ދިނުމަށް ފެނޭތޯ އެހުނު ވޯޓުގައި ބައިވެރިވެ ވަޑައިގެންނެވި 63 މެމްބަރުން ވަނީ އަނާ އަށް ރުހުންދޭން ފެންނަކަމަށް ވޯޓު ދެއްވާފަ އެވެ. ބްރޯޑްކޮމް އަށް އައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކުރުމަށް ފަހު ތަޅުމަށް ހުށަހެޅި ލިސްޓުގެ ކުރީގައި އުޅުނީ ވީޓީވެ ނޫސްވެރިޔާ އަމިނަތު އަމީނާ އަދި ރާއްޖެޓީވީގެ ނޫސްވެރިޔާ މުހައްމަދު ފަޒީންއެވެ. އަނާ އަށް ރުހުން ދިނުމަށް ފެންނަކަމަށް ފާސްވުމުން ދެން ހުރި ނަންތަކަކަށް ވޯޓަށް އަހާފައެއްނުވެ އެވެ.
އަނާއަކީ ވީޓީވީގައި މިވަގުތު ސީނިއަރ އެޑިޓަރެއްގެ މަގާމު ފުރުއްވަމުން ގެންދަވާ ނޫސްވެރިއެކެވެ. މީގެއިތުރުން ދެ ފަހަރެއްގެ މަތިން ނޫސްވެރިކަމުގެ އެވޯޑްވެސް އަނާ ވަނީ ހާސިލްކޮށްފަ އެވެ. މީގެއިތުރުން އަނާ ވަނީ ނޫސްވެރިކަމުގެ ދާއިރާއިން ޑިގްރީ އަދި މާސްޓަރސް ހާސިލްކޮށްފަ އެވެ.
ބްރޯޑްކޮމްއަށް މެމްބަރަކު އައްޔަނުކޮށްފައިމިވަނީ އެ ކޮމިޝަނުގެ ނައިބު ރައީސްގެ މަޤާމުގައި ހުންނެވި ފާތިމަތު ޒައިނާ ވަކިކުރަން މަޖިލީހުން ފާސްކުރުމުން އެމަގާމް ހުސްވެފައިވާތީއެވެ. އަނާ އައްޔަނުކުރުމާއެކު ބްރޯޑްކޮމްގައި މިވަގުތު ހުރިހާ މެމްބަރުންވެސް ވަނީ ހަމަވެފަ އެވެ.
